Jol kórsettim úıde otyrǵan qyzdarǵa

Janar Baıbolovamen júz­desýdiń sáti oıda-joqta tús­ken. Ortalyq kommýnıkasııalar qyzmetinde «jasyl» ekonomıkaǵa qatysty ótken brıfıngte shaǵyn nesıe alyp, eko­sómke jasaýshy ká­sip­ker qyz tanystyryldy. Kópshilik aldynda qy­sylyp-qymtyrylǵany jú­­­zindegi jumsaq jymıysy­nan kórinip turǵan, uıań kelgen, boıynan qazaqy tárbıe esken, janǵa jaıly jibek jeldiń samalyndaı mańaıyna jylylyq nuryn sepken zamandasymmen tanysyp, jaqyn áńgimelesýdi oıǵa túıdim. Alǵashqy alǵan áserimniń aldamaǵanyn onymen sóılesken sátten-aq ańdadym. Jas qaıyńdaı ıilgen boıynan ıbanyń, úlken­nen alǵan ulaǵattyń nury men­­mundalap ózine tartatyn J.Baı­bolova: «Kúpi kıgen qazaqtyń qara ­óleńin, shekpen jaýyp ózine qaıtaramyn», dep Muqaǵalı aqyn jyrlaǵandaı keshegi analarymyz qolynan shyq­qan qarapaıym qorjyn, boq­sha­lardy osy ómirge laı­yqtap, ekologııalyq taza ónim­derden tigip, qazirgi sán­men ádip­tep, ekosómke tigip shy­ǵarýdy ózi­ne kásip etipti. – Meniń negizgi mamandyǵym – zańger, biraq tegimde osy qolóner barlyǵynan shyǵar, ári anamnyń kásipkerligi úlgi boldy ma, osy ju­mysty bastadym. Al nege sóm­ke deseńiz, ol – áıel adamnyń kúndelikti qasynan tastamaıtyn qajet zaty. Qazirgi naryqtaǵy sómkelerdiń 80 paıyzy Qytaıdan ákelinedi de onyń sapasy men densaýlyqqa tıgizer zııanyn qaperge alyp jatqan jan joq. Al áıeldiń osyndaı buıymynyń ekologııalyq tazalyǵynyń kem­digi onyń densaýlyǵyna keri áserin tıgizedi, endeshe, urpaqqa da ákeletin qosalqy salqyny bar degen sóz. Men sol sebepten sómkeni birneshe turǵydan alyp qarastyrdym. Birinshiden, ekotazalyǵy desek, ekinshiden, ulttyq ónerdiń jańarýy, úshinshiden, jaılylyǵy, tór­tinshiden, sapalylyǵy syndy parametrlerdi eksheı kelip, bız­nes-jospar jasap, jobaǵa qa­tysyp, grant alýǵa umtyldym. Baǵym janyp, jeńimpaz atanyp, «Koka-kola» belesteri – 2014» jobasynyń 720 myń teńge grantyna ıe bolyp, óz kásibimdi ashtym. Osylaısha buryn qolóner túrinde jasap júrgen isim kásibı turǵydaǵy eńbekke jalǵasty. Qarajat alýdyń nátıjesinde óndiriske qajetti tigin mashınalaryn, bylǵary jáne metall aksessýar, fýrnıtýralardy satyp aldym. Sosyn daıyn taza matalardan sómkeler tige bastadym, endi qazaqtyń oıýyna til bitirip, ony qazirgi sán úlgilerine laıyqtap ádemi de ásem etip sómkeler shy­ǵarýdy qolǵa alýdamyn. Sol úshin kóp oqyp, izdenip, dızaınerler kómegine de júginýdemin. Sebebi, qazaqtyń oıýlarynyń mazmuny men maǵynasy bar. Oıýlardy ornymen qoldanbasa, eldi shatastyryp, kúlkige qalýǵa da bolady, – deıdi ol. Qazir onyń sómkesine qyzyǵý­shylar kóbeıipti, arnaıy tapsyryspen, ózderi usynǵan dızaınmen tigip beresiz be deýshiler de tabylyp jatyr eken. Jalpy, qaı jumys ta shyǵarmashylyq izdenisti talap etedi, al J.Baı­bolova sómkeleriniń pishini já­ne úlgisimen qatar, olardyń meılinshe uzaq qyzmet etýin de qalaıtynyn aıtady. Sondyqtan negizin quraıtyn qalyby salmaq kóterýge shydamdy, ári jýyp alýǵa da keletin bolsa, ári sapasy aqsamasyn dep kóp izdenetin kórinedi. «Shúkir, izdenisterim tekke ketip jatqan joq, sonyń arqasynda klıentterim kóbeıip keledi», deıdi kásipker. – Tapsyrys ulǵaıýymen jumys qolynyń tapshylyǵy da sezilip qaldy, buryn ózim, anam jáne inim bolyp jasap kelgen óndiristi endi ulǵaıtýdy josparlap otyrmyn. Sóıtip, aýyldaǵy 2-3 áıeldi úıretip, oqytyp, tájirıbemdi bermekpin. Sonda ónimniń sanyn da arttyratyn bolamyz, – deıdi J.Baıbolova. Kásipkerdiń shyǵarma­shy­lyǵynan týyp, qolymen jasalǵan buıymdardyń sany da ájeptáýir. Sándi qol­sómkeler, klachter, ámııan­darmen qatar, kúndelikti ustaıtyn sóm­keler kóz tartady. Maǵan vı­zıttik kartochkasyn usynyp: «Blogymda daıyn ónimderimniń úlgileri bar, qarap tanysarsyz, qazir sómkelerimdi Almatydaǵy «Zvenıashıe kedry» fırmalyq dúkeninen satyp alýǵa bolady, al keleshekte ınternet arqyly da tutynýshylarǵa jetkizetin bolamyz, jaqynda ınternet dúkenimiz ashylady», degen qymsyna jy­mıǵan Janar. – Árıne, ózim zańger bol­ǵandyqtan, keleshekte taýar bel­gisin tirkeý, avtorlyq jumys bolǵandyqtan, kýálik alý tárizdi jumystar turǵanyn bilemin, jalpy, kásipker adamnyń kózi ashyq, kókiregi oıaý bolýy tıis. О́ıtkeni, ýaqytqa saı tirlik etip, zamannan qalmaı, keıde onyń aldyna túsip otyrsań ǵana tabysqa jetesiń. Eger men Qazaqstanda buryn sómke jasaý isi jolǵa qoıylǵan bolsa, osy isti bastamas edim, osy turǵydan alǵanda men alǵashqy qarlyǵashpyn. Bálkim, osy qada­mymmen qolynyń ıkemi bar, biraq ne qylaryn bilmeı, qalaı qarajat tabaryn bilmeı otyrǵan áldebir zamandasyma jol kórsetip otyrǵan shyǵarmyn. Qazaq qyzdary ónerli, ismer emes pe, – degen J.Baıbolovaǵa alar asýlaryń, baǵyndyrar bıik­teriń kóp bolsyn, dep tilek aıttyq. Anar TО́LEÝHANQYZY, «Egemen Qazaqstan». ASTANA.