Qosh, aǵa, baspasózdiń qart qyrany

Qazaq baspasóziniń ardageri, qart qalamger, belgili jýrnalıst Salamat Haıdaruly 96 jasqa qaraǵan shaǵyn­da dúnıeden ozdy. Qazaq qoǵamy ­bastan keshken qıly zamannyń kýágeri bolǵan, kúrdeli taǵdyr ıesi Salamat Haıdaruly óziniń bar sanaly ǵumyryn ádilet sózin aıtyp, aqıqattyń únin jetkizýge arnady. Soǵys jylda­r­ynda Qazaqstan Jazýshylar odaǵynyń batys oblystardaǵy ókili boldy. 10 jyl boıy respýblıkalyq «Sosıalıstik Qazaqstan» gazetiniń Mańǵystaý oblysyndaǵy menshikti tilshisi qyzmetin abyroımen atqardy. Jyr alyby Jambylmen kezdesý baqytyn enshilegen, qazaq ádebıetiniń nar tul­ǵalary Sábıt Muqanov, Asqar Toqmaǵambetovtarmen qyzmet babynda tyǵyz baılanysqan. Solardyń áserimen ózi de áńgime, hıkaıattar jazǵan. Ár kezeńniń sýretin sıpattaıtyn pýblısıstıkalyq shyǵarmalary men ádebı týyndylary Salamat aǵanyń 2 tomdyq shyǵarmalar jı­na­ǵynda toptastyryldy. Onyń ádebıetimiz pen jýrna­lıstıkamyzdyń úlken tulǵa­lary Zeınolla Qabdolov, Taý­man Amandosovtarǵa ustazdyq etýiniń ózi bir ónege ispettes. El gazeti «Egemenmen» túıdeı qurdas Salamat aǵa ómiriniń sońǵy kúnderine deıin kezinde ózi qyzmet etken súıikti basylymymen baılanysyn úzgen joq. Qashanda gazettiń jaryq kórgen ár sanyn muqııat oqyp, habarlasyp turatyn. Aldyńǵy býyn ókili retinde aqyly men usynysyn, shynaıy kóńili men aq batasyn keıingi urpaqtan aıamaı, qalam ustaǵan jastardyń sanasynda abyroıly aqsaqal retinde qala bildi. Gazetimizdiń 90 jyldyq mereıtoıynda ataly sóz arnap, qurmetti tórden batasyn bergen abyz ardagerimiz edi. «Egemen Qazaqstannyń» 95 jyldyǵyna densaýlyǵyna baılanysty qatysa almasa da, balasha qýanyp, aq tilegin arnaǵan-dy. Endi mine, qart jýrnalıstiń júregi soǵýyn toqtatsa da, qazaq baspasóziniń shejiresinde onyń ózindik órnekti izi qaldy. Eljirep «Egemenge» júregińiz, Ishinde qarashańyraq túledińiz. Oqytsa Amandosov barshamyzdy, Taýmanǵa sabaq bergen siz edińiz. Qosh, aǵa, baspasózdiń qart qyrany, Kórmegen qyldan taıyp sertti lámi. Qurdasy el gazeti «Egemenniń», Júregi – izgiliktiń aq bulaǵy. Redaksııa  ujymy marqum ­Sa­lamat Haıdarulynyń qaza­syna kóńil aıtyp, artyndaǵy urpa­ǵyna baıandy ómir tileıdi. Ar­dager aqsaqaldyń rýhyna qı­mastyqpen sońǵy «qosh-qoshy­myzdy» aıtamyz.  «Egemenqazaqstandyqtar».