Aqtaý garnızony baspasóz qyzmetiniń habarlaýynsha, «Batys» óńirlik qolbasshylyǵy teńiz jaıaý áskerleri brıgadasynyń jáne materıaldyq-tehnıkalyq qamtamasyz etý bazasynyń 576 jas sarbazy naqty urys qımyldaryna barynsha jaqyn jaǵdaıda oqýdan ótip jatyr.
– Tank júrgizip, synaqtan ótý jaýyngerlerdi jaqyn qashyqtyqtaǵy urys jaǵdaıynda jaýdyń saýytty tehnıkasymen kúresý ádisterin úıretýge múmkindik beredi. Jattyǵýdyń psıhologııalyq turǵydan qıyndyǵyna qaramastan, jaýyngerlerdiń bári kedergilerdi eńsere bildi, – dep atap ótti batalon komandıriniń orynbasary kapıtan Ratbek Qýatbekov.
Qıyn tapsyrmany bastamas buryn sarbazdar shartty qarsylastyń tankterimen kúresýdiń negizderin ıgerdi. Sondaı-aq olarǵa ártúrli urys jaǵdaıynda tankke qarsy granatalardy jáne qarý-jaraqty saýytty mashınalarǵa qarsy qoldaný erejeleri men tásilderi túsindirildi.
– Tańerteńnen bastap kedergiler jolaǵyna shyqtyq. Aldymen Kalashnıkov avtomatyn bólshektep, jınadyq. Sodan keıin lastanǵan aımaq pen tikendi symdy eńserip, 20 kılolyq júkpen júrip óttik. Sabaq tankterdi júrgizýmen aıaqtaldy. Alǵan áserimdi sózben aıtyp jetkizý qıyn. Muny ózińiz sezinýińiz kerek, – deıdi Aqmola oblysynan shaqyrylǵan Davıd Masserov.
Jas jaýyngerler kýrsty 23 qarashada aıaqtap, sosyn áskerı ant berip, teńiz jaıaý áskerleriniń shabýyl batalondaryna jiberiledi.
Mańǵystaý oblysy
