Bolar bala besiginde bulqynar

Sársenbi kúni Almatyda belgili qalamger ári qoǵam qaıratkeri Erbol Shaımerdenulyna arnalǵan respýblıkalyq ǵylymı-tájirıbelik konferensııa­ ­bolyp ótti. Atalmysh sharaǵa elimizdiń tanymal­ jýrnalısteri, BAQ ókilderiniń basshylary men ǵalymdary qatysty.  Jaqsy jýrnalıst bolamyn, eljandy azamat bolamyn, mem­­le­ketshil bolamyn deıtin jas­tar úshin taǵylymy mol sharany uıymdastyrýǵa ál-Fara­bı atyndaǵy Qazaq ulttyq ýnıver­sıtetiniń jýrnalıstıka fakýl­teti uıytqy boldy. Stýdentter qaýymy Erbol Shaı­merdenulynyń ǵıbratty ómir joly arqyly jýrnalıstıkanyń júgi, jazý óneriniń qyr-syry, qaıratkerlikke bastaǵan tereń bilim men jaýapkershiliktiń úlgi­simen qaýyshty. Erbol Shaımerdenulynyń eline sińirgen eńbegi men ómiri jaıly ál-Farabı atyndaǵy QazUÝ rektorynyń keńesshisi, pro­fessor, belgili aqyn Baýyr­jan Jaqyp baıandama jasady. – Erbol Shaımerdenulynyń esimi elge erte tanyldy. 80-shi jyldary QazGÝ-diń jýrnalıs­tıka fakýltetinde oqytýshy bolyp júrgen kezim bolatyn. Birde kafedra meńgerýshisi, professor Taýman Amandosov dosent Seıdilda Ordalıevpen áńgimelesip otyr edi. Áńgime arasynda Taýkeń: «SK-nyń sektor meńgerýshisi bolyp meniń shákirtim Erbol Shaımerdenov taǵaıyndalypty»,– degenin qula­ǵym shalyp qaldy. Profes­sor qashanda óziniń shákirtterimen maq­tanatyn. Kákimjan Qazybaev, Seıdahmet Berdiqulov, Erjuman Smaıyl esimderin jıi aıtatyn. Sol Taýkeń Erbol Shaı­mer­denovti de óziniń aldyn kórgen, bıikterdi baǵyndyrǵan shákirti retinde ataıtynyn talaı márte estidim. Erbol – Joǵarǵy Keńeste baspasóz hatshysy bolǵan kezinde elimiz táýelsizdigine bir kisideı eńbek sińirgen qaıratker bolatyn. Keıin Prezıdent Ákimshiliginde, Parlamentte, Mádenıet jáne aqparat mınıstrliginde jaýapty qyzmetter atqarǵan jyldarynda óziniń asqan jaýapkershiligimen, mádenıettiligimen, biliktiligimen, bilimdiligimen kózge tústi. О́z basym Erekeń týraly bir de bir jaman sóz estimeppin. Kim aıtsa da Erekeńniń bııazylyǵyn, aqkóńildigin, otansúıgishtigin erekshe aıtatyn edi, – dep bas­talǵan baıandamashynyń sózi Er­bol Shaımerdenulynyń ómir jolyna, aqyndyǵyna jáne ana tilin ardaqtap ǵana qoımaı, mem­lekettik tildi damytýǵa qosqan naqty isterine ulasty. Osydan keıin qazaq jýrna­lıs­tıkasyna bir kisideı ǵumyryn arnaǵan Mamadııar Jaqyp, «Egemen Qazaqstan» gazetiniń burynǵy bas redaktory Erjuman Smaıyl, «Halyq keńesi» gazetiniń burynǵy bas redaktory Sarbas Aqtaev, «Aıqyn» gazetiniń bas redaktory Nurtóre Júsip syndy azamattar Erbol Shaımerdenuly jaıly bolashaq jýrnalısterge tamasha estelikter aıtty. Stýdentterge «Qazaqstan» ulttyq arnasynda kórsetilgen «Jarqyn beıne» atty telesıýjet usynyldy. «Bolar bala besiginde bulqynar» degendeı, jastar keıipkerdiń balalyq shaǵynan bilimpazdyqqa umtylyp, maqsat­shyl bolǵanyn kórdi. Jas­tardy bylaı qoıǵanda, Erbol Shaı­merdenulyn bilemin degen zamandastary da qalamgerligin qaıratkerligimen, qaıratkerligin qalamgerligimen sýarǵan azamat­tyń buryn aıtylmaǵan qyrlarymen qaýyshty. Sol sııaqty Mereke Qulkenov, Nursan Álimbaı, Marat Toqash­baı, Qasymhan Begmanov, Qor­ǵanbek Amanjol, Qudaıbergen Tur­syn syndy el azamattary salıqaly estelikterimen Erbol Shaımerdenulynyń tulǵasyn somdady. Aınash ESALI, «Egemen Qazaqstan». ALMATY.