Balýandardyń baǵy janbaı júr

Almaty oblysyndaǵy «Aqbulaq» kesheninde áıelder quramasyna shaqyrtý alǵan balýandar qyzý ázirlikke kiristi. Komandanyń aǵa jattyqtyrýshysy Qýanysh Jaqsybaı álem chempıonatyna baratyn balýandardy irikteýde el birinshiliginiń nátıjesi, Azııa chempıonatynyń qorytyndysy saralanǵanyn alǵa tartty. «Ko­manda qataryna shaqyrtý alǵan balýandardyń kópshiligi kók órim jastar. Álemdik dodada alǵash ret baq synaýǵa bel býyp otyr. Arasynda halyqaralyq týrnırlerge qatysyp, Olımpıada joldamasy úshin ótken dodaǵa qosylǵan tájirıbeli balýandar da bar. Máselen, Laýra Ǵanı­qyzy Albanııaǵa baratyn balýandar tizimine ilikti. Eresekter arasyndaǵy Azııa chempıonatynan qola medalmen oralǵan Anastasııa Panasovıch te qatarda. Alǵa shy­ǵandap ketkendeı bolmaıyq, degenmen álem chempıonatynda keminde eki medal oljalasaq deımiz», dedi bilikti maman.

Aǵa jattyqtyrýshy byltyrǵy álem chempıonatynan qola medalmen oralǵan qyzdardyń nelikten qatarǵa qosylmaǵanyn aıtty. «Byltyr da álem birinshiligi osy Tırana qalasynda ótti. 53 kg salmaqta beldesken Altyn Shaǵaeva jartylaı fınalda moldovalyq Marıana Dragýtanǵa ese jiberdi. Negizi Altyn baryn salyp kú­resken, biraq tóreshi eýropalyq balýanǵa bolysty. Bizdiń Altyn ádis jasaýǵa umtylǵan tusta ys­qyryp, beldesýdi kilt toqtatyp tastap otyrdy. Buıyrǵany qola medal shyǵar. Balýan qyz bıyl otbasylyq jaǵdaıyna jaraqaty da qosa qabat kıligip, baýyryn jaza kúrese alǵan joq. Sondyqtan quramaǵa shaqyrtý almady. Ekinshi qola medaldy oljalaǵan Irına Kýznesova (62 kg) shırek fınalda ýkraınalyq balýanǵa ese jiberdi. Fızıkalyq daıyndyǵy da joǵary ekenin dáleldegen ýkraın qyzy tegeýrindi eken. Irına jubanysh beldesýinde Italııa balýanyn, al qola medal úshin ótken kúreste Úndistan qyzyn qapy qaldyrdy. Kýznesovanyń jasy 23-ten asyp ketkendikten, bul álem chempıo­natyna qatysa almaıdy», dedi Q.Jaqsybaı.

Komanda músheleri Almaty obly­syndaǵy oqý-jattyǵý jıy­nyn Astana qalasynda jal­ǵas­tyrady da, sodan soń Tıranaǵa ushady. 23 jasqa deıingi jastar arasyndaǵy álem chempıonatyna qatysatyn balýandar: L.Ǵanıqyzy (50 kg), Z.Baıanova (53 kg), A.Áshimova (55 kg), Sh.О́mirbek (57 kg), G.Bekesh (59 kg), T.Dýbek (62 kg), G.О́serbaı (65 kg), B.Seıdýáli (68 kg), A.Pa­nasovıch (72 kg), A.Ertóstik (76 kg).

Aǵa jattyqtyrýshy Qýa­nysh Jaqsybaı Parıj Olım­pıadasynda beldesýge túsken, tipti olja salǵan álemniń tegeýrindi balýandary da Tırana tórinde ótetin dúbirli dodaǵa qatysýy múmkin ekenin aıtady.

Erkin kúresten Rýslan О́mir­álıev baptaıtyn komanda mú­sheleri de Almaty oblysyndaǵy «Aq­bulaq» olımpıadalyq orta­lyǵynda jattyǵý jıynyn bastap ketti. Qorytyndy daıyndyq 8-23 qazan aralyǵynda ótedi. Bapkerler quramy álem birinshiliginde beldesetin balýandardy iriktep, jattyǵý jıynynda olardyń áleýetin taǵy bir baǵamdaımyz dep otyr. Alan Oralbek (57 kg), Ádilet Álmuhamedov (61 kg), Bekzat Ermekbaı (65 kg), Ernur Nurǵazy (70 kg), Jeńis Qanybekov (79 kg), Nurjan Isaǵalıev (86 kg), Bekzat Amanǵalıev (92 kg), Rızabek Aıtmuhan (97 kg), Omarhan Nádirov (125 kg) Albanııada el senimin arqalap shyǵady.

Aǵa jattyqtyrýshy Rýs­lan О́mirálıev 74 kg salmaq dáre­jesinde eki balýanǵa da tańdaý túsip turǵanyn, naqty sheshim oqý-jattyǵý jıynynyń sońynda qabyldanatynyn jetkizdi. «Ba­lýan­dardyń barlyǵy da el birin­shiliginde, halyqaralyq týrnırlerde ózderiniń qarymyn baıqatyp, qatarǵa qosyldy. Rızabek Aıtmuhan ǵana elishilik irikteýde kúresken joq. Byltyr 19 jasynda eresekter arasynda álem chempıony atanyp, erkin kúresten tuńǵysh altyn medaldy keýdemizde jarqyratty. Al bıyl da sol jetistigin qaıtalap, jýyrda 20 jasqa deıingi jastar arasynda ótken álem chempıonatynda ánuranymyzdy shyrqatyp, abyroımen oraldy. Álemde teńdessiz balýan ekenin áıgilep, eki dúrkin chempıon atanǵan balýandy irikteýge qosqanymyz jón bolmaıdy. Rızabek 97 kg salmaqta elimizde ǵana emes, jer júzinde tegeýrindi ekenin áıgilep berdi», dedi R.О́mirálıev.

Byltyr Albanııada 23 jasqa deıingi jastar arasynda ótken álem chempıonatynan erkin kúres balýandary 1 kúmis medalmen oralǵan bolatyn. 61 kg salmaq dárejesinde otandasymyz Asyljan Esengeldi fınalǵa deıingi qarsylastary japon Kaıto Morıta, úndistandyq Akash Dahııa, qyrǵyz Taıyrbek Jumashbekulyn qapy qaldyrǵan. Fınaldyq beldesýde reseılik Bashır Magomedovke ese jiberdi.

Grek-rım kúresinen koman­danyń aǵa bapkeri Jańabaı Ospanov keminde 4 medalmen oralatynyn aıtady. «Álem chempıonatyna eshbir el osal balýanyn qospaıdy. Degenmen de bizdiń jigitter 55, 67, 77, 97 kg salmaq dárejesinde medal oljalaýǵa baryn salady. Árıne, ózge salmaqtaǵy balýandarymyz da osal emes. Eresekter dýyna qosylyp, óziniń talantyn kórsetip, tegeýrindi balýan ósip kele jatqanyn áıgilegen Din-Muhammed Qoshqar 67 kg salmaqta synǵa túsedi. 97 kg salmaq dárejesinde jastar arasynda Azııa birinshiligi men álem chempıonatynyń kúmis medalin oljalaǵan Iýsýf Masıevke senim artamyz», dedi aǵa jattyqtyrýshy.

Byltyr 23 jasqa deıingi balýandar arasynda ótken álem chempıonatynda J.Ospanov baptaǵan balýandar 1 altyn, 1 kúmis medal ıelendi. 55 kg salmaqta kúresken Ishar Qurbaev fınalda grýzııalyq Georgıı Tokhadzege ese jiberip, kúmis medaldy mise tutty. Bap­kerler Ishardyń fızıkalyq daıyndyǵy kem soǵyp, kúshi jadaý kúıinde kúreskenin aıtqan edi. О́ıtkeni byltyr jazda Ishar Iordanııanyń Amman qalasynda 20 jasqa deıingi jastar arasynda ótken álem chempıonatynda top jaryp, ánuranymyzdy shyrqatty. Jetisýlyq balýan elge kelgen soń jerlesteriniń qurmet-qoshemetine kómildi de ketti. Qazan aıynda ótken ekinshi álem chempıonatyna deıin ol óziniń babyna kelip úlgermedi.

Albanııada ótken álem chempıonatynda mereıimizdi asyrǵan Sultan Ásetuly 67 kg salmaq dárejesinde beldesip, jartylaı fınalda ázerbaıjandyq Hasan Mammadıdi aıqyn basymdyqpen jyqty. Aqtyq beldesýde túr­kııalyq Mustafa Iyldyrymdy alyp urdy. Byltyr Birikken kúres álemi (UWW) Sultandy qazan aıynyń úzdik balýany dep tanydy.

21-27 qazan aralyǵynda óte­tin álem chempıonaty balýan­dary­myzdyń keleshektiń enshi­sindegi dodalarda qanshalyqty qa­rym­dy bolaryn saralap bermek. Ulttyq qurama izbasarlary da osy dúnıejúzilik dodada aıqyn­da­lady.

Bıylǵy jazǵy Olımpııa oıyndarynda kúres túrlerinen balýandarymyz kózdegen mejeden kórine alǵan joq. Grek-rım kúresinen Demeý Jadyraev (77 kg) kúmis medaldy mise tutty. Er­kin kúresten 4 balýanymyz baryp, irikteýden asa almady. Al qyzdar quramasyna tipti joldama da buıyrmady. Balýandyq óner qanymyzda bar dep kúpin­genimizben, nátıje álgindeı bolyp tur.