Nursultan Nazarbaev daýysyn Nursultan Nazarbaevqa berdi

Semeılik saılaýshylar boz-ala tańnan saılaý ýchaskelerine jarysa keldi desek artyq emes. Tańǵy saǵat 7-den bastap qala ishindegi barlyq baǵyttaǵy avtobýs, baǵytty taksıler turǵyndarǵa tegin qyzmet kórsetkendikten saılaýǵa belsendilik erekshe boldy. Azamattardyń mańyzdy naýqanǵa qatysý belsendiligin arttyrý maqsatynda jolaýshylar tasymalymen aınalysatyn kásiporyndar basshylyǵy tegin tasymaldaıyq degen sheshimge kelgen eken. Osylaısha olar azamattardyń óz saılaý ýchaskelerine esh kedergisiz jetýin qamtamasyz etip, saıası naýqandy uıymdastyrýǵa úles qospaq nıetterin bildirip, buǵan jergilikti halyq rıza boldy. Kóterińki kóńil kúıde tańmen talasa saılaý ýchaskelerine kelgenderdiń eń alǵashyqysy №42 mekteptiń oqýshysy, 18 jasqa endi tolǵan Nursultan Nazarbaev boldy. Tańǵy saǵat 7.00-de №164 saılaý ýchaskesinde daýys bergen Nursultan Nazarbaev bul óziniń tuńǵysh ret daýys berýi ekendigin aıtyp, qýanyshymen bólisti. – Otbasymyzda barlyǵymyz saılaýǵa belsene qatysamyz dep keshe naqty sheshim qabyldadyq, – dedi Nursultan Nazarbaev, – anam Kúlánda Tókenbaeva ekeýmiz mine, osy sebepti saǵat tańǵy jetiden alǵashqy bolyp saılaý ýchaskemizge kelip daýys berdik. Munda barlyq jaǵdaı jasalǵan, áýezdi án, úlkendi syılap, kishige izet kórsetý sııaqty ádeptilikti barlyǵy saqtaýǵa tyrysyp jatyr. Árkim óz tańdaýyn jasaýda. Men, árıne, ózimniń aty-jónim Nursultan Nazarbaev bolǵandyqtan, bul saılaýdyń halyq bolashaǵy úshin mańyzdy ekendigin tolyǵymen uqtym. Mekteptegi ustazdarym da, ásirese, dene tárbıesi pániniń muǵalimi Batyr Myrzabekovti erekshe atap ótýime bolady, saılaýdyń mán-maǵynasyn biz sııaqty jastarǵa keńinen túsindirdi. Sondyqtan da mine, ózderińiz baıqasańyz, saılaýǵa qatysýshy 18-19 jastaǵy jastardyń da qatary qalyń. Men óz daýysymdy Elbasy Nursultan Nazarbaevqa berdim. – Árkim óz qalaýynsha daýys berýde, – deıdi senimdi ókil, ardager-aqsaqal Saǵyndyq Beısenbaev, – №160 saılaý ýchaskesine eń alǵashqylardyń biri bolyp «Qazaqstan barysy» Aıbek Nuǵymarov kirip kelgende, daýys berýshilerdiń barlyǵy rıza bolyp, qol soǵyp, qoshemettedi. Tek el aldynda júrgen tanymal, bedeldi adamdar ǵana emes, demalys úılerinde, emhanalarda, qatynaýy qıyn eldi mekenderde jatqan qarapaıym eńbek adamdaryn da osy saılaýǵa atsalysýlary úshin uıymdastyrý sharalaryn tyńǵylyqty júrgizdik. Barlyq másele jan-jaqty qarastyrylǵan. Sondaı-aq, aýrý-syrqaýly, júrip-turýy qıyn adamdar úshin kóshpeli jáshikter jumys isteýde. №160 saılaý ýchaskesindegi birneshe kabınalarda eshqandaı irkilis, kidiris, bóget joq. Sondaı-aq, biz bolǵan №22 mektepte ornalasqan №175 saılaý ýchaskesinde de saılaýshylardyń qatary tolastamady. Solardyń biri oblystyq Abaı atyndaǵy ámbebap kitaphana qyzmetkeri Sholpan Úbiǵojaqyzy saılaýǵa belsene qatysýshylardyń biri retinde osyndaǵy uıymshyldyqqa rıza boldy. Al Semeı qalasynyń ákimi Aıbek Kárimov Semeıdegi №260 saılaý ýchaskesinde ózi qalaǵan kandıdatqa daýys berdi. – Biz úshin Qazaqstannyń turaqtylyǵy men gúldenýi eń mańyzdy másele. Jyldan-jylǵa órkendep kele jatqan elimizdiń erteńgi damýyn qamtamasyz ete alatyn kandıdatqa daýys berdim, ol meniń azamattyq paryzym, – dep qala ákimi óz oıymen bólisti. Raýshan NUǴMANBEKOVA. Semeı