Soltústik Qazaqstan polıseılerine 45 kólik tabys etildi

PETROPAVL. 30 sáýir. Soltústik Qazaqstan oblysynda Uly Jeńistiń 70 jyldyǵyna arnalǵan is-sharalar aıasynda tártip saqshylaryna qyzmettik kólikterdiń kiltteri saltanatty jaǵdaıda tartý etildi. Bul týraly oblystyq ishki ister departamentiniń baspasóz qyzmeti habarlady. «Ishki ister salasynyń materıaldyq-tehnıkalyq bazasyn nyǵaıtýdyń arqasynda qylmystar men quqyqtyq buzýshylyqtardyń aldyn alý, boldyrmaý sharalary óz nátıjelerin berip keledi. О́zderińiz kórip turǵandaı, oblystyq jol-patrýldik polısııa qurylymy 45 qyzmettik kólikpen tolyǵyp otyr», – dedi óz sózinde oblys ákiminiń orynbasary Vladımır Býbenko. Škoda Octavia, Lada Granta, «Nıva», ÝAZ sekildi avtomobılderdi satyp alýǵa jergilikti qazynadan 80 mıllıon teńge bólindi. Budan bólek, Qorǵanys mınıstrligi qyzmettik maqsattar úshin eki avtobýs bóldi. Al buǵan deıin qalalyq, oblystyq tas joldarda paıdalanylyp kelgen avtomobılder ýchaskelik polısııa saqshylaryna berildi. Saltanatty jıyn aıaqtalǵannan keıin qonaqtarǵa arnaıy bólimshe saıys uıymdastyryp, qarýdy meńgerý ádisterin kórsetti. Shara ishki ister organdary qyzmetkerleriniń saltanatty marshymen aıaqtaldy. О́mir Esqalı. Derek: oblystyq ishki ister departamentiniń baspasóz qyzmeti. Sýret: inform.kz.