Tarıhtyń tereńinen talaı-talaı túpsiz tuńǵıyqtardy keship kelip, tuǵyrly tý kótergen tolaǵaı táýelsizdigimizdiń 24 jylynyń taǵy bir tańy araılap atty. Sáýir týsa da táýir bolmaı, qysqy syzynan aryla almaı turǵan Arqanyń aýa raıy búgin ashýynan alabóten arylyp, kún nury shýaǵyn molynan shashyp turdy. Elimizdiń aıbary, eldigimizdiń aıǵaǵy Astanaǵa shuǵylaly kóktemniń kelgenin 29 sáýirde shashyraı tógilgen mol shýaq shattana pash etti.
Saǵat týra 10.50 bolǵanda Qazaqstan halqynyń biraýyzdy qalaýymen saılanǵan Prezıdenti Nursultan Nazarbaev Aqordadan shyǵyp, Táýelsizdik saraıyna aparatyn avtomobıline otyrdy.
Qazaqstan Respýblıkasynyń Prezıdenti 1991 jyly alǵash ret ant bergen edi. Bul saltanatty rásim osy jyldyń 10 jeltoqsany kúni Almatydaǵy Respýblıka saraıynda ótken bolatyn. Ol kez KSRO ydyrap, egemendik alǵan elder qatary kóbeıip kele jatqan kezeń edi. Qazaqstan bul kezde Memlekettik táýelsizdik tabaldyryǵyna qadam basyp úlgergen bolatyn. N.Nazarbaev sol joly, ant berip turyp, elimizdi jarqyn bolashaqqa bastar joldyń ońaı bolmaıtynyn aıtqan edi. Sodan bergi nebir aýyr jyldarda ol alǵan baǵytynan taımaı, elimizdi talaı qıyndyqtardan alyp shyqty. Qazaqstan memlekettiligin damytýdyń basty basymdyqtary sol kezderi anyqtaldy.
1999 jyly Qazaqstan halqy joǵary senim mandatyn taǵy da Nursultan Nazarbaevqa tabystady. Prezıdent Qazaqstan Respýblıkasynyń Konstıtýsııasyn ustap turyp, ant berdi. Bul jolǵy ulyqtaý rásimi elimizdiń jańa elordasy – Astana qalasynda ótti. Elordalyq mártebesi bolǵanymen, astanaǵa tán jetistikterge áli qol jetkize qoımaǵan shahar endi-endi ǵana ósip-órkendeı bastaǵan. Sodan beri Astana adam tanymastaı bolyp ózgerdi. Bul jyldary Qazaqstannyń álemdegi bedeli de artyp, qoǵamda turaqtylyq nyǵaıyp, ekonomıkada damý qarqyny údeı tústi.
Osyndaı jetistikterge qol jetkizip otyrǵan qazaqstandyqtar 2005 jylǵy jeltoqsannyń 4-inde kezekti prezıdenttik saılaý ótkizdi. Nursultan Nazarbaev taǵy da Qazaqstan halqynyń basym kópshiliginiń senimine ıe bolyp, aıqyn jeńiske jetti. Bul sanaly tańdaý bolatyn. Sebebi, Memleket basshysy júrgizip otyrǵan saıasat nátıjeli jáne jemisti edi.
Prezıdenttiń úshinshi ınaýgýrasııa rásimi elimizdiń qazirgi zamanǵy tarıhynda erekshe oryn aldy. Bul rásim Esildiń sol jaǵalaýyndaǵy jańa qalada, Prezıdenttiń jańa Aqorda saraıynda ótti. Memleket basshysyn ulyqtaý rásimin Qazaqstan tarıhyndaǵy aıryqsha mańyzdy oqıǵa deý kerek. Bul is-sharanyń elimizdiń halyqaralyq qoǵamdastyqtaǵy bedeli men ustanymdaryn kúsheıtý turǵysynda úlken saıası mańyzy bar.
Qazaqstan Respýblıkasynyń Prezıdentin ulyqtaý rásimi elordamyz Astanada osymen tórtinshi ret ótip otyr. Nursultan Nazarbaevtyń sándi motosıklshiler eskortynan turatyn saltanatty korteji bas qalanyń ásem ǵımarattary men úıleri oryn tepken úlken kóshelerimen ótti. Aspanmen talasqan árbir sáýlet týyndysynyń boıynda Elbasynyń qoltańbasy bar. Kórseń kóziń toımaıtyn osynaý ásem ǵımarattardyń salynýyn N.Nazarbaev tikeleı óziniń nazarynda ustap otyrdy. Sondyqtan da Elbasy men elorda túsinikteri táýelsiz qazaq shejiresinde egiz uǵymǵa aınaldy.
Elbasynyń saltanatty korteji Táýelsizdik dańǵylynda ornalasqan Táýelsizdik saraıynyń aldyna kelip toqtady. Osy jerdegi «Qazaq eli» monýmentiniń aınalasynda qala turǵyndarynyń qalyń legi jáne ulyqtaý rásiminen keıin sherý jasaıtyn ásker turǵan edi. Olardyń bári Elbasyn qýanyshty úndermen, kóńildi daýystarmen qarsy aldy. Saltanatty ásker sherýine «Tik tur!» degen komanda berilgen soń Memlekettik kúzet qyzmetiniń bastyǵy, general-maıor Amantaı Kúreńbekov memlekettik kúzet qyzmetiniń jeke quramy saılanǵan Prezıdentti ulyqtaý rásimin ótkizýge daıyn ekendigin aıtyp, raport berdi.
Astana aspanyna qýatty eldiń, shýaqty eldiń shashýyndaı 21 dúrkin artıllerııalyq zeńbirekterden oq atyldy.
Saǵat 11.00-de ultynyń darabozy, halqynyń mańdaıyna bitken birtýar perzenti Elbasy Nursultan Nazarbaev Táýelsizdik saraıynyń Úlken zalyna qadam basty. Ushqan qustyń qanaty talar qazaq dalasynyń tórt buryshynan túgel jınalǵan zal toly jurt, óńir ókilderi Qazaq eliniń Kóshbasshysy, Qazaqstan Respýblıkasynyń Prezıdenti Nursultan Nazarbaevty tik turyp, zor qurmetpen qarsy aldy. Atshaptyrym zal keńistigin Elbasynyń sózine jazylǵan áýezdi án – «Elim meniń» asqaqtaı kernep ketti.
El jáne Elbasy! Birtutas jeriń, táýelsiz eliń barda bir-birinen ajyramas, aıyrylmas egiz uǵym. Mine, búgin ajyramas osy qos qasıetimiz tutasa qabysyp, alty alashtyń aıbynyn asqaqtatty. Memleket basshysy Nursultan Nazarbaev saraıdyń saltanatty tórine kóterildi. Qazaqstan Respýblıkasy Konstıtýsııalyq Keńesiniń tóraǵasy Igor Rogov elimiz Konstıtýsııasynyń 42-babyna sáıkes Qazaqstan halqyna ant bergen sátinen bastap Qazaqstan Respýblıkasynyń Prezıdenti óz qyzmetine kirisetindigi týraly málimdedi.
Nursultan Ábishuly Nazarbaev Qazaqstan Respýblıkasynyń Konstıtýsııasyna oń qolyn qoıyp, saltanatty jaǵdaıda:
– Qazaqstan halqyna adal qyzmet etýge, Qazaqstan Respýblıkasynyń Konstıtýsııasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblıkasy Prezıdentiniń ózime júktelgen mártebeli mindetin adal atqarýǵa saltanatty túrde ant etemin! – dep memlekettik tilde ant qabyldady.
Sodan keıin Elbasy Memlekettik týdy súıdi. Qýatty Ánuran áýezimen zal ishin bir sát tolqyǵan sezim, tebirenisti kóńil-kúı kernep ketti. Jınalǵan jurt júrekterine qolyn qoıyp, erkin eldiń aıbarly Ánuranyn asqaqtata shalqytty.
Saltanatty zal tórine Qazaqstan Respýblıkasy Ortalyq saılaý komıssııasynyń tóraǵasy Qýandyq Turǵanqulov kóterildi.
– Qurmetti Nursultan Ábishuly, 2015 jyldyń 26 sáýirinde ótken Qazaqstan Respýblıkasynyń Prezıdentin saılaý qorytyndysy boıynsha memleketimizdiń tıisti zańdaryna sáıkes Sizge Prezıdent kýáligin tapsyrýǵa ruqsat etińiz, – dep saltanatty rásim jaǵdaıynda Nursultan Nazarbaevqa Qazaqstan Respýblıkasy Prezıdentiniń kýáligin tapsyrdy.
Budan ári Memleket basshysy bıik minberden ulyqtaý rásimindegi Qazaqstan halqyna arnaǵan júrekjardy sózin joldady (Prezıdent Nursultan Nazarbaevtyń ulyqtaý rásimindegi sóılegen sózi gazetimizde jeke jarııalanyp otyr).
Memleket basshysynyń sózinen keıin ulyqtaý saltanaty Qazaqstan Respýblıkasynyń Prezıdenti – Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaevtyń Qazaqstan Qarýly Kúshteriniń saltanatty sherýin qabyldaýymen qorytyndylandy.
Elbasy Táýelsizdik saraıynyń bas kireberisinen Qazaq eli alańyna shyqqanda, Joǵarǵy Bas qolbasshyny elimizdiń Qorǵanys mınıstri Imanǵalı Tasmaǵambetov kútip alyp, Joǵarǵy Bas qolbasshyǵa Qazaqstan Qarýly Kúshteriniń áskerleri Qazaqstan Respýblıkasynyń Prezıdentin ulyqtaýǵa arnalǵan sapqa turǵyzylǵany jóninde raport berdi. Bul kezde merekelik áskerı úlgide kıingen jaýyngerler symdaı tartylyp, saltanatty sherýdi bastaýǵa pármen kútip turǵan edi.
– Sálemetsizder me, jaýyngerler? – dedi osy sátte Joǵarǵy Bas qolbasshy Nursultan Nazarbaev. Al vzvodtar men rotalarǵa bólinip, sapta turǵan sarbazdar: «Sálemetsiz be, Joǵarǵy Bas qolbasshy?» dedi de, ile-shala úsh márte «ýralap» Prezıdentke qurmet kórsetti. Artynsha áskerı sherýdi bastaýǵa pármen berildi.
Qazaqstan Respýblıkasynyń Qarýly Kúshteri árkez memlekettik sımvoldardyń qatarynda turady. О́ıtkeni, memlekettiliktiń, Táýelsizdiktiń negizderiniń biri sanalatyn otandyq áskerdiń elimiz damýyndaǵy róli erekshe mańyzdy jáne árqashanda mańyzdy bola bermek. Elimiz egemendigin ala salysymen, Prezıdent óz Jarlyǵymen Qazaqstannyń Qarýly Kúshterin qurý týraly sheshim qabyldaǵany esimizde. Osylaısha, Táýelsiz Qazaqstannyń tól armııasy dúnıege kelgen edi. Bul 1992 jyldyń 7 mamyry bolatyn. Memleket basshysynyń osynaý tarıhı Jarlyǵynan bergi ýaqyt ishinde eńseli elimizdiń Qarýly Kúshteri aspankók tústi Memlekettik týymyzda aıshyqtalǵan qus tóresi – tekti de tákappar qyran sekildi qanatyn keńge jaıyp, kókke samǵap keledi.
Elimizdiń Tuńǵysh Prezıdenti óziniń sarabdal saıasaty arqyly, ornymen júzege asyrǵan reformalary arqyly Qazaqstandy álem jurtshylyǵyna tanytty. Táýelsiz eldiń táýelsiz Qarýly Kúshterin qurý arqyly ony elimizdiń qaýipsizdigin qorǵaıtyn qýatty kúshke aınaldyrdy. Ulyqtaý sherýine qatysqan Qazaqstan Qarýly Kúshteriniń jaýyngerleri júktelgen mindetterdi oıdaǵydaı, joǵary deńgeıde oryndady. Áskerı sherý Qorǵanys mınıstrliginiń áskerı orkestriniń júrip ótýimen aıaqtaldy.
О́rkenıet áleminiń órkendi bolashaǵyna óristi qadam basqan qazaq jurtynyń Kóshbasshysyn qurmetteýge jınalǵan jurtshylyq qatary kóp boldy. Ulyqtaý rásimine Joǵarǵy Sot sýdıalary, Qazaqstan Respýblıkasy Parlamentiniń depýtattary, Prezıdent Ákimshiligi men Premer-Mınıstr Keńsesiniń ókilderi, Qazaqstanda tirkelgen dıplomatııalyq ókildikter men halyqaralyq uıymdardyń basshylary, memlekettik basqarýdyń ortalyq organdary basshylary, Úkimet músheleri, jaýapty hatshylar, oblystardyń, Astana men Almaty qalalarynyń ákimderi, Qazaqstan halqy Assambleıasynyń músheleri, dinı konfessııalar ókilderi, Respýblıkalyq bıýdjettiń oryndalýyn baqylaý jónindegi esep komıtetiniń músheleri, Ortalyq saılaý komıssııasynyń músheleri, Konstıtýsııalyq Keńes músheleri, prezıdenttikke kandıdattar, respýblıkalyq jáne óńirlik qoǵamdyq shtabtar, Saılaýdy baıqaý jónindegi respýblıkalyq qoǵamdyq komıssııa músheleri, «Nur Otan» partııasynyń basshylyǵy, Tuńǵysh Prezıdent mekemeleri men uıymdarynyń jetekshileri, demokratııalyq kúshterdiń «Qazaqstan-2050» jalpyulttyq koalısııasy músheleri, «Halyq Qaharmany» jáne «Eńbek Eri» ataqtarynyń ıegerleri, el generalıteti, senim bildirilgen adamdar, qoǵamdyq-saıası birlestikter men úkimettik emes uıymdar jetekshileri, respýblıkalyq buqaralyq aqparat quraldarynyń basshylary, kórnekti ǵylym, mádenıet jáne óner qaıratkerleri, respýblıkanyń isker toptar ókilderi, jastar uıymdarynyń kóshbasshylary qatysty. Is-sharaǵa barlyǵy 3 000-ǵa jýyq adam shaqyrylypty.
Qazaqstan Respýblıkasy Prezıdentiniń saılaýy 2015 jylǵy 26 sáýirde ótti. Qazaqstan Respýblıkasy Ortalyq saılaý komıssııasynyń málimeti boıynsha, daýys berýge 9 090 920 adam nemese saılaýshylardyń 95,21 paıyzy qatysqan. Nursultan Nazarbaev saılaýshylardyń 8 833 250 daýysyna ıe boldy, bul – daýys berý rásimine qatysqan saılaýshylar daýsynyń 97,75 paıyzyn quraıdy.
Qalaǵan ulyn halqy ulyqtaǵan kún endi tarıhymyzǵa altyn áriptermen jazylady. Halqy senim artqan Elbasynyń árbir bastamasy berekeli, elimizdiń keleshegi kemel bolǵaı.
Jaqsybaı SAMRAT,
Láıla EDILQYZY,
Dınara BITIKOVA,
«Egemen Qazaqstan».
Sýretterdi túsirgender
S.BONDARENKO, B.OTARBAEV.
*Qatysýshylar lebizi
Eraly TOǴJANOV,
Qazaqstan halqy Assambleıasy Tóraǵasynyń orynbasary:
– Bul kún – halyqtyń tańdaýy zań júzinde óz kúshine engen kún. Al halyqtyń tańdaýy – bizdiń Elbasymyz Nursultan Nazarbaev boldy. Qazaqstan Respýblıkasynyń kezekten tys prezıdenttik saılaýyn ótkizý týraly bastamany Qazaqstan halqy Assambleıasy kótergeni belgili. Al qazaqstandyqtar bul bastamaǵa qoldaý kórsetti. Saılaý qorytyndysy halqymyzdyń Nursultan Ábishulyna degen senimin aıqyndap berdi.
Bul – Qazaqstan úshin tarıhı mańyzy bar aıtýly oqıǵa. Bul – bizdiń Elbasymyz úshin ǵana emes, elimiz úshin de aıtýly kún. Sebebi, jurtshylyq turaqtylyq, kelisim, osy jerdi mekendegen túrli etnos ókilderiniń birligi úshin daýys berdi. Bul – kez kelgen memlekettiń ilgerileýiniń basty kórsetkishi. Tini myqty jáne turaqty memleket qana damı alady, órkendep, óse alady.
