Dástúrli sadaq atýdan ulttyq quramanyń bas bapkeri Dıas Ahmetovtiń aıtýynsha, Dúnıejúzilik kóshpeliler oıyndarynda synǵa túsýge 35 memlekettiń mergenderi ótinish joldaǵan.
«Elordada ótetin saıysqa ótinish joldaǵan elderdiń delegasııasyn tirkeý jumystary júrip jatyr. Sportshylarymyzdyń daıyndyǵy jaqsy, deıturǵanmen Majarstan, Qyrǵyzstan, Malaızııa, Túrkııa, Reseı syndy memleketten keletin sadaqshylardyń da sheberligi joǵary. Biraq tól sportymyzdan óz jerimizde ótetin alamanda sańlaqtarymyz baryn salyp, el mereıin ústem etetinine senimdimiz», dedi D.Ahmetov.
Ulttyq qurama múshesi Baqbergen Sálimov orasan jaýapkershilik júkteletinin aıtty.
«Dúnıejúzilik kóshpeliler oıyndary 2014 jyldan beri turaqty túrde ótkizilip keledi. Bıylǵy dodany uıymdastyrý mártebesi bizge buıyrdy. О́z jerimizde ótetin saıysta barymyzdy salamyz. Qalyń jankúıerdiń de zor senim artyp otyrǵanyn bilemiz. Saıys ótetin alańda jattyǵý júrgizý biz úshin de zor múmkindik bolyp otyr. О́ıtkeni jer jaǵdaıyn tolyqtaı zerdelep, klımatyn, jeldiń qaı baǵytta soǵatynyn baǵamdap, aldyn ala zerttep kelemiz», dedi sadaqshy B.Sálimov.
Áıelder arasynda synǵa túsetin Ajar Rahmetqyzy aıtýly dodanyń bastalýyna sanaýly kún qalǵandyqtan, daıyndyq jumysy kúsheıtilgenin jetkizdi.
«Bizden qalyń kórermen tek altyn medal kútetini belgili. Jankúıerlerdiń senim údesinen shyǵýdan aıanyp qalmaımyz. Dástúrli sadaq atý sportynyń elimizde keń qanat jaıýyna Dúnıejúzilik kóshpeliler oıyndary serpin beretini sózsiz. Zamandastarymyzdyń arasynda ulttyq sportqa qyzyǵýshylar qatary artyp kele jatqany qýantady», deıdi mergen qyz.
«Dástúrli sadaq atý» federasııasy da Ulttyq sport túrleri qaýymdastyǵynyń quramyna kiredi. 89 elden 2 myńnan asa sportshy qatysatyn Dúnıejúzilik kóshpeliler oıyndarynda dástúrli sadaq atýdan synǵa túsetin mergenderdiń ónerin kórermender «Kóshpeliler ǵalamy» etnoaýlynyń alańynda tamashalaıdy.
Dástúrli sadaq atý saıysyna qatysýshy mergenderdiń jetekshileri, ıaǵnı ár elden kelgen komanda basshylary 8 qyrkúıekte mandattyq komıssııa talqylaýyna qatysady. Mergender dodasyna qatysatyn sportshynyń sadaǵy, jebesi talapqa saı bolýy qatań eskeriledi. Ár elden keletin komanda quramynda 18 jastan asqan 6 er, 4 áıel sadaqshy dodaǵa qosylady.
Dástúrli sadaq atýshylar Astana tórinde ótetin kóshpeliler oıyndarynda birneshe nysanaǵa tıgizýden saıysqa túsedi. Túriktiń «Pýta» dep atalatyn nysanasyna erler 70 metr qashyqtyqtan atatyn bolsa, áıelder 60 metrden kózdeıdi. Qazaqtyń «Qalqan» dep atalatyn nysanasynyń dıametri 60 sm bolady. Túriktiń pýta nysanasyna qaraǵanda qashyqtyq jaqyndaý: erler 60 metr, áıelder 50 metrden adyrnasyn tartady. Jamby nysanasynda jerden 170 sm bıikke ilingen jambyny qaǵyp túsirý úshin erler de, áıelder de 30 metr qashyqtyqtan sheberligin synaıdy. Dástúrli sadaq atýdan komandalyq saıys ta osy jamby atý stıli boıynsha ótedi.
Dástúrli sadaq atýdan Túrkııa eliniń mergenderi óte tegeýrindi. Sebebi bul elde birneshe jyldan beri halyqaralyq týrnır turaqty ótkizilip keledi. Sadaq atýdy kásibı sport retinde tanyp, erekshe kóńil bóledi. Majarstannyń da sadaqshylary qııadaǵyny qaǵyp túsiretin deńgeıde. Qyrǵyzdar men tájikter de sadaq atýǵa aıryqsha kóńil bólip, damýyna serpin berip otyr.
