Yrysqa bastar yntymaq

Elimizdegi tynyshtyq, birlik,  adamı syılastyq yrysty eldiń úlgili isterin  álemge pash etip otyr.   Qostanaı oblystyq baspasóz klýbyna Ishki saıasat basqarmasynyń muryndyq bolýymen túrli partııa­lar belsendileri bas qosty. Olar aldymen elimizdegi óte mańyzdy saıası oqıǵa Prezıdent saılaýynyń ádil jáne tabysty ótkenin  aıtty. Demokratııalyq ustanymdy ustanǵan elimizdegi birneshe partııa­lar bar. Biraq olardyń oılaǵany «aqqý, shortan, shaıannyń» kebi emes, eldiń birligi, yntymaǵy, damýy eken. Partııalardyń Qostanaı óńirindegi fılıaldarynyń ókilderi ony isimen dáleldedi.  «Nur Otan», Qazaqstan Kommýnıstik halyq partııasy, Jalpyulttyq sosıal-demokratııalyq partııasy, Qazaq­stannyń «Aýyl»   sosıal-demokra­tııalyq partııasy, «Birlik» já­ne  «Aqjol» demokratııalyq par­tııalarynyń jergilikti jerdegi belsendileri yntymaqtasa otyryp, Qazaqstan halqynyń birligi, Otan qorǵaýshylar kúnimen jáne Jeńistiń 70 jyldyq mere­kesine oraı Qostanaı oblysy turǵyndaryna quttyqtaý hat joldady. Basqosýda partııalar ókilderi ózderiniń oblystyq fılıaldary atynan osy quttyqtaý hatqa qol qoıdy. Mundaı sharany Qostanaı oblysy elimiz boıynsha birinshi ret ótkizip otyrǵanyn da aıta ketken jón. – Uly Otan soǵysy bizdiń or­taq tarıhymyz, atalarymyz  óziniń qanyn tógip, ómirin berip, fashızmnen eldi, jerdi qorǵap qaldy.  Qazir tynyshtyǵymyzǵa syna qaqqysy keletin keıbireýler bizdiń tarıhymyzdyń ózinen ilik tapqysy keledi. Al ony óziniń aram pıǵylyna  paıdalanǵysy keletinder de tabylmaýyna kim kepil?  Qaı partııa bolsa da, aldymen eldiń tynyshtyǵyn saqtaýǵa atsalysýymyz qajet. Bú­gin  qos­tanaılyqtarǵa  birigip  jazyp otyrǵan merekelik hatymyz sondaı ıgi jumystarymyzdyń biri dep bilemiz, – dedi Jalpyulttyq sosıal-demokratııalyq partııasy oblystyq fılıalynyń tóraǵasy Sergeı Bogatyrev. Quttyqtaý hat: «Qurmetti qostanaılyqtar! Sizderdi beıbitshilik pen keli­simniń, erlik pen qaısarlyqtyń merekeleri Qazaqstan halqynyń birligi kúnimen, Otan qorǵaýshylar kúnimen jáne Uly Jeńistiń 70 jyldyǵymen quttyqtaımyz! Arda­gerlerimizdiń  maıdanda kórsetken erligi  búgingi urpaq úshin úlgi. Soǵystaǵy atalar qanymen, tyl­daǵy ájelerimizdiń mańdaı teri­men kelgen beıbit ómirdiń sal­tanatyn elimizdiń jastary jal­ǵastyratynyna senemiz. Olar erlikti umytpaıdy», degen joldarmen  bastalady. Partııalardyń Qostanaı óńi­rindegi belsendileri búgingi ýaqyt­tyń kúrdeli ekendigin de eske saldy.  Dúnıejúzilik eko­nomıkalyq daǵdarys kóp elderdi qýsyryp keledi. Sonymen qatar,  tasada turyp tas atyp, bóten eldi búldirip paıda tabatyndar da ámbege aıan. Partııalar belsendileri olarǵa qarsy qarý – eldiń  tastúıin birligi, yntymaǵy  ǵana ekenin aıtty. Partııalar Jeńis merekesinde  jastarǵa patrıottyq  tárbıe beretin  sharalar josparyn da bólisti. Mysaly, nurotandyqtar Jeńis merekesinde «Meniń atamnyń portreti» degen keń kólemdegi ak­sııany jalǵastyrady, sosıal-demokrattar  soǵys arda­gerlerine gúl shoqtaryn syılaıdy, al kommýnıs­ter maıdangerlermen  kezdesýler ótkizýdi mejelep qoıdy. Názıra JÁRIMBETOVA, «Egemen Qazaqstan». QOSTANAI.