Nurlan NOǴAEV,
Batys Qazaqstan oblysynyń ákimi:
Keshe Táýelsizdik saraıynda Prezıdenttiń resmı túrde iske kirisýine oraı ótkizilgen ulyqtaý rásiminiń basty máni – Nursultan Nazarbaevtyń el halqyna ant berýinde dep túsinemin. Buǵan deıin ótkizilgen ulyqtaý rásimderinde de Elbasymyz ant bergeni barsha qazaqstandyqtarǵa jaqsy málim. Onyń bári de oıdaǵydaı oryndalǵany taǵy da aqıqat.
26 sáýir kúni ótkizilgen Prezıdent saılaýynda Nursultan Nazarbaevtyń úlken jeńiske jetýiniń basty syry da bergen antynyń beriktiginde ekeni kámil. О́z antyna adaldyq – Memleket basshysyna tán basty qasıet ekenine barsha qazaqstandyqtardyń kózderi jetkeli qashan. О́ıtkeni, Prezıdent anty qaı kezde de eldikti eńselendirý jónindegi naqty istermen, el mereıin ósirý jolyndaǵy qaryshty qadamdarmen úılesim taýyp keledi.
Iesi bar anttyń kıesi de bar. Anttan attaýǵa bolmaıtyny da sondyqtan. Ant – sert pen ýádeniń ushar shyńy. Osy shyń men bıikten Prezıdenttiń Qazaqstan halqyna bergen anty eldiktiń týyn qashanda joǵary kótere berýge qyzmet jasaı beretini anyq. Týdy joǵary ustaýmen birge ony súıe de bilý kerek.
Ulyqtaý rásiminde óz halqynyń sheksiz senimine taǵy bir márte ıe bolǵan Elbasymyz eńkeıip baryp týdy súıgeni otandastarymyzdyń jan saraıyna Prometeı otyn jaǵyp, eldiktiń qadir-qasıetin taǵy bir márte asqaqtata túskendeı áser qaldyrdy. Janarlarǵa jas úıirip, júrekterdi diril qaqtyrǵan ǵajaıyp sát boldy keshe Táýelsizdik saraıynda. Antyna adal, antynan attamaıtyn Prezıdenti bar – Qazaq eli baqytty el dep bilemin.
Bıbigúl TО́LEGENOVA,
Qazaqstannyń halyq ártisi:
– Bul – Qazaqstan úshin, onyń halqy úshin aıryqsha oqıǵa, úlken toı. Biz úshin budan úlken toı joq. Sebebi, bizdiń Prezıdentimiz óz ornynda qalyp, aldaǵy ýaqytta da memleketimizdi basqaryp, elimizdi odan ári damytý jolynda eńbek etetin bolady. Bul oraıda, bizdiń qýanyshymyz orasan. Qýanyshymyzdyń uzaǵynan bolǵanyn, elimizdiń, Elbasymyzdyń aman bolǵanyn tileımiz.
Bizdiń elimiz – turaqtylyq pen kelisimdi, birlikti qýattaıtyn el. Bul rette, biz el tutastyǵynyń nyǵaıyp, halqymyzdyń ómir sapasynyń artyp, Qazaqstannyń halyqaralyq deńgeıdegi bedel-bıiginiń sharyqtaı bergenin qalaımyz. Men buǵan deıingi ulyqtaý rásimderine de qatysqanmyn. Prezıdentimizdiń aldaǵy ýaqytta da halqymyzdy bıik belesterge jetkizetinine senimdimin. Osy oraıda, barshańyzdy memleket úshin mańyzdy kezeńniń bastalýymen quttyqtaımyn!
Arystanbek MUHAMEDIULY,
Mádenıet jáne sport mınıstri:
– Prezıdentti ulyqtaý rásimi – bárimiz úshin aıtýly saltanatty shara. Onyń memleket úshin mańyzy zor. Elbasy ózi aıtqandaı, búgin elimiz óz tarıhynyń taǵy bir jańa betin ashty. Qazaqstan qazir nurly jolda, aıqyn baǵdarda tur. Osy nurly joldyń jalǵasy aldaǵy ýaqytta bárimizge úlken baqyt, úlken molshylyq alyp keletini sózsiz. Elbysymyz alǵa qoıǵan maqsat-múddeler mindetti túrde oryndalýy kerek.
