Osy problema aıtylýdaı-aq aıtylyp, jazylyp keledi. Biraq, ókinishke qaraı, odan nátıje shamaly. Sondyqtan taǵy qaıtalap aıtýǵa májbúrmiz, keńes odaǵy kezinde daıyndaý keńsesiniń (zagotkontor) azamattary aýyl-aýyldy aralap, jún-terimen qosa, súıek-saıaq jınaıtyn. Eldegiler de jún-jurqa, súıek-saıaǵyn shashaý shyǵarmaı jınap, buıyrǵan tıyn-tebenge ótkizýge tyrysatyn. Osy úrdisti qaıtadan nege jańǵyrtpasqa?
Eger jınap ákelingen osy baǵaly shıkizatty óńdep, kádege jaratatyn bolsaq, kóp nárseni syrttan almaı, ózimizde óndirýge de keń múmkindik ashylar edi. Árıne, ol úshin úlkendi-kishili óńdeý, tigý kásiporyndary kerek. Úkimet bastap, qolynan is keletin ilkimdi azamattar qostap, osy mańyzdy máseleni nege qolǵa almasqa? Birinshiden, kóptegen jumys orny ashylyp, ekinshiden, eldi mekender irip-shirip, aınalasyna neshe túrli aýrý shashqan teri-tersekten qutylar edi.
Osyndaıda bala kúnimiz eske túsedi. Úıdegi ana-ájelerimiz qoldary qalt etkende jún tútip, urshyq ıiretin. Jún tútýge qyz-kelinshekter de atsalysatyn. Nátıjesinde, esik aldarynda kez kelgen úıden ulttyq naqyshtyń ıisin ańqytatyn kıiz basylyp, alasha toqylyp jatatyn. Odan qalsa, ana-ájelerimiz balalar men úlkenderge jempir, bókebaı, bııalaı, shulyq, taǵy basqa kıim-buıymdar toqıtyn.
Qazir sonyń biri joq. Aıtpasqa bolmaıdy, búginde jún tútip, urshyq ıirmek túgili, aýylda turyp sıyr saýmaıtyn, bıe baılamaıtyn kelinder kóbeıip keledi. Bul úrdiske endi keri jol joq syńaıly. О́te ókinishti.
Meırambek О́MIRBAIULY,
aýyl turǵyny
Aqmola oblysy
О́nerli azamatty eske aldy
Ultyna qyzmet etken aıaýly ul-qyzdarynyń esimin ardaqtap, ulyqtap otyrý – halqymyzdyń qashannan qanyna sińgen asyl qasıet. Al ondaı jandardyń esimi dúnıeden ozǵannan keıin de umytylmaı qaıta jańǵyryp jatsa, odan asqan qurmet bola ma?
Jańa mekenge qonys aýdarǵanyna kóp bola qoımaǵan Shymqaladaǵy Jasóspirimder kitaphanasynyń ujymy taǵylymdy-tanymdyq is-shara ótkizdi. «Men ólmeımin, qaldyrǵan ánim barda» ataýymen uıymdastyrylǵan eske alý keshi aqyn, sazger, ánshi О́mirzaq Ospanovtyń shyǵarmashylyǵyna arnaldy. Ataýly jıynǵa arnaıy kelgen marqumnyń aǵaıyn-týystary, ónerdegi áriptes dostary, kolledj stýdentteri men mektep oqýshylary kóp boldy.
Mádenı is-shara aldynda kelýshiler óner ıesiniń shyǵarmashylyǵyna arnalǵan «Daraboz daryn» atty kórmeni qyzyǵa tamashalady. Mádenıet salasynyń úzdigi, tanymal ánshi Abylaıhan Ospanovtyń oryndaýyndaǵy marqumnyń qyzy Lázzattyń «Áke, men sizdi saǵynyp júrmin» áni jınalǵandardyń janaryna jas úıirdi.
Sulý Syrdyń boıynda dúnıege kelgen bolashaq termeshi, sazger О́mirzaq Ospanovtyń bar sanaly ǵumyry ońtústik óńirinde ótti. Daryndy sazger – kópke belgili «Báıdibek baba», «Domalaq ana», «Shymkentim – shyraılym», «Arman», «Aǵalar-aı!» sekildi kóptegen ánniń avtory. Ol sondaı-aq termeshiler men patrıottyq baıqaýlardyń birneshe dúrkin jeńimpazy. Elimizdiń mádenıeti men ónerine qosqan úlesiniń aıǵaǵyndaı, Shymqaladaǵy «Shámshi álemi» gúlzarynda ashylǵan «Juldyzdar alleıasynda» esimi tasqa qashalyp jazýly tur.
