ATYRAÝ. 26 sáýir. Atyraýdaǵy eń qart saılaýshynyń biri – Nyshan áje Jubaeva bıylǵy 1 qańtarda 104 jasqa toldy. Ol el tynyshtyǵy úshin daýys berdi. Bul týraly egemen.kz tilshisi habarlady.
Jas kúninen ómirdiń qıyndyǵyn kóp kóripti. Soǵys jyldarynda eginshi boldy, keıin ártúrli jumystar atqarǵan. Maıdannan aman oralǵan ómirlik jary Jubaı qarııamen birge eki qyzy men Baımurattaı ulynyń qyzyǵyn kórdi. On nemereniń biri Ázıdolla men kelini ǵasyrdan da uzaq ǵumyr jasaǵan ájesin mápelep otyr. Alty shóberesi, ásirese, Asylhany «ájelep», bal qylyǵymen baýraıdy.
«Alla búgingi urpaqty baqytty ómirge jetkize kórsin, elimizdiń birligi men tynyshtyǵy buzylmasa eken», – dep kúni-túni tilek tileıtin Nyshan áje áli de tyń. Dalaǵa ózi kirip-shyǵady, kózildirikke júginip kórmepti. Tipti, aǵaıyn-týystyń jaqsylyǵyn bólisýden qalmaıdy eken. Biraq burynǵydaı emes, bul joly saılaý ýchaskesine bara alǵan joq. №64 ýchaskelik saılaý komıssııasy tóraǵasynyń orynbasary Meırambek Arystanǵalıev pen komıssııa múshesi Ǵalymjan Sultanov Nyshan ájeniń úıine jyljymaly jáshikti alyp keldi.
О́z tańdaýyn jasaǵannan keıin Nyshan áje: «Qazaq eli aman, jastardyń bolashaǵy jarqyn bolsyn, aınalaıyndar!» – dep batasyn berdi.
Joldasbek Shópeǵul.
Derek: egemen.kz.
Sýret Rahym Qoılybaev.
