Sport • 16 Qarasha, 2024

Jarystar kúndeligi

100 ret

kórsetildi

3 mın

oqý úshin

Estonııanyń Tallın qalasynda mánerlep syrǵanaýdan «Tallinn Trophy» halyqaralyq týrnıri jalaýyn túsirdi. El úmitin arqalaǵan Sofıa Samodelkına kúmis júlde oljalady. Qysqa baǵdarlamada alǵan upaıynyń nátıjesinde úshinshi satyǵa turaqtaǵan jerlesimiz erkin baǵdarlamada upaıyn molaıtyp, qossaıys qorytyndysynda 173,25 upaı enshiledi. Halyqaralyq týrnırdiń altyn medalin 192,48 upaımen belgııalyq Nına Pınzarron aldy. Qola medal kanadalyq Sara Mod Dıýpýaǵa (163,58 upaı) buıyrdy.

Qýanysh NURDANBEKULY

Halyqaralyq semserlesý federasııasynyń (FIE) álemdik reıtıngi jańartyldy. Bizdiń erler quramasy kórsetkishin jaqsartyp, eki satyǵa órledi. Jýyrda Shveısarııanyń Bern qalasynda álem kýboginiń kezeńi ótti. 35 komanda arasynda sańlaqtarymyz 7-orynǵa turaqtady. Sonyń nátıjesinde álemdik reıtıngtegi kórsetkishte jaqsaryp, 4-satyǵa ornyqty.

Reseıdiń Máskeý qalasynda WKF karateden Moscow Karate Universe -2024 halyqaralyq týrnıri ótti. 31 elden 329 sportshy qatysqan aıtýly dodada sańlaqtarymyz 8 medal oljalady. Qyzdar synynda Móldir Jańbyrbaı (50 kg) men Sofıa Berýlseva (+68 kg) chempıon atansa, Gúlmıra Úsenova (55 kg), Laýra Saǵynbek (68 kg) fınaldyq básekede súrinip, kúmis medaldy mise tutty. Erler dodasynda Nıkıta Tarnakın (84 kg) barlyq qarsylasyn aıqyn utyp, altyn medal enshilese, Dıas Anarbekov (+84 kg), Jolaman Bıǵabyl (60 kg), Danııar Iýldashevke (84 kg) qola júlde buıyrdy.

Taraz qalasynda kúres túrlerinen Qazaqstan kýbogi ótip jatyr. Bozkilemge aldymen grek-rım kúresiniń balýandary shyqty. Elishilik saıysta myna balýandar chempıon atandy: 55 kg – Erbol Kamalıev (Almaty oblysy), 60 kg – Baqytjan Qabdyl (Almaty oblysy), 63 kg – Meırambek Aınaǵulov (Aqtóbe oblysy), 67 kg – Meıirjan Shermahambet (Shymkent qalasy), 72 kg – Ádilhan Sataev (Shymkent qalasy), 77 kg – Ibragım Magomadov (Qaraǵandy oblysy), 82 kg – Omar Sataev (Shymkent qalasy), 87 kg – Shámil Ojaev (Almaty qalasy), 97 kg – Ilıas Gýchıgov (Shymkent), 130 kg – Álimhan Syzdyqov (Shymkent qalasy).

Áıelder kúresinen 10 salmaq dárejesinde ótken dodada myna balýandar chempıon atandy: 50 kg – Svetlana Ankıcheva (Astana), 53 kg – Zeınep Baıanova (BQO), 55 kg – Marına Sedneva, 57 kg – Nılýfar Raımova (Túrkistan oblysy), 59 kg – Gúldana Bekesh (Qaraǵandy oblysy), 62 kg – Vıktorııa Hýsaınova (Aqmola oblysy), 65 kg – Elena Shalygına (Astana), 68 kg – Irına Kazıýlına (Abaı oblysy), 72 kg – Anastasııa Panasovıch (BQO), 76 kg – Gúlmaral Erkebaeva (Astana).

Qytaıda grek-rım kúresinen 20 jasqa deıingi balýandar arasynda halyqaralyq týrnır ótti. 67 kg salmaqta beldesken Iýsýf Ashrapov chempıon atansa, 87 kg-da synǵa túsken Nurasyl Amanaly kúmis, Baǵlan Qýanyshev qola medal enshiledi.