Qamqorlyqqa rızashylyq

Qaraǵandy oblysynda buryn-sondy bolyp kórmegen sý tas­qyny ásirese, selolyq okrýgimiz aýmaǵyndaǵy Jumabek aýyly tur­ǵyndaryna aýyr soqty. Jan-jaqtan jóńkilgen seldiń aldy osy jerdi basyp ótken bolatyn. Oblys, aýdan tarapynan shuǵyl sharalar qoldanýdyń arqasynda boljap bolmas qaterdiń beti qaıtaryldy. Alaıda 17 úı qyzyl sýǵa kólkip, mal-múlik shyǵyny oryn aldy. Qazir jaǵdaı ońalyp keledi. Tabıǵat qysymynan zardap shekken otbasylar azyq-túlikpen, kıimmen, tósek-orynmen der kezinde qamtamasyz etildi. Bul kúnde árbir úı ıesinen búlingen turmystyq zattar tizbesi alynyp, ornyn toltyrý qarastyrylyp jatyr. Aýyl turǵyndarynyń osyndaı qysylshań shaqta ózderine kómekke kelip, qamqorlyq ja­saýshylarǵa razylyǵy erekshe ekenin jetkize ketý durys kórinedi. «Qazagromarketıng», «QazMunaıGaz» AQ oblystyq fılıaldary, Abaı aýdandyq kásipkerler palatasy sııaqty uıymdar alǵashqylardyń biri bolyp qol ushyn sozdy. Oǵan jergilikti kásipkerler de qosylyp, kómek-qoldaý kólemin odan saıyn ósirdi. Máselen, Aqparjan Tumabaev baspanasyn sý shaıyp ketken otbasyǵa ýaqytsha turýǵa óziniń bos turǵan úıin berse, Farıda Ańsarova, Nesipkúl Lııasova, Rıma Shın, taǵy basqalary aýyldas­tarymen qoldarynda barymen bólisýde. Bul kúnde qıyndyq beti tolyǵymen qaıtty. Aýdan ákimi Serik Shaıdarovtyń uıym­das­tyrýymen aımaqtaǵy iri kásiporyndar demeýshilikke tartylyp, olar birneshe úılerdi, qoralardy qalpyna keltirýdi óz moıyndaryna aldy. Bir úıdiń jańadan salynýy bastalyp ta ketti. Adamdardyń bir-birine baýyr­maldyǵy, qıyndyqtardy birlesip kóterýge yntasy, kómek­ke daıyndyǵy, memlekettik naq­ty qamqorlyq shýaǵy qadirin sý tasqyny zardabyna ushyraý­shylardyń óz bastarynan sezinip, soǵan degen shynaıy rıza­lyq saılaýǵa belsendilikpen qaty­sýlary arqyly bilindi deýge bolady. Selolyq okrýgimizde daýys berý burynǵydan da joǵary deńgeıde ótti. Janat JUMADIL, Qurma selolyq okrýginiń ákimi. Qaraǵandy oblysy, Abaı aýdany.