Eske alý keshiniń barysynda oǵan qatysýshylar «О́nerim – ómirim» atty beınebaıandy tamashalap, is-shara ıesiniń ishki-syrtqy álemine úńilgendeı boldy. Al mazmundy da áserli ótken eske alý keshin Shymkent qalalyq Jasóspirimder kitaphanasynyń dırektory Raýshan Babajanqyzy qorytyndylap, marqumnyń zaıyby Dana Ospanovaǵa syı-qurmet kórsetti. Sońynan dastarqan jaıylyp, aqyn, sazger, ánshiniń rýhyna Quran baǵyshtaldy.
Káribaı ÁMZEULY,
kitapqumar
ShYMKENT
Oıyn ýaqyty aýystyrylsa ıgi
Keıingi kezderi «Barys» hokkeı klýby týraly áńgime qóbeıip tur. 2024–2025 jylǵy Qurlyqtyq hokkeı lıgasy (QHL) chempıonatynyń eki aıy ótpeı jatyp komandaǵa jańa basshy taǵaıyndalyp, eki sheteldik bas bapker oryndaryn bosatyp úlgerse, onyń ústine syrttan shaqyrylǵan qymbat legıonerlerden bas tartylyp, ujym múldem turalap qalmasyn dep attóbelindeı reseılik hokkeıshiler ǵana qaldyrylsa, áńgime jeldeı espegende qaıtsin?
Desek te olardyń ornyn óz komandasymen jergilikti maman, sonymen qatar ulttyq quramanyń bas bapkeri Ǵalym Mámbetálıev pen negizinen qazaq jastarynan quralǵan oıynshylar basqany kóptegen kóńildi sabasyna bir túsirip tastaǵany anyq. О́ıtkeni quramaǵa kóp oıynshy «Barystyń» sapynan shaqyrylatyny taǵy málim. Osy turǵydan kelgende, elordalyq komandany quramanyń bas bapkeri jattyqtyrǵany óte oryndy kórinedi.
Al komandadaǵy aýys-túıistiń sebebin astanalyq klýbtyń taǵdyryna beıjaı qaramaıtyn kez kelgen jankúıer biledi: birinshilik bastalǵannan keıingi alǵashqy týrlarda «Barys» jeńilisten kóz ashpady. Sóıtip, týrnır kestesiniń eń sońǵy ornynda qalyp qoıdy. Komandany órge súıreıdi dep kútilgen legıonerlerden de esh qaıran bolmady. Kanadalyq bas bapker Devıd Nemırovskıdi aýystyrǵan reseılik Vıacheslav Býsaev ta jaǵdaıdy ózgertýge qaýqarsyz bolyp shyqty. Mine, osydan keıin komandada túbegeıli ózgeris júrdi. Mundaı sheshimniń qabyldanýyna birinshi kezekte Memleket basshysy Qasym-Jomart Toqaevtyń elimiz sportyna dendep enip ketken qymbat legıonerlerden bas tartý kerektigi jóninde aıtqan sózi túrtki boldy desek, aqıqattan tym alshaq ketpeıtinimiz anyq.
Árıne, qazir de «Barystyń» jaǵdaıy asa jaqsaryp ketti deı almaımyz. О́ıtkeni komanda sapynda QHL deńgeıinde tájirıbe jınap úlgermegen jastar kóp. Biraq qazaq hokkeıiniń bolashaǵy solardyń qolynda ekeni kúmánsiz. Tek búginde olarǵa jankúıerlerdiń qoldaýy asa qajet. Al kóptegen jankúıer 19.00-de bastalatyn oıyndarǵa jumystan shyǵyp úlgermeı qalyp jatyr. Sondyqtan osy máseleni sheshetin oryndarǵa búkil astanalyq hokkeı súıer qaýymnyń atynan oıyndar ýaqyty burynǵydaı 19.30-ǵa aýystyrylsa degen ótinish-tilegimiz bar.
Hamza TAShAÝOV,
jankúıer
ASTANA
