Pavlodarda mańyzdy qujattarǵa qol qoıyldy

PAVLODAR. 3 qańtar. Premer-mınıstrdiń birinshi orynbasary Baqytjan Saǵyntaev Pavlodardaǵy óndiristik kásiporyndar basshylarymen kezdesti. Bul týraly egemen.kz tilshisi habarlady. Shara barysynda Pavlodar oblysy ákimdigi, elimizdiń ulttyq kompanııalary jáne otandyq taýar óndirýshileri arasynda taýar, qyzmet kórsetý jáne jumys satyp alý boıynsha memorandýmdarǵa qol qoıyldy. Jergilikti qamtýdy damytý boıynsha memorandýmdarǵa «Qazaqstan temir joly» UK» AQ, «QazMunaıGaz» UK» AQ, «Eýrazııalyq top» JShS, «KEGOK» AQ, «Qazaqtelekom» AQ jáne basqalary qol qoıdy. Kelisimniń jalpy quny 128 mlrd. teńgeden asady. Jumys oryndaryn saqtaý jáne óndiristik úderisterdi turaqtandyrý boıynsha memorandýmdardy «Qazaqstan alıýmınııi» AQ, «Qazaqstan elektrolız zaýyty» AQ, «KSP Steel» JShS, «Bogatyr Kómir» JShS jáne óńirdiń basqa kásiporyndary da jasady. Oblys ákimdigi, jumys berýshiler men kásipodaq uıymdary arasyndaǵy memorandýmdar negizinde jumys oryndaryn jáne óndiristik turaqtylyqtyq saqtaýǵa kelisildi. Baqytjan Saǵyntaevtyń aıtýynsha, álemdik ekonomıkadaǵy daǵdarystyń salqyny jergilikti óndiris oryndarynyń jumysyna áser etpeýi úshin memleket tarapynan qoldaý sharalary júzege asyrylýda. Otandyq óndirýshini qoldaý daǵdarysqa qarsy saıasattyń negizgi baǵyttarynyń biri ekenin aıtty. «Úkimet elimizdiń 80-nen astam iri kásipornynyń máselelerin qarap, jergilikti qamtýdy arttyrý arqyly olardy qoldaý boıynsha is-sharalar josparyn qabyldady. Bul baǵytta memlekettik tapsyrