Qazaqstan Jazýshylar odaǵynyń Atyraý oblysy boıynsha ókili Álııa Dáýletbaevanyń aıtýynsha, «Atyraý tolqyndary» dep atalatyn jobaǵa jergilikti ákimdik qoldaý bildirip otyr. Qyrkúıek aıynda ult rýhanııatyn baıytýǵa mol úles qosqan on qalamgerdiń aýdıokitaby shyqqan.
Bul joba aıasynda belgili aqyn-jazýshylardyń týyndylary aýdıokitap túrinde Iаndeks portalynyń «Iаndeks-kitaptar» platformasyna júkteledi. Atalǵan portalmen 5 jylǵa kelisimshart jasalypty.
«Jyl sońyna deıin 30-ǵa jýyq aýdıokitapty «Iаndeks-kitaptar» platformasyna júkteý kózdelip otyr. Aýdıokitapqa qalamgerlerdiń eń tańdaýly týyndylary irikteldi. Onyń ishinde XV ǵasyrdaǵy joryq jyraýy Qaztýǵan Súıinishulynyń, aldaspan jyrdyń aqbereni Mahambet О́temisulynyń, zar zaman aqyny Murat Móńkeulynyń shyǵarmalary bar. Bul lekte ómirden erte ótken Marat Otaralıevtyń, poezııadaǵy ózindik únimen el jadyna jattalǵan Farıza Ońǵarsynovanyń týyndylarynyń aýdıonusqasy jazyldy. Ekinshi dúnıejúzilik soǵystan keıin aqsha bult aqyn atanǵan Ábý Sársenbaev, «Jaman Jáýtik» romanymen oqyrman yqylasyn aýdarǵan Esenjol Dombaev qaldyrǵan týyndylardyń aýdıokitaby oqyrman yqylasyn týdyratyny daýsyz», deıdi Álııa Dáýletbaeva.
Sondaı-aq óner zertteýshisi, kompozıtor, Qazaqstannyń Eńbek Eri Ilıa Jaqanovtyń, tanymal qalamger Marat Májıtovtiń, Qazaqstan Jazýshylar odaǵynyń basqarma tóraǵasy Mereke Qulkenovtiń, Nurlan Qamı shyǵarmalarynyń aýdıonusqasy kásibı stýdııada jazylǵan. Bardtyq ónerdi keńinen nasıhattaǵan Tabyldy Dosymov pen jas qalamger Baqytgúl Sármekovanyń shyǵarmalarynyń aýdıonusqasy bar.
«Aýdıokitapqa tek kórkem shyǵarmalardy engizýmen shektelmeımiz. Aldaǵy ýaqytta pýblısıstıkalyq, tanymdyq týyndylarǵa nazar aýdarylady. Aýdıonusqadaǵy osyndaı shyǵarmalardy oqyrmanǵa usynýdy josparlap otyrmyz», dedi Á.Dáýletbaeva.
Atyraý oblysy
