Mádenı májilis Jylqybaı Jaǵyparulynyń ómir joly baıandalǵan vıdeo-materıaldan bastaldy. Jazýshylyqtyń serti men dertin sóz etken qalamgerdiń úni muraǵat taspasynan bylaı dep jańǵyrdy: «Qolyma qalam ustap, jýrnalıst atanǵan osy bir jyldar ishinde, jalǵandy jazǵam joq. Jeke bastyń múddesi úshin bázbireýlerdi maqtap, arzan bedel de jımadym. Qolymdaǵy qarýym – qalamymmen, tún uıqymdy tórt bólgen azabymmen qarapaıym halqymnyń qasiretin azaıtyp, qadirin arttyrýdy arman ettim». Onyń estelikke aınalǵan osy bir dıdary men daýysy kópshilitiń kóńilin bosatty.
Ádilet pen adaldyqty tý etken azamattyń kisilik kelbeti haqynda «Qazaq gazetteri» JShS Bas dırektorynyń orynbasary, jýrnalıst Qambar Ahmetov sóz sóıledi.
«Jylqybaı Jaǵyparuly sanaly ǵumyryn qazaq baspasóziniń ósip-órkendeýine arnady. Irgeli basylymdarda jemisti qyzmet etti. Sonyń biri ózi qyzmet etken «Egemen Qazaqstan» gazeti úshin ol kisiniń orny erekshe. Onyń ókpeni qysqan ótpeli kezeńdegi jasaǵan qaıratkerligi árbir azamatqa úlgi. Ásirese, Aqmola óńirindegi qazaq mektepteriniń kóbeıýi tikeleı Jylqybaı Jaǵyparulynyń eńbegi dep bilemiz. Onyń «Zar-nala», «Kek», «Qarasart» povesteri – ult taǵdyryn sheber sýrettegen shyǵarmalar. Keleshekte osy týyndylar negizinde kórkem fılm túsirilse artyq etpeıdi. Oǵan shyǵarmalardyń dramalyq áleýeti jetip-aq tur. Eshkimdi jatyrqamaı, jatsynbaı, ár qazaqty baýyryndaı súıgen Jylqybaı aǵanyń arly amanaty – barshamyzǵa ortaq paryz dep esepteımin», dedi Q.Ahmetov.
Jazýshy Ádilbek Ybyraıymuly avtordyń «Qarasart» pen «Zar-nala» shyǵarmalarynyń sıýjettik qurylymyna toqtalyp, kórkemdik sıpatyn baıandady.
Jazýshylar odaǵynyń Astana qalasyndaǵy fılıalynyń dırektory Dáýletkereı Kápuly Jylqybaı Jaǵyparulynyń shyǵarmalaryn ádebıettanýshylarǵa zertteý nysany retinde usyný kerektigin jetkizdi.
Al «Arqa ajary» gazetiniń ardageri Rahııa Álibekova áriptesiniń adamgershilik, qalamgerlik qasıetterin, eńbekqorlyǵyn erekshe atap ótti.
Jıyn sońynda jazýshynyń jary Qarlyǵash Jaǵyparova joldasynyń shyǵarmashylyq murasyn nasıhattaýda eńbek etip júrgen azamattarǵa alǵys aıtyp, oqyrman qaýymǵa ystyq yqylasyn jetkizdi.
Aıta keteıik, osydan bir aı buryn jazýshynyń ómiriniń sońyna deıin turǵan úıdiń qabyrǵasyna eskertkish taqta ornatylǵan edi.
