ASTANA. 13 maýsym. Fýtboldan 2016 jylǵy Eýropa chempıonatyna irikteý týrnıri aıasynda Qazaqstan óz alańynda Túrkııany qabyldap, 0:1 esebimen jeńilip qaldy. Osylaısha ulttyq quramamyz atalǵan týrnır barysynda qatarynan besinshi ret qarsylastaryna ese jiberip otyr. Bul týraly egemen.kz habarlady.
Alǵashqy taım teń jaǵdaıda órbidi. Bastapqy mınýttarda qonaqtar basymdyqqa ıe bolǵanymen, ýaqyt óte alań ıeleri de senimdi oıyn órnegin kórsetti. Tipti Sergeı Hıjnıchenko gol da salǵan bolatyn. Degenmen, ol oıynnan tys qalyp, esep ashylǵan joq. Odan bólek Ulan Qonysbaevtyń da qaqpashymen betpe-bet shyǵatyn múmkindigi bolǵan.
Jalpy, matchtyń birinshi bóliginde bizdiń oıynshylar sapynan Dmıtrıı Shomkoda ǵana gol soǵatyn keremet sát boldy. Alaıda, onyń soqqysyn qaqpashy Babadjan qaıtardy. Al Túrkııa sapynan Mehmet Topal men Býrak Iylmazdar gol soǵatyn múmkindikterin paıdalana almady.
Ekinshi taım Qazaqstanyń shabýylymen bastaldy. Baýyrjan Islamhannyń aıyp alańyna enip baryp, alys buryshty kózdep jasaǵan soqqysy qaqpadan sál ǵana qıys ketti. Artynsha Qonysbaevtyń da soqqysy qaqpa baǵanyn janap ótti. Kezdesýdiń 65-mınýtynda komanda kapıtany Samat Smaqov jaraqat alyp, oıyndy ózgelerden erte aıaqtaýǵa májbúr boldy. Bas jattyqtyrýshy onyń ornyna jas qorǵaýshy Abzal Beısebekovti shyǵarǵanymen, Samattyń orny oısyrap turdy. Nátıjesinde túrikterdiń dál osy ortalyq alańnan bastaǵan shabýyldary qaqpaǵa jasalǵan soqqylarmen aıaqtalyp jatty. Sondaı sátterdiń birinde Býrak Iylmaz Pokatılovpen betpe-bet shyǵyp, soqqy jasady. Abyroı bolǵanda, dop qaqpa baǵanynan keıin serpildi.
Oıynnyń 83-mınýtynda qonaqtar esep ashyp, degenderine jetti. Aıyp alańynyń ishinde áriptesterinen pas alǵan kapıtan Arda Turan aınalyp baryp soqqy jasady. Buǵan deıin birneshe qaýipti soqqynyń betin qaıtaryp úlgergen qaqpashymyz bul joly esh shara qoldana almady. Nátıjesinde jalǵyz gol oıyn taǵdyryn sheshýge jetkilikti boldy.
Kezdesýdegi statıstıkalyq kórsetkishterge nazar aýdaraıyq. Fatıh Terımniń shákirtteri keshegi oıynda 19 márte qaqpaǵa soqqy jasasa, sonyń 6-ýyn týra baǵyttaǵan. Al Qazaqstan 4 soqqymen jaýap berdi. Onyń bireýi ǵana qaqpa ańǵaryna dál jasaldy. Buryshtama doby boıynsha da qonaqtar eki ese basymdyqqa ıe (3 – 7). Desek te, dopqa ıelik etý kórsetkishi jaǵynan aıtarlyqtaı ese jiberdik deı almaımyz (44% – 56%). Tipti 1-taım qorytyndysy boıynsha bul kórsetkish 50% – 50% bolǵanyn aıta keteıik.
Osylaısha, Iýrıı Krasnojannan tálim alatyn fýtbolshylarymyz 1 upaımen «A» tobyndaǵy sońǵy ornynda qaldy. Al upaı sanyn 8-ge jetkizgen túrikter ázirge 4-orynda. Top basynda 15 upaımen Islandııa keledi. Keshe túnde olar Chehııa quramasyn 2:1 esebimen jeńgen bolatyn. Al úshinshi satyǵa ornalasqan Nıderlandy (10 upaı) keshe syrt alańda Latvııadan 2:0 esebimen basym tústi.
Qazaqstan – Túrkııa 0:1 (0:0)
12 maýsym. Almaty. «Ortalyq» stadıony. 26 000 kórermen.
Tóreshi: Maıkl Olıver (Anglııa).
Qazaqstan: Stas Pokatılov, Samat Smaqov (Abzal Beısebekov 67), Mark Gýrman (Ashat Taǵybergen 78), Renat Abdýlın, Sergeı Malyı, Dmıtrıı Shomko, Genrıh Shmıdtgal, Iýrıı Logvınenko, Ulan Qonysbaev, Baýyrjan Islamhan (Jambyl Kókeev 85), Sergeı Hıjnıchenko.
Túrkııa: Volkan Babadjan, Serdar Azız, Hakan Balta, Gekhan Genıýl, Semıh Kaııa (Emre Tashdemır 75), Ozan Týrfan (Úmit Býlýt 64), Arda Turan, Mehmet Topal (Volkan Shen 46), Selchýk Inan, Hakan Chalhanoglý, Býrak Iylmaz.
Gol: Arda Turan 83.
Eskertýler: Genrıh Shmıdtgal 77, Renat Abdýlın 88, Dmıtrıı Shomko 90+2.
Elaman Qońyr.
Derek: egemen.kz.
Sýret: sports.kz.
Keshe Almatydaǵy oıynnan bólek, atalǵan irikteý týrnıri aıasynda taǵy 8 kezdesý ótti. Ol matchtardyń nátıjeleri tómendegideı:
«A» toby
Islandııa – Chehııa 2:1 (0:0)
Goldar: Gýnnarsson 60, Sıgtorsson 76 – Dochkal 55.
Latvııa – Nıderlandy 0:2 (0:0)
Goldar: Veınaldým 67, Narsınh 71.
«V» toby
Bosnııa jáne Gersegovına – Izraıl 3:1 (2:1)
Goldar: Vıshcha 42, 75, Djeko 45+2 (penaltı) – Ben Haım 41.
Ýels – Belgııa 1:0 (1:0)
Gol: Beıl 25.
Andorra – Kıpr 1:3 (1:2)
Goldar: Dossa (avtogol) 2 – Mytıdıs 13, 45, 53.
«N» toby
Norvegııa – Ázerbaıjan 0:0
Horvatııa – Italııa 1:1 (1:1)
Goldar: Mandjýkıch 11 – Kandreva 36.
Malta – Bolgarııa 0:1 (0:0)
Gol: Popov 56.
