Foto: Mádenıet jáne aqparat mınıstrligi
Horeograf Djordj Balanchınge arnalǵan bul baıqaý 8-10 qarasha aralyǵynda Kýtaısıde ótti. Oǵan Qazaqstan, Latvııa, Grýzııa, Estonııa balet mektepteriniń ókilderi qatysty. Bedeldi óner dodasynda «Gúlder» ansambliniń birqatar talantty ártisteri baq synap, «Halyq bıi» jáne «Qazirgi zamanǵy horeografııa» nomınasııalarynda qazaqstandyq horeograftardyń qoıǵan nómirlerin usyndy.
Ansambl músheleri qazaq horeografııasynyń sulýlyǵy men tereńdigin álemdik sahnada tanyta otyryp, Qazaqstannyń mádenıetin joǵary dárejede kórsete aldy. Ártisterdiń kásibı sheberligin qazylar alqasy joǵary baǵalady.
Aqqanat Smaǵulova, Ánel Jumadildına jáne Rústem Ámirbekov úsh birdeı birinshi oryndy jeńip aldy. Al ekinshi oryndy Alan Muhtar ıelendi.
Baıqaýǵa ónerpazdardy «Gúlder» ansambliniń bas baletmeısteri Anvara Sadyqova men Alıla Alısheva, Gúlnara Saıtova, Almat Shamshıev, Ásel Abakaeva, Ámına Samarbaeva, Aıdar Ahmadıev jáne Dana Qýanyshbekova sııaqty tájirıbeli pedagog-horeograftar daıyndap, jetekshilik etti. Qazaq halqynyń ulttyq ereksheligin aıshyqtaıtyn sahnalyq kostıýmderdi Ásel Luqpanova men Natalıa Protasova daıyndady.
