«Atameken» ataýy qaıta oraldy

Ulttyq kásipkerler palatasynyń kezekten tys sezinde onyń ataýyn ózgertý týraly sheshim qabyldandy Keshe Astanada Ulttyq kásipkerler palatasynyń kezekten tys II sezi bolyp ótti. Oǵan Premer-Mınıstrdiń birinshi orynbasary Baqytjan Saǵyntaev qatysyp, sezd delegattaryna Prezıdent Nursultan Nazarbaevtyń joldaǵan quttyqtaý hatyn oqyp berdi. «Qurmetti sezd delegattary! Bizdiń elimizde 1 mln. 200 myńnan astam kásiporyn men jeke kásipker jumys isteıdi. Shaǵyn jáne orta bıznes salasynda 3 mln.-ǵa jýyq adam eń­bek­tenýde. Respýblıkanyń áleý­mettik jaǵdaıy olardyń ju­my­syna táýeldi. Otandyq naryq­tyq ekonomıkanyń negizin qu­raı­tyn kásipkerlikti damytý – Qazaqstannyń strategııa­lyq basymdyǵy. El ekonomıka­syndaǵy shaǵyn jáne orta bıznes úlesi 2050 jyly 50 paıyzǵa jetýi tıis. Alǵa qoıǵan bul mindetke qol jetkizý bıznes orta men memleket kúshin biriktirgen kezde ǵana múmkin bolady», delingen Elbasy sózinde. Sonymen qatar, Prezıdent sońǵy jyldary otandyq kásip­ker­likke qoldaý kórsetý men ınves­tısııa tartýǵa qolaıly sharttar jasalyp jatqandyǵyn da tilge tıek etken. «Teńdessiz jaǵdaılar jasaldy jáne búgingi naryqtyq jaǵdaıda mańyzy artyp kele jatqan jeke kásip­kerliktiń bas­tamalaryn qoldaý­dy qolǵa alý qajettiligi týyn­dady. Bul rette Ulttyq kásip­ker­ler palatasy mańyzdy ról atqa­rýy tıis. Ol ótken jyldyń ishin­de turaqty táýelsiz ınstıtýt retinde ózin kórsetti jáne bız­nes qaýymdastyq múddesin qor­ǵaý­da qyrýar jumystar atqardy. Búgingi kúni álemdik ekonomıkada ishki naryqqa áser etetin kúr­deli máselelerge tap bolyp otyr­myz. Bul bir jaǵynan jańa múmkin­dikterdi de týyndatady. Kásip­kerler palatasy eldegi kásip­ker­likti odan ári damytýǵa baǵyt­talǵan tıimdi sharalardy jasaý úde­ri­sine belsendi túrde aralasýda. Bul ózara qarym-qatynas áleý­e­ti kez kelgen qıyndyqtardy bas­tan ótkerýge múmkindik beredi», – de­lin­gen Memleket basshysynyń quttyq­taýynda.   Ulttyq kásipkerler palatasy – bıznes pen bıliktiń tıimdi áriptestigi negizinde kásipkerlikti damytý úshin qolaıly jaǵdaılardy qalyptastyrý maqsatynda Úkimet jáne «Atameken» Odaǵy» QUEP birlesken sheshimimen 2013 jyldyń 9 qyrkúıeginde qurylǵan, ózin-ózi basqaratyn kommersııalyq emes uıym ekeni belgili. Onyń negizgi qyzmetteri – kásipkerler quqyqtaryn qorǵaý jáne múddelerine ókildik etý, kásipkerlik belsendiliginiń, óńirlerdegi kásipkerlik qyzmet jaǵdaıynyń qoǵamdyq monıtorıngin júrgizý, kásipkerlikti qoldaý jáne damytý memlekettik baǵdarlamalaryna qatysý, otandyq óndiristi qoldaý jáne uıymdardyń satyp alýlarynda jergilikti mazmundaǵy úlesti arttyrý, tehnıkalyq jáne kásibı bilim berýdi damytý jáne kadrlardy daıyndaý, qaıta daıyndaý, biliktilikti arttyrý, sertıfıkattaý jáne attestattaý, kásipkerlik sýbektileriniń syrtqy ekonomıkalyq qyzmetin yntalandyrý, ınvestısııalardy tartý jáne ekonomıkany ártaraptandyrý bolyp tabylady. Sonymen qatar, Qazaqstannyń ındýstrııalyq-ınnovasııalyq damýynyń 2015-2019 jyldarǵa arnalǵan tujyrymdamasy aıasynda da UKP-nyń mindetteri zor. Al keshegi sezde palata ataýy ózgertildi. Delegasııa músheleriniń daýys berýimen palata ataýy biraýyzdan «Atameken» ulttyq kásipkerler palatasy dep atalatyn boldy. «Ulttyq kásipkerler palatasy «Atameken» ulttyq ekonomıkalyq palatasynyń zańdy jalǵasy ekenin bilesizder. О́z kezinde «Atameken» ulttyq ekonomıkalyq palatasy Qazaqstan Prezıdenti Nursultan Nazarbaevtyń bastamasymen qurylǵan jáne búgingi palatanyń irgetasy sol boldy. 