Sýret: kazakhstan.travel
Iskerlik týrızmniń de tabys qaınary ekenin «Kazakh Tourism» ulttyq kompanııasynyń «MICE – Týrızm elshisi» baǵdarlamasyn saralaǵanda anyq kóz jetkizesiz. 2021 jyldan bastap iske qosylǵan baǵdarlamanyń nátıjesi kóńil kónshiterlik. Tórt jyldyń ishinde 40 týrızm elshisi taǵaıyndalyp, osy óristi órkendetýge úles qosyp keledi. Halyqaralyq qaýymdastyq músheleri, bıznes, ǵylym, medısına, mádenıet syndy salalardyń kásibı mamandary da, izgi nıet elshi retinde, iskerlik týrızmdi damytýǵa kúsh salyp otyr.
«Kazakh Tourism» UK» AQ Basqarma tóraǵasynyń orynbasary Danıel Serjanuly elimizdi iskerlik týrızm ortalyǵyna aınaldyryp, mańyzdy is-sharalardyń jıi uıymdastyrylýyna elshilerdiń de tıgizer paıdasy zor ekenin aıtady. Álemdik aýqymdaǵy 11 iri is-sharany elde ótkizýdiń nátıjesinde 6 myńǵa jýyq sheteldik delegat kelip, qazynaǵa 8 mıllıon AQSh dollary mólsherinde paıda túsken.
«MICE-týrızm, ıaǵnı iskerlik týrızmdi túletý qalalardyń ekonomıkasyn nyǵaıtýǵa aıtarlyqtaı áser etedi. Iskerlik is-sharalar maýsymdyq týrızmnen túsetin paıdany eseleı túsedi. Sheteldik isker týrısterdiń elimizge degen qyzyǵýshylyǵy jyldan-jylǵa artyp keledi. Biz buǵan deıin bilim, geologııa, sport, týrızm, kásipkerlik salasynda mańyzdy álemdik is-sharalar ótkizdik. Osy sharalardy uıymdastyrýǵa memleket qazynasynan bólingen qarajat ekonomıkamyzǵa úsh eselenip quıylady. Jalpy kiris sheteldik delegattardyń qarajaty esebinen túsedi. Árqaısysy bizdiń elimizge kelgen kezde orta eseppen 1438 dollar jumsaıdy. Olar tek ǵımarattardy jalǵa alý, qonaqúıde turý ǵana emes, kólikti paıdalaný, tamaqtaný, basqa da qyzmet túrlerine qarajatyn jumsaıdy, eline kádesyı satyp alady. Mine, osylaısha, iskerlik týrızmdi turaqty jolǵa qoıý arqyly da tabys kózin ashýǵa bolady», deıdi D.Serjanuly.
Kelesi jyly «Kazakh Tourism» kompanııasy men MISE-týrızm elshileri tize qosyp álemniń 140-tan asa elinen delegattar keletin 3 iri halyqaralyq is-shara ótkizýdi josparlap otyr. Sonyń ishinde kitaphanashylar uıymdarynyń halyqaralyq kongresin erekshe aıtýǵa bolady. Astana qalasynda ótetin bul kongreske 4 myńǵa jýyq qonaq keledi. 2026 jyly ótetin trevel blogerlerdiń halyqaralyq jıyny da iskerlik týrızmniń órisin keńeıtetini anyq.
Bıyl da MISE-týrızmniń elshileri taǵaıyndalyp, iskerlik salany óristetýge kúsh salmaq. Halyqaralyq qaýymdastyq músheleri, bıznes, ǵylym, medısına, mádenıet, óner, sport salalarynyń kóshbasshylary elimizde iskerlik týrızmniń qazyǵyn qaǵyp, ortalyǵyna aınaldyrýǵa úlesin qosady. «Qazaqstannyń geotehnıkalyq qaýymdastyǵy» QB bas hatshysy Bıbigúl Ábdirahmanova iskerlik týrızmniń elshisi bolý zor jaýapkershilik júkteıtinin baıan etti.
«MICE-týrızminiń elshisi ataný – men úshin úlken abyroı. Biz áriptesterimizben birlese 2025 jyldyń tamyz aıynda Qazaqstanda aýqymdy halyqaralyq konferensııa ótkizýdi josparlap otyrmyz. Oǵan 40 elden ókilder qatysady. Bul – elimizdiń týrızm salasyndaǵy kásipkerlerine isker týrısterdi tartýǵa tamasha múmkindik», degen B.Ábdirahmanova alǵashynda sharýa jaıymen kelgen sheteldikter kelesi joly otbasymen birge qydyryp kelýge yntaly bolatynyn aıtty.
