Sýret: ru.freepik.com
Birikken kúres álemi (UWW) jazǵy Olımpııa oıyndarynyń baǵdarlamasyna enbegen salmaq dárejelerinen tórt jyldyq dodasy ótkennen keıin álem chempıonatyn uıymdastyrý jobasyn iske qosty. Bul – 2016 jyldan beri Olımpıada baǵdarlamasyna enbegen salmaq dárejesindegi balýandarǵa alaman uıymdastyrýdyń qamynan týǵan baılam. Alǵash ret 2016 jyly Majarstannyń astanasy Býdapeshtte ótkende Nurlan Bekjanov 70 kg salmaq dárejesinde kúmis júldeger atandy. Fınaldyq beldesýde jerlesimiz reseılik Magomed Qurbanálıevke ese jiberdi. Áıelder synynda Aıym Ábildına 55 kg salmaqta beldesip, qola medalmen oraldy. 8/1 fınaldyq synda polıak qyzy Roksana Marta Zasınany 6:1 esebimen yǵystyrdy, shırek fınalda ýkraınalyq Tatıana Kıtti qapy qaldyrǵan. Biraq jartylaı fınalda japon balýany Maıý Mýkaıdaǵa ese jiberdi. Al qola medalǵa beldesýde majarlyq Ramona Galambosty aıqyn utty. Aıym oǵan deıin de álem chempıonatyna tórt márte qatysyp, júldesiz qaıtqan edi.
Bul jolǵy álemdik dodaǵa 55 kg salmaqta Zýlfııa Iаhıarovaǵa senim artýdy jón sanapty bapkerler. Aıym búginde balýandyq mansabyn doǵaryp, bapkerlikke oıysyp, shákirt tárbıelep júr. Zýlfııanyń da esim-soıy jankúıerge etene tanys. Ásirese jasóspirim shaǵynda, jastar qataryna qosylǵanda jarqyrap kórindi. 2009 jyly jasóspirimder arasynda álem chempıonatynyń kúmis júldegeri atanǵanda mamandar talantty qyzdyń keleshegine orasan úmit artty. 20 jasynda Azııa chempıony atanǵan balýannyń bul sońǵy dodasy bolýy bek múmkin. 35 jasqa tolǵan balýandy yǵystyratyn jastardyń shoǵyry qalyń. Bıyl jazda Qyrǵyzstanda ótken Azııa chempıonatynyń qola júldesine beldesýde ózinen 15 jas kishi qyrǵyz balýanyna ese jiberdi.
Dıana Qaıymovaǵa bul – alǵashqy uly alaman. Onyń sporttyq mansabyndaǵy ázirge shyqqan bıigi – Azııa chempıonatynyń qola medali. Jastardan eresekter sapyna ótken balýanǵa bapkerler zor úmit artyp, álem chempıonatynda 59 kg salmaqta beldestirmek.
65 kg salmaq dárejesinde Irına Kazıýlınaǵa senim artylmaq. Azııa chempıonatynyń qola júldegeriniń tájirıbesi mol. Ǵalamdyq dodalarǵa qatysyp, ysylǵan balýan Albanııadan abyroımen oralýǵa sóz berip otyr.
72 kg salmaq dárejesinde álem chempıonatynyń úsh dúrkin (2 kúmis, 1 qola) júldegeri Jámıla Baqbergenova Tırana tórinde baq synaıdy. Olımpıada baǵdarlamasyna enbeıtin salmaq dárejesi 72 kıloda álem chempıony atanýǵa synyq súıem qalǵanda súrindi. 2021 jyly ǵalamdyq dodanyń fınaldyq synyna deıingi qarsylastaryn aıqyn utyp, álem chempıony ataǵyna beldesýde japon qyzy Masako Fýrýıchıge ese jiberdi. 2022 jyly da álem chempıonatynyń fınaldyq aıqasyna jetip, amerıkalyq Amıt Elorǵa jol berip, jeńisti ýystan sýsytyp aldy. Byltyr Serbııada ótken álem chempıonatynyń jartylaı fınalynda mońǵol balýanynan asa almady. Qola medal alý jolyndaǵy tartysta polıak qyzyn jeńdi. Qazaq qyzdary arasynan alǵash bolyp Jámıla álem chempıonatynyń úsh dúrkin júldegeri atandy. Azııa chempıonatynda úsh márte top jardy, sondaı-aq 1 kúmis, 1 qola medalin de enshiledi. «Meniń armanym – qyzdary arasynan alǵash bolyp álem chempıony ataný. Bıyl Parıj jazǵy Olımpıadasyna qatysýǵa barymdy saldym. Lısenzııalyq týrnırde joldama buıyrmady. Qandaı bolsyn jetistiktiń artynda qyrýar eńbek, ólsheýsiz tógilgen qajyr-qaırat jatyr. Bapkerler bıyl da 72 kg salmaqta maǵan senim artty, barymdy salamyn», dedi Jámıla Baqbergenova.