2014 jyly kásipkerlerdiń yqpaldasýy, olardyń zańdy quqyqtaryn qorǵaý salasynda atqarǵan qyrýar jumysy «Atameken» UEP salyp ketken joldyń negizinde ǵana múmkin bolyp otyr. Sondyqtan Ulttyq kásipkerler palatasynyń ataýyn «Atameken» ulttyq kásipkerler palatasy dep ózgertý jóninde usynys aıtyldy. Mundaı ózgerister palatanyń tıisti jarǵylaryna engizýdi talap etedi», dedi Ulttyq kásipkerler palatasy prezıdıýmynyń tóraǵasy Tımýr Qulybaev. Taǵy bir aıta keterligi, sezde Reseı Federasııasynda palata ókildigin ashý týraly sheshim qabyldandy. Reseı Federasııasynda UKP ókildigin ashý usynysyn ortaǵa salǵan palata tóraǵasynyń orynbasary Raqym Oshaqbaev mundaı sheshimniń týyndaý sebebine toqtaldy. «Qazaqstannyń kásipkerlik qaýymdastyǵy múddesin tanystyrý boıynsha EEK-pen sapaly ózara árekettestik maqsatynda 2014 jyldyń qyrkúıek aıynanda UKP EEK-tegi óz ókildigin ashqan bolatyn. Onyń ashylýy bizge túrli baǵyttaǵy otandyq kásipkerlik máselelerin jedel sheshýge múmkindik berdi», dedi R.Oshaqbaev. Sondaı-aq sezde Ulttyq kásipkerler palatasy orta bıznes tóleıtin mindetti múshelik jarna mólsheriniń 50 paıyzǵa tómendegeni aıtyldy. Búgingi kúni mindetti múshelik jarna tóleýge jatatyn bıznes sýbektileri jyldyq jalpy tabysynyń kólemine baılanysty eki sanatqa bólinedi. Bul sanattar úshin 160 AEK jáne 4 400 AEK jarna tóleý belgilengen. Sezd barysynda delegattar birinshi sanat boıynsha qosymsha 6 ishki sanat belgileý, al ekinshi sanat boıynsha qosymsha 4 ishki sanat belgileý máselesin qarastyrady. «Múshelik jarnalarǵa qatysty qoldanystaǵy zań boıynsha bekitilgen gradasııalar ıkemsiz bolyp keldi. Olardy jetildirý qajettiligi týyndaǵan bolatyn. Zań normalaryna sáıkes mundaı jeńildikti tek Úkimet qarastyra alatyn. I sezden keıin biz Úkimetpen osy máselege qatysty keńes ótkizdik. Úkimet te, Parlament te muny qoldady. Bul ózgerister zańǵa engizildi», dedi UKP tóraǵasy Abylaı Myrzahmetov. Sondaı-aq, «KAZNEX INVEST» kompanııasynyń 50 paıyz aksııasyn «Atameken» UKP-nyń senimdi basqarýyna berý kózdelýde. Bul týraly «Atameken» ulttyq kásipkerler palatasynyń basqarma múshesi Rýstam Júrsinov málimdedi. Onyń aıtýyna qaraǵanda, UKP týraly zań boıynsha, palata kásipkerlikti qoldaý jáne damytý, syrtqy ekonomıkalyq qyzmetti atqarý, ınvestısııalardy tartý baǵytynda jumystardy atqara alady. Sonyń ishinde eksportty alǵa jyljytý boıynsha qyzmetterdi júzege asyrýǵa jáne halyqaralyq uıymdarmen iskerlik keńesterdi qurýǵa, Qazaqstanda jáne ózge memleketterde halyqaralyq kórmeler uıymdastyrýǵa quqyly. Ulttyq kásipkerler palatasynyń zańmen bekitilgen osy qyzmetterdi ulttyq damytý ınstıtýty – «KAZNEX INVEST eksport jáne ınvestısııalar boıynsha ulttyq agenttigi» AQ-ta qatar atqaryp júr. Bul kompanııa da qazaqstandyq eksportty damytý jáne qoldaý, tikeleı shetel ınvestısııalaryn tartý arqyly ulttyq ekonomıkany ártaraptandyrýǵa úles qosý úshin qurylǵan. Qazir aksıonerlik qoǵamnyń memlekettik aksııalar paketi Investısııalar jáne damý mınıstrliginiń quzyrynda. Basshylyqtyń tapsyrmasymen búgingi tańda «KAZNEX INVEST» kompanııasynyń 50 paıyz aksııasyn «Atameken» UKP-nyń senimdi basqarýyna berý múmkindigi qarastyrylýda. Bul qadam memleket atqaryp jatqan qyzmettiń sapasyn jáne korporatıvtik basqarý deńgeıin edáýir arttyrýǵa septigin tıgizedi, aksııalardy senimdi basqarýǵa berý UKP-nyń shyǵyndaryn arttyrmaıdy dep kózdelýde. Dınara BITIKOVA, «Egemen Qazaqstan».