Kúıeýiniń qolynan qaza tapqan Ál-Beıneniń anasyna jibergen sońǵy sózinde Almatydaǵy ómirin tozaqpen teńestiripti. Jaqyndarynyń aıtýynsha, qaıǵyly jaǵdaıǵa deıin de súıip qosylǵan kúıeýinen kórgen qorlyǵy kóp.
«Qyzymnyń moınynan kógergen izderdi kórip, «mynaý ne?» dep suradym. «Kúıeýim meni tunshyqtyrdy» dedi. Keıin «Anashym, men onyń toqtaýsyz qadaǵalaýynan sharshadym. Tipti úıden shyǵa almaı qaldym. Ol meni eshqaıda jibermeıdi. Kıim alaıyn desem, «saǵan qajeti joq» dep betimdi qaıtarady. Onyń oılaǵany aqsha ǵana. Tapqanymdy qaıta-qaıta suraı beredi» degen», deıdi marqumnyń anasy Maǵjan Baıseıitova.
Marqum Ál-Beıne Zarıpova kózi tirisinde aqshadan taryqpaǵan. 42 jasynda qarjyger bolyp jumys istep, óz kóligi, bir emes — úsh páteri bolypty. Keıin eki qabatty záýlim úı salyp alǵan. Ál-Beıneniń ómiri osy óz úıinde úzildi. 31 qańtarda shetelden Almatyǵa kelgennen keıin ekeýiniń arasynda kıkiljiń týyndaǵan. Tergeý málimetinshe, 48 jastaǵy Sabyrjan Zarıpov áıelin qyzǵanyshtan pyshaqtap tastaǵan.
«Zarıpova Dýbaıda basqa jigit tapqanyn, al onymen ajyrasqysy keletinin aıtqan. Kámeletke tolmaǵan qyzy ekinshi qabatta uıyqtap jatqan soń, sóılesý úshin jertólege túsedi. Zarıpov áıelinen «uıalmaısyń ba?» dese, ol uıalmaıtynyn aıtyp kúlimsiregen. Qyzǵanyshtan oń qolyna pyshaq alyp, kútpegen jerden Zarıpovanyń moınyna, jambasyna, ishine suǵyp alǵan», dedi prokýror Náılá Qanatova.
Prokýrordyń sózinshe, keıin kúıeýi Ál-Beıneniń telefonyn paıdalanyp, esepshi bolyp jumys istegen kompanııanyń shotyndaǵy 4 mıllıon 700 teńgeni ózine aýdaryp alǵan. Sabyrjan Zarıpov qazir eki bappen aıypty tanylyp otyr. Biri — urlyq, ekinshisi — adam óltirý. Alaıda jábirlenýshi tarap qylmystyń qyzǵanyshtan, affekt jaǵdaıynda bolmaǵanyna senimdi. Sondyqtan asa qatigezdikpen adam óltirý babyna aýystyrýdy talap etip otyr.
«Denesiniń bári kesilip ketken. Ásirese jynys múshesin keskilep tastaǵan. Betiniń de saý-tamtyǵyn qaldyrmapty. Kózinen ıegine deıin tilingen. Tipti súıegi kórinip turdy», dedi marqumnyń inisi Erik Júsipov.
Qylmysynan keıin Sabyrjan Zarıpov 12 jastaǵy qyzyn týystarynyń úıine tastap ketken. Qamqorshy retinde qaryndasy tanylypty. Qazir jetkinshek zań boıynsha sonyń qolynda. Marqumnyń jaqyndary komıssııanyń sheshimimen múlde kelispeıdi. О́ıtkeni jalǵyz qyzy kámeletke tolmaǵan, Ál-Beıneniń 42 jyl jıyp-tergen múlki kúıeýiniń týystaryna ketip qalýy múmkin eken.