Erkin kúresten 61 kg salmaqta jastar arasynda álem chempıonatynyń qola júldegeri Asyl Aıtaqynǵa senim artylmaq. Bıyl eresekter dodasynda da ol óziniń áleýetin baıqatyp, qarymdy ekenin áıgiledi. Bishkekte ótken qurlyq birinshiliginiń fınalynda qyrǵyz Taıyrbek Jumashbekulyna ese jiberip, kúmis medal ıelendi. Olımpıadalyq baǵdarlamaǵa enbeıtin salmaqta turaqtaǵan Asyldyń da maqsaty – álem chempıony ataný. «Jazǵy Olımpııa oıyndaryna qatyspaǵan balýandardyń kópshiligi Albanııany betke alatyny anyq. Tipti Tokıo Olımpıadasynyń chempıony, álem birinshiliginiń jeńimpazy reseı-lik Zaýr Ýgýev te qatysýy múmkin degen boljam aıtyldy. AQSh-tan da tańdaýly balýan Vıtalıı Orýdjaev kelýi múmkin. Byltyr ótken álem chempıonatynda osy Orýdjaev fınalda álem chempıony reseılik Abasgadjı Magomedovti utty. Sondyqtan álemdik dodaǵa osal balýandar barmaıdy. Bizdiń de qanshalyqty shyńdalǵanymyz tarazyǵa tartylatyn sát – Tırana boz kilemi. Sondyqtan aıanyp qalmaımyz», degen Asyl Aıtaqyn bapkerler senimin aqtaýǵa umtylatynyn jetkizdi.
70 kg salmaqta álem chempıonatynyń kúmis júldegeri Nurqoja Qaıpanov beldesedi. Bul balýan Olımpıada baǵdarlamasyna engen 74 kg salmaq dárejesinde de baǵyn synap kórgen. Tipti bıylǵy Parıj jazǵy Olımpııa oıyndarynyń lısenzııalyq týrnırine de qatysyp, joldama oljalaı almaǵan soń, óziniń úırenshikti salmaǵyna qaıta oıysty.
79 kg salmaqta Dáýlet Ergesh kúreske túsedi. Eki jyl buryn jasóspirimder arasynda álem chempıonatynyń fınaldyq synynda súrinip, kúmis medaldy mise tutqan Dáýlettiń jolynan júlde kútetinderdiń de shoǵyry qalyń.
92 kg salmaqta Nurdáýlet Bekenov álem chempıonatyna qatysady. Jastar arasynda jarqyrap kóringen balýannyń ózin áıgileıtin mezeti Albanııada týmaq.
Grek-rım kúresinen balýandar álemdik dodada 55, 63, 72, 82 kg salmaq dárejesinde beldesedi. Iýrıı Melnıchenko bastaǵan bapkerlik quram kimderdiń qatysatynyn áli jarııalaǵan joq.
Dzıýdo: Jastardyń janatyn sáti
Qazan aıynda elimizdiń sportshylary dzıýdo kúresinen de mańyzdy dodaǵa qatysady. Aldymen jastar Tájikstan astanasy Dýshanbede álem chempıonatynyń júldesine beldesýge túsedi. 2-6 qazan aralyǵynda ótetin jahandyq dodaǵa 68 elden 541 balýan qatysady dep josparlanyp otyr.
60 kg salmaqta Talǵat Orynbasar, Aldııar Qarǵulov, 66 kg – Aqyljan Jubatqanov, Maǵjan Áljanov, 73 kg – Ádilet Almat, 81 kg – Azat Kúmisbaı, Dosbol Balǵabaı, 90 kg – Asqar Birjanov, +100 kg – Jantilek Nurtilekuly, aralas komandalyq saıysta Sherhan Alpanov kúresedi. Qyzdar dodasynda Sabına Iýldashbekova, Tasnım Abdýáli (48 kg), Aıaýlym Qaırat, Arýjan Erejepova (52 kg), Dana Ábdirova (57 kg), Kórkem Orymbek (63 kg), Ajar Ashat, Dıana Telbaeva (70 kg), Rýslana Mahatova (+78 kg) el senimin arqalamaq.
