Sýretti túsirgen – Erlan OMAR, «EQ»
Qazir qalada tursa da sánnen qalmaıtyndar bar. Sońǵy jyldary el nazary jeti qazynanyń birine aýyp, tushymdy taqyrypqa aınalǵaly qoly jetken jurt taza qandy tóbet, qaqpan bel tazy ustaýǵa kóshken. Ermekbaı da sondaı adamdardyń biri.
– Ań qaǵasyń ba? – dep suradyq biz, – aýyzdanǵan tazy ma?
– Joǵa, kúshik kezinen beri baılaýly tur.
– Apyrmaı, jelmen jarysqan júırik ıttiń kıesi bar emes pe? Saıyn dalanyń sánine aınalǵan qaıran tazyny qor qylyp shynjyrǵa baılap qoıǵanyń ne?
– Ara-tura úıge qonaq kelgende kórsetýge jaqsy, – dep qarq-qarq kúldi Ermekbaı, – kúshik kezinen attyń tizesine úıretý kerek dep edi ańshylar, oǵan at joq. Ańǵa da shyǵyp jatqan joqpyn. Sán úshin ǵoı, sán úshin. Endi bir tóbet alsam ba dep oılanyp júrmin.
Mánsiz áńgimeni ári qaraı sozýdyń reti joq edi. Tek sán qýǵannyń jóni osy eken dep, jalpaq dalada bula ósken tazy men tóbetti shynjyrlap baǵyp, bosaǵaǵa baılap, telmirtip qoıǵannyń nesi jaqsy? Júni jyǵylyp, kózderi móldiregen, týmysynda qoltyǵyn sógip bir júgirip kórmegen qaıran tazyny osylaı qorlaǵany adamshylyqqa jata ma?
Kókshetaý