Bes halyqtyq reformany tabysty júzege asyryp, bolashaǵy birtutas elge aınalýǵa tıispiz. Prezıdenttiń reformalary elimizdiń alǵa qaraı qadam basýynyń negizgi joldary. Nursultan Nazarbaev Qazaqstandy jańǵyrtý – bizdiń ortaq isimiz ekendigin basa aıtty. Aldymyzda qandaı da synaqtar bolmasyn, biz memleketimizdiń qýatyna, halqymyzdyń danalyǵyna súıene otyryp, ony eńserip shyǵatynymyzǵa senimin bildirdi. Endeshe, aldaǵy ýaqytta bizderdi zor jaýapkershilikti ister kútip tur.
Murat ÁÝEZOV,
mádenıettanýshy-ǵalym, qoǵam qaıratkeri:
– Kezekten tys prezıdenttik saılaý bıylǵy jyly ótedi degen áńgime alǵash aıtyla bastaǵannan-aq men bul oıdy sanaly túrde qoldaǵan bolatynmyn. О́ıtkeni, shynymen de qazirgi halyqaralyq jaǵdaı, geosaıası jaǵdaılar bizdiń elde de osyndaı sheshimdi qabyldaýǵa qajettilik týdyryp otyrǵanyn jaqsy bilemiz.
Qazirgi kúni táýelsiz memleketterge syn bolatyn kóptegen halyqaralyq jaǵdaılar shıelenisip kele jatyr. Árıne, qazir yntymaqty el bolýymyz kerek. Bul turǵyda Nurekeń ózin dáleldedi, al elimiz birligin, eldigin dáleldedi. Elbasy kóptegen jyldar boıy baryn salyp, ata-baba armandaǵan táýelsiz, kórshilermen terezesi teń myqty memleket bolý jolynda aıanbaı eńbek etip kele jatyr. Bizdiń osyndaı myqty basshymyz bar. Al endigi másele – halyq bolyp birigip, iri-iri tarıhı isterge kirisip, ony nátıjeli júzege asyrý. Men bul saılaýdyń nátıjesine qýanyp otyrmyn. Bul shynaıy jetistik. Sebebi, ózim de baryp daýys berdim. Jurttyń, kópshiliktiń qandaı kóńilmen barǵanyn, qandaı úmitpen barǵanyn, qandaı senimmen barǵanyn kórdim.
Mıhaıl BORTNIK,
Parlament Senatynyń depýtaty:
– Prezıdentti ulyqtaý rásimi árbir qazaqstandyqtyń boıynda úlken maqtanysh sezimin oıatyp, tebirenis týdyrdy dep bilemin. Ásirese, buǵan jastar jaǵy úlken yqylaspen qaraǵany anyq. О́ıtkeni, keshegi ótken saıası dodada jastar saılaýǵa daıyndyq barysyna jáne daýys berýde óte úlken belsendilik tanytty. Men buǵan deıin sonshama jastardyń saılaý ýchaskelerinde bolǵanyn buryn-sońdy baıqamappyn. Muny men jastardyń elimizdiń órkendeýine qyzyǵýshylyǵy dep tanımyn. Jáne de olar boıynda eldiń bolashaǵyna degen jaýapkershilik sezimi oıanyp, patrıotızm rýhy qalyptasyp kele jatyr dep túsinemin. Elimizdegi júrgizilip jatqan reformalardyń jastar tarapynan qyzý qoldaýǵa ıe bolýynyń astarynda da osyndaı túsinik jatyr.
Sháripbek ÁMIRBEKOV,
Shákárim atyndaǵy Semeı memlekettik ýnıversıtetiniń rektory:
– Bul kún – saılaý qorytyndysy boıynsha Qazaqstan Respýblıkasy Prezıdentiniń laýazymyna Nursultan Nazarbaev resmı túrde kirisken aıtýly kún. Eldegi úlken saıası úderistiń nátıjesi halyqtyń aıryqsha belsendiligin kórsetip, Elbasyn qanshalyqty qoldaıtynyn taǵy bir aıǵaqtap berdi.
