Qostanaıda saıası partııa ókilderi bas qosty

QOSTANAI. 30 sáýir. Qostanaı oblystyq baspasóz klýbynda ishki saıasat basqarmasy Qazaqstan halqy birligi kúni jáne Jeńistiń 70 jyldyǵy merekelerine arnalǵan dóńgelek ústel ótkizdi. Oǵan qatysqan túrli partııalar ókilderi oblys halqyna osy aıtýly merekelerge oraı quttyqtaý hat joldady. Bul týraly egemen.kz tilshisi habarlady. Oblystyq ishki saıasat basqarmasy muryndyq bolǵan dóńgelek ústel májilisine «Nur Otan» partııasy oblystyq fılıaly tóraǵasynyń orynbasary Seráli Ahmetov, Qazaqstan kommýnıstik halyq partııasy oblystyq komıtetiniń hatshysy Alpysbaı Álimbaev, «Jalpy ulttyq sosıal-demokratııalyq partııasy» oblystyq fılıalynyń tóraǵasy Sergeı Bogatyrev, Qazaqstannyń «Aýyl» sosıal-demokratııalyq partııasy saıası keńesiniń múshesi Alma Kóshenova, «Birlik» partııasy oblystyq fılıalynyń tóraǵasy Serik Eshmanov, «Aqjol» demokratııalyq partııasy oblystyq fılıaly tóraǵasynyń orynbasary Qanatbaı Seısenbaev qatysty. Qatysýshylar aldymen  elimizde Prezıdent saılaýynyń ádil ótkenin aıtyp, Qazaqstan halqynyń Nursultan Nazarbaevty tańdaýyn óte durys sheshim dep bildi. Elbasynyń dana saıasatynyń arqasynda Qazaqstanda birlik pen tynyshtyq saltanat quryp keledi. Sondyqtan partııalar ókilderi qostanaılyqtardy aldymyzda kele jatqan Qazaqstan halqy birligi merekesi men jáne Jeńistiń 70 jyldyǵymen quttyqtady. Olar dóńgelek ústel májilisinde osy quttyqtaý hatqa qol qoıdy. «Uly Otan soǵysy bizdiń ortaq tarıhymyz, bizdiń Otannyń tarıhy. Tynyshtyǵymyzǵa syna qaqqysy keletin keıbireýler bizdiń tarıhymyzdyń ózinen ilik tapqysy keledi. Biz qaı partııa bolsa da eldiń tynyshtyǵyn saqtaýǵa atsalysýymyz qajet. Búgin qostanaılyqtarǵa birigip jazyp otyrǵan merekelik hatymyz sondaı ıgi jumystarymyzdyń biri dep bilemiz», – dedi «Jalpy ulttyq sosıal-demokratııalyq partııasy» oblystyq fılıalynyń tóraǵasy Sergeı Bogatyrev. Túrli partııalar oblystyq fılıaldary jetekshileriniń quttyqtaý haty jergilikti baspasózde jarııalanatyn bolady. Oblystyq ishki saıasat basqarmasynyń basshysy Jandilda Maqanov elimizdegi túrli partııalar jergilikti fılıaldarynyń birigip, turǵyndardy quttyqtaýy Qostanaıda alǵash ótkizilip otyrǵanyn aıtty. Názıra Járimbetova Derek, sýret: egemen.kz.