– Ákeı, mine, meniń sizge kúıeý bala bolǵanyma attaı on bes jyl tolypty. Qyzyńyzben tanyspaı turyp, men sizben tanysyppyn. Qaıda, qashan tanysqanymyz esińizde me? – dep atasyna synaı til qatty.
– Esimde emeı! Sonda kýpede tanysqanda, sen balań jigit ediń. Áli esimde, alǵash qoraptaǵy kompıýterdi senen kórip tamashalaǵanym... Esińde shyǵar, kompıýterińdi qyzyqtap, mazańdy alǵanym... Odan saǵan rıza bolǵan basym vagon restoranyna apardym emes pe?
– Áp, bárekeldi, aına qatesiz solaı bolǵan... Sizden bir bilgim kelgeni, bizben birge kýpede eńgezerdeı, symbatty sportsmen jigit bolyp edi ǵoı?
– E, ıá, esimde.
– Sol jigit sizden zvondap alaıynshy dep telefonyńyzdy eki-úsh márte suraǵanda, neǵyp bere qoımadyńyz? Jáne meni aparǵan restoranǵa ony neǵyp ertpedińiz? Soǵan men áli kúnge tańǵalamyn...
– Al aıtaıyn. Al men oǵan telefonymdy bere qoıdym da, ony restoranǵa bizben birge shaqyra qoıdym delik... Sodan óziń sekildi onymen úremke soǵystyryp iship, tanys-bilis bolyp, aǵyl-tegil áńgimemiz jarasa ketti delik. Sodan ózińmen bolǵandaı kýpede de syı-sııapatymyz jarasyp, ertesinde birge túsip qımaı qoshtasyp, oǵan da saǵan bergen mekenjaıymdy aıta saldym delik. Sodan ol da sen sııaqty alǵash kelgen bizdiń qalamyzdan qonaqúı izdep sharq uryp, onda oryn bolmaı, baıaǵy menimen habarlasyp, odan ol meniń úıime óziń sııaqty ýaqytsha taban tiredi delik... Al sodan ol meniń boıjetkenimmen tanysyp, bir-birin unatyp... Ne kerek, ol ekeýi sender sekildi kóp ótpeı ámpeı-jámpeı bolyp... Qyzym qara basyp, odan ekiqabat bolyp qalǵanyn jetkizip, ekeýi úılenetinderin aıtsa, men paqyr kónbeı qaıda barady deısiń?
– Ákeı, sol kezde úıińizge turaqtatyp, aqyry qyzyńyzǵa qosaq bolýǵa luqsat etken sizge rızamyn.
– E, men de, ózińdeı bizdiń qaladaǵy kompıýterdiń birden-bir qojasy bolyp otyrǵan kúıeý balama rızamyn.
– Sonda da aıtyńyzshy, anaý kýpedegi jigitke neǵyp telefonyńyzdy bere qoımadyńyz?
– Ony kóripkeldigim dep bilemin... Qaltasynda qarapaıym qalta telefony joq kúıeý bala kimge kerek?
Berik SADYR
