Sýret: gov.kz
«Mercer CFA» ınstıtýty jahandyq zeınetaqy ındeksin 50-den astam ındıkatordy qamtıtyn úsh qosalqy ındeks arqyly baǵalaǵan. Osy ındıkatorlar arqyly zeınetaqy júıelerin obektıvti baǵalaýǵa EYDU, Dúnıejúzilik bank, Halyqaralyq eńbek uıymy, Economist Group zertteý jáne taldaý bólimshesi sııaqty birneshe uıymnyń deregin qamtıtyn ashyq halyqaralyq kózderden alynǵan málimetter paıdalanylǵan. Indıkator boıynsha 64 ball jınaǵan elimiz bıyl zeınetaqy júıeleriniń reıtınginde AQSh, Ispanııa, Japonııa, Ońtústik Koreıa, Qytaı, Saýd Arabııasy, basqa da elderden ozyp, «S+» degen baǵa alypty. Mercer CFA ınstıtýty elimizdegi zeınetaqy júıesin odan ári jetildirýge qatysty birneshe usynys jasapty. Onyń ishinde kedeı zeınetkerlerdi qoldaýdyń eń tómengi deńgeıin arttyrý, zeınetaqy jınaqtaryna qol jetkizýdi shekteý arqyly zeınetke shyǵar aldyndaǵy kezeńde jınaqtardyń shyǵys aǵynyn qysqartý, ómir súrý uzaqtyǵy ulǵaıǵan saıyn egde jastaǵy adamdardyń jumys kúshine qatysý deńgeıin arttyrý, zeınetaqy júıesine qatysýshylardyń jyldyq úzindi kóshirmelerinde boljamdy zeınetaqy tólemderin kórsetý jóninde talaptar engizý syndy usynystar bar.
Jahandyq zeınetaqy ındeksinde bala týýdyń tómendeýine, ómir súrý uzaqtyǵynyń ulǵaıýyna qatysty jalǵasyp jatqan úrdisterdi eskere otyryp, zeınetaqy júıelerin jetildirý kezek kúttirmeıtin másele ekeni ashyp aıtylǵan. Sebebi adamzat tarıhynda alǵash ret 65 jastaǵy jáne odan egde adamdar sany 5 jáne odan kishi jastaǵy balalarǵa qaraǵanda kóbirek tirkelgen.
Eske salar bolsaq, byltyr elimizdiń zeınetaqy júıesi alǵash ret Mercer CFA ınstıtýtynyń jahandyq zeınetaqy ındeksine engizilip, birden 64,9 ball jınaǵan edi. Bıylǵy zertteýlerdiń qorytyndysy boıynsha elimiz tizimniń bel ortasyndaǵy oryndy ıelenip otyr. Bul qatarda birinshi oryndy Nıderlandtyń zeınetaqy júıesi saqtap, 84,8 ball jınady. Bul el 2028 jylǵa qaraı barlyq zeınetaqy josparyn jınaqtaýshy júıege (DC) tolyq kóshirýdi josparlap otyr.