Qazaqstan Prezıdentiniń laýazymyna resmı túrde kirisý rásimi barysynda Nursultan Ábishuly aldaǵy ýaqytta atqarylar qadaý-qadaý máseleler men jaýapkershilikke toly bastamalardy atap ótti. Olar elimizdi jańa satyǵa kóteretin reformalardyń negizgi júıesi bolady. Bul reformalarǵa sheteldik sarapshylarmen qatar, elimizdiń búkil ıntellektýaldyq kúshteri qatysady, sonymen birge, Qazaqstannyń barlyq ekonomıkalyq áleýeti jumyldyrylady. Sondyqtan, N.Nazarbaevtyń Prezıdent laýazymyna kirisýi elimizdiń damýyndaǵy jańa, tarıhı kezeńniń bastamasy bolyp tabylady.
Erǵalı ÁBDIQAIYMOV,
Qyrǵyzstan qazaqtary qaýymdastyǵy tóraǵasynyń mindetin atqarýshy:
– Mereılerińiz ústem bola bersin!
Tym jyraqta bolmasaq ta, shette júrgen soń atajurtymyz bizge ystyq. Tarıhı Otanymyzda ne bolyp jatqanyna zer salyp, baıqap otyramyz. Qazaqstanda kezekten tys prezıdenttik saılaý bolady degende, oǵan biz qurmettegen Nursultan Nazarbaev talapkerligin ózi de qoısa dep tilek etkenbiz. Ol tilegimiz qabyl bolǵanyna bir qýanǵan edik. Endi Nuraǵamyzdyń mereıi ústem bolyp, memleket tizginin qolynan shyǵarmaı, isin burynǵydan da jigerli qaıta jalǵastyrǵanyna taǵy da qýanyp otyrmyz.
Qyrǵyzstanda turyp jatqan qazaqtar ǵana emes, túpkilikti el qyrǵyzdar da Nursultan Nazarbaevtyń qadirin jaqsy biledi. Eń bastysy, Nursultan Ábishuly kórshi elderge memlekettiń damýynyń orta jáne uzaq merzimdik josparly, evolıýsııalyq jolmen damýyndaǵy ıgiliktiń úlgisin kórsetip berdi.
Qyrǵyzstan halqy Assambleıasynyń quramyndaǵy Qyrǵyzstan qazaqtarynyń qaýymdastyǵy – búgingi kúnde respýblıkanyń barlyq oblystaryndaǵy qazaqtardyń basyn biriktirgen uıym. Qaýymdastyqtyń músheleri qyrǵyz jerinde tútin tútetken 33 myń 700 qazaqtyń atynan atajurtymyzdyń budan ári de qaryshtap ósip-órkendeýin qalap, mártebeli Elbasyna jáne saılaýda durys tańdaý jasaǵan otandastaryna quttyqtaý lebizin «Egemen Qazaqstan» gazeti arqyly bildirip qoıýdy jón kórdi.
Denıs TEN, mánerlep syrǵanaýshy:
– Men úshin Qazaqstan Respýblıkasynyń Prezıdentin ulyqtaý rásimine qatysý – úlken qýanysh. Sebebi, bıyl prezıdenttik saılaýaldy naýqanyna birinshi ret qatysyp, senim bildirilgen adamy boldym. Sondyqtan, bul oqıǵa men úshin óte mańyzdy. Nursultan Ábishuly – bizdiń Tuńǵysh Prezıdentimiz. Elbasy – memleketimizdi qalyptastyrǵan, Qazaqstandy múldem jańa bıikke kótergen tulǵa.
Bul oraıda, halyqtyń aıryqsha belsendilik tanytyp, Nursultan Nazarbaevqa qoldaý bildirgenine rızamyn. Aldaǵy ýaqytta el ómirinde, memleket qurylymynda jańa ózgerister men mańyzdy reformalar júrgiziletinine, Qazaqstandy jańa, úlken asýlardyń kútetinine senimim mol. Al sportshy retinde Qazaqstan tuǵyrynyń bıikteýine, elimizdiń Kók baıraǵynyń jelbireýine ózimniń tarapymnan úles qosýǵa umtylamyn.
Sýretterdi túsirgen Erlan OMAROV.
