– Halyqtyń referendým ýchaskelerine kelip, azamattyq únin bildirýine qolaıly jaǵdaı týdyrý maqsatynda barlyq múmkindikti paıdalandyq. Ákimdikter janynan Sall-ortalyqtar quryldy. Árkim óziniń tizimde bar-joǵyn arnaıy Telegram-bot arqyly tekserý múmkindigine de ıe boldy. Komıssııa músheleri biliktiligin udaıy arttyryp otyrdy. Referendým kezeńinde múgedektigi bar adamdardyń daýys berýin qamtamasyz etý úshin barlyq ýchaske pandýstarmen, qajetti quraldarmen jabdyqtaldy. Daýys berý kezinde oblys boıynsha 6 ınvataksı qyzmet kórsetti, – deıdi Ulytaý oblysynyń aýmaqtyq referendým komıssııasynyń tóraǵasy Almas Nysanbaev.
Halyqtyń daýys berýge degen belsendiligi birden-aq baıqaldy. Aıtalyq, tús áletinde oblystaǵy daýys berýge tirkelgen azamattardyń 43,31%-i tańdaýyn jasap úlgerdi. Solardyń biri – Halyq ártisi, Ulytaý oblysynyń qurmetti azamaty, S.Qojamqulov atyndaǵy Jezqazǵan mýzykalyq-drama teatrynyń akteri Dosjan Janbotaev boldy.
– Bul – meniń ómirimdegi besinshi referendým. Eń alǵashqy qatysqan referendým 1991 jyly KSRO taǵdyryna baılanysty bolǵan edi. Bul jolǵy referendýmǵa eldiń erteńgi ekonomıkalyq damýynyń tetikteriniń birine qatysty suraq qoıylǵan. Referendým maǵan sonysymen erekshe kórinedi. Qazirgi ýaqyt sát saıyn sony jańalyqtaryn usynyp jatqany belgili. Búgingi jańalyq erteń eskirip jatady. Sondyqtan bizge alysqa kóz tastaý, tereńnen oılaný abzal. Men ózim tirkelgen №220 ýchaskede daýys bergende, halyq tarapynan belsendiliktiń joǵary ekenin baıqadym. Bul meni qýantty. О́ıtkeni eldiń taǵdyryna ózimiz beıjaı qarasaq, ne bolady? – dedi Dosjan Ábdirálimuly.
Jezqazǵan
