Assambleıa quttyqtady

Keshe Astana qalasyndaǵy Táýelsizdik saraıynda 2015 jylǵy 26 sáýirdegi prezıdenttik saılaýda Memleket basshysy bolyp qaıta saılanǵan Elbasy N.Á.Nazarbaevtyń jeńisine arnalǵan Qazaqstan halqy Assambleıasynyń saltanatty jıyny ótti. Jıynǵa QHA músheleri, QHA Keńesi, Parlament depýtattary, respýblıkalyq etnomádenı birlestikterdiń jetekshileri, QHA Ǵylymı-saraptamalyq keńesiniń músheleri, BAQ ókilderi qatysty. Saltanatty jıyndy Qazaqstan halqy Assambleıasy Tóraǵasynyń orynbasary Eraly Toǵjanov ashyp berdi. Ol óz sózinde: «Qazaqstan halqy tarıhı tańdaý jasady jáne el damýynyń eń kúrdeli kezeńderinen memleketti senimdi túrde alyp shyqqan óziniń Elbasyna daýys berdi», – dedi. Sodan soń, Tóraǵanyń orynbasary O.Dymov, R.Halmýradov, A.Ahmetov, t.b. sóz sóılep, saılaýda erekshe belsendilik tanytqan azamattarǵa ózderiniń júrekjardy aqjarma tilekterin aıtty. Sharaǵa qatysýshylar keshegi ótken saılaý Qazaqstan halqynyń birligi men yntymaǵyn, olardyń aldaǵy kúnge degen nyq senimdiligin kórsetkenin jyr qylyp aıtyp otyrdy. Aıtpaǵanda she, daýys berýshiler sany el tarıhynda buryn-sońdy bolmaǵan rekordtyq kórsetkishke jetip jatsa?! – Qazaqstan halqy keleshek aldyndaǵy jaýapkershiligin sezine jáne halyq pen eldiń bıik múddesin eskere otyryp, azamattyq jáne patrıottyq paryzyn oryndaý maqsatynda tańdaý jasady. Bul tańdaý halyqtyń Kóshbasshysy – Elbasy Nursultan Ábishuly Nazarbaevtyń jeńisine aınaldy! Bul – Qazaqstan halqynyń jeńisi! – degen Assambleıa Tóraǵasynyń orynbasary E.Toǵjanov bul sózderdi erekshe tolqynyspen jetkizdi. Sondaı-aq, shara barysynda 40-tan astam Keńes músheleri men halyq qalaýlylaryna jáne etnomádenı birlestikterdiń jetekshilerine QHA-nyń 20 jyldyq mereıtoıyna oraı, merekelik medaldar tapsyryldy. Esterińizde bolsa, 2015 jyldyń 14 aqpanynda ótken Qazaqstan halqy Assambleıasy Keńesi otyrysynyń qorytyndysynda kezekten tys prezıdenttik saılaý ótkizý týraly bas­tama kóterilgen bolatyn. Raýshan TÁÝIRHANQYZY,  jýrnalıst.