Qalyń kórermenniń kópten kútken kókpar oıynynyń dodasy tartyspen ótti. Jartylaı fınaldyq saıysta «A» tobynda Qazaqstan ulttyq quramasy Reseı kókparshylaryn aıqyn basymdyqpen eńserdi. Tipti birinshi taımda reseılik kókparshylar elimizdiń ulttyq quramasynyń sheńberine betteı alǵan joq. Qansha shabýyldy óristetýge tyrysqanymen, qorǵanystaǵy sportshylarymyz ábjil qımylmen olardyń áreketin qıyp tastap otyrdy.
Ulttyq quramanyń múshesi Abylaıhan Nyshanbekov «Nurtóbel» atty arǵymaǵyn oıqastatyp, birneshe salym saldy. «Astana tórinde ótip jatqan Dúnıejúzilik kóshpeliler oıyndarynda fınaldyq dodaǵa óttik. Jospar oryndalyp keledi, endi basty qarsylasymyz qyrǵyz quramasynan basym túsip, elimizdi qýantsaq deımiz. Eki jyl buryn Túrkııanyń Iznık qalasynda ótken dúbirli alamanda kókpardan osy qyrǵyz quramasymen fınalda jolymyz túıisip, elge jeńispen oralǵan edik. О́z jerimizde ótken dodanyń aýrasy múldem bólek eken. «Qazanat» ıppodromyna jınalǵan qalyń jankúıerdiń qoldaýyn sezingende erekshe kúıge bólenesiń. Jartylaı fınaldyq tartysta Reseı quramasynyń qorǵanysy álsiz boldy. Múmkin alańǵa boı úırete almady ma, álde shırek fınaldyq tartysta kóp kúshin sarqyp aldy ma, ekpinimizdi toıtarýǵa shydas bermedi. Ekinshi taımda es jıǵandaı bolyp, eki salym saldy. Jartylaı fınaldyq oıynda iri eseppen (18:2) jeńiske jetý altyn alýǵa qulshynysymyzdy arttyrdy», dedi A.Nyshanbekov.
Bul oıynda Qurmanbek Turǵanbek te ıppodromǵa jınalǵan kókpar jankúıerlerin óziniń samdaǵaılyǵymen tánti etip, saqa kókparshy ekenin tanytty. Reseılik qarsylastarynyń iri eseppen utylýyna attarynyń bas bermeýi, alańǵa úırenise almaýy da áser etti deıdi kókparshy. «Biz á degennen birneshe salymdy salýymyz olarǵa psıhologııalyq turǵydan da aýyr soqqy boldy. О́zderińiz de kórdińizder, birinshi taımda tipti sheńberimizge mańaılaı alǵan joq», dedi Qurmanbek Turǵanbek.
Kókpardan ulttyq quramanyń bas bapkeri Aqylbaı Mankeev jartylaı fınaldyq oıynda reseılikterdi iri eseppen utqanǵa qýaný erte ekenin, negizgi kúshti fınalda qyrǵyz kókparshylaryna qarsy tartysqa irkip otyrǵanyn atap ótti. Tipti taktıkalyq josparǵa da ózgeris engizgenin aıtty. «Reseı quramasynyń sapynda oınaǵan kókparshylardyń kópshiligi – qyrǵyz baýyrlarymyz. Olar da erteden kókpar tartyp, at baýyrynda ósken ult. Fınaldyq báseke biz úshin mańyzdy. О́ıtkeni arqamyzda – kókpar saıysynan altyn alý amanaty. Qalyń jankúıer bizden tek jeńis kútedi. Dúnıejúzilik kóshpeliler oıyndarynyń fınaldyq saıysynda jeńimpaz atanýǵa umtylamyz», dedi A.Mankeev.
Kókpardan Qyrǵyzstan quramasynyń oıynshysy Manas Nııazov etnosport alamany Astana tórinde joǵary deńgeıde ótip jatqanyna alǵysyn bildirdi. «Kókpar oıyny – qyrǵyz ben qazaqqa ortaq ıgilik. Tóskeıde malymyzǵa óris bir bolǵany sekildi, ulttyq oıyn da eki eldiń nesibesi. Biz de sátin salyp fınaldyq tartysqa joldama aldyq. 2022 jyly Túrkııada ótken Dúnıejúzilik kóshpeliler oıyndarynyń fınaldyq tartysynda biz jer ulaq dep ataıtyn kókpardan qazaq sportshylaryna 3:4 esebimen ese jibergen edik. Bul joly jeńiske jetýge barymyzdy salamyz. Qazaq eliniń sportshylarǵa degen qoldaýy, qurmeti erekshe eken. Astanaǵa tabanymyz tıgen kúnnen kóshede, ıppodromda kórgen kókpar kórermenderi tanyp, amandasyp, sáttilik tilep jatyr. Bul – doda ǵana emes, baýyrlas elderdiń dostyǵyn nyǵaıtatyn shara. Sondyqtan yntymaǵymyz arta bersin», dedi Manas Nııazov.
Qyrǵyzstan quramasy jartylaı fınalda Túrkııa kókparshylaryn 15:1 esebimen utty.Kóshpeliler oıyndaryna kókpardan Qazaqstan, AQSh, Reseı, О́zbekstan, Qyrǵyzstan, Majarstan, Qytaı, Mońǵolııa jáne Túrkııa eliniń kókparshylary qatysty. Búgin elimizdiń kókparshylary qyrǵyzdarmen altyn úshin tartyssa, Túrkııa men Reseı quramalary qola júlde jolynda dodaǵa túsedi.
Al kókbóriden de fınaldyq tartys osy eki eldiń ulttyq quramasy arasynda órbıdi. Jartylaı fınaldyq saıysta Qyrǵyzstan quramasy Reseı komandasyn 11:6 esebimen jeńse, bizdiń jigitter Túrkııa ulttyq quramasyn 15:1 esebimen oısyrata utty.
Búgingi fınaldyq báseke «Qazanat» ıppodromynda saǵat 11:00-de bastalady.