Iskerlik týrızm elshisi, jýrnalıst shańǵyshylar qaýymdastyǵynyń (SCIJ) ókili Andreı Kýkýshkın bıyl naýryz aıynda jýrnalıst shańǵyshylardyń halyqaralyq dodasy ótkenin atap ótti. «Almatyda jýrnalıst-shańǵyshylar federasııasynyń aýqymdy basqosýy boldy. 30-dan asa elden 100-ge tarta shańǵyshy jýrnalıst «Shymbulaqta», «Alataý» bıatlon kesheninde saıysqa tústi. Birneshe kún qonaq bolǵan týrıst jýrnalıster tek sporttyq saıysqa ǵana qatysyp qoıǵan joq. Elderine barǵan soń Qazaqstan týraly, qarly Alataý bókterinde seıildep saıahattaǵany týraly jazdy, kópshilikti qulaǵdar etti. Olardyń arasynda elimizge alǵash tabany tıgenderi de bar. Erekshe áserlenip, tabıǵatymyzdyń tamasha tartýyna tańdaı qaqty. Qaıta aınalyp, qaıyra qydyryp keletinin aıtty. Biz jýrnalıst shańǵyshylardyń álemdik basqosýyn alǵash uıymdastyryp, elimizdiń týrızm órisindegi áleýetin áıgiledik», dedi A.Kýkýshkın.
«Iskerlik týrızmniń elshileri bas qosatyn shara jyl saıyn uıymdastyrylyp, dástúrge aınaldy. Bıyl da Astana qalasyndaǵy basqosýda eńsergen sharýany tııanaqtap, keleshekte júzege asýy tıis josparlardy pysyqtap, oı-pikir almasyp, tájirıbemizdi bólistik. Elimizdegi bıylǵy aýqymdy doda V Dúnıejúzilik kóshpeliler oıyndary bolsa, odan bólek te, ár salada halyqaralyq is-shara ótti. Munyń barlyǵy iskerlik týrızmniń qarqyn alyp kele jatqanyn ańǵartady. Týrızm elshileri elimizde osyndaı aýqymdy jobalardyń júzege asyrylýyna sebepker bolady, jetekshilik etedi. «Kazakh Tourism» kompanııasy elimizde joba uıymdastyrýǵa yqylasty jandarǵa únemi qoldaý kórsetip keledi», deıdi D.Serjanuly.
Uqsata bilgenge iskerlik týrızm – tabystyń qaınar kózi. Elimizdiń megapolısterindegi qonaqúılerde keıde shetelden kelgen meımandar qatary kóp bolady. Solardyń deni túrli is-sharalarǵa qatysýshy delegattar. Danıel Serjanuly tek iri qalalar ǵana emes, oblys ortalyqtaryna da iskerlik týrızmdi óristetýge bolatynyn aıtady.
«Oblys ortalyqtarynda iskerlik týrızmdi damytý qarqyn alsa, túsetin paıda da artary sózsiz. Mysaly, Túrkistan qalasyna týrıster kúz, kóktem mezgilinde jazdaǵydaı jappaı kele bermeıdi. Osy kem-ketikti kúzde ótetin marafon dodasy aıtarlyqtaı bútindep otyr. Bıyl qazan aıynda Túrkistan halyqaralyq marafonynda (Turkistan international marathon) elimizden, alys-jaqyn shetelden 3 myńǵa tarta qatysýshy júgirdi. Olardyń kópshiligi jalǵyz kelmeıdi. Biriniń dosy, týysy, joldasy, jary degendeı, qasyna erip júredi. Mine, sóıtip bir kúndik sharaǵa kelgender qalanyń qonaqúılerine qyrýar qarajatyn shyǵyndaıdy, aýqattanady, qydyrady, kólik qyzmetin paıdalanady. Munyń barlyǵy da – qarjy, paıda», deıdi Basqarma tóraǵasynyń orynbasary.
Iskerlik týrızmdi túletý el qazynasyna quıylar qarjyny molaıtatyny qashanda qaperde bolǵany jón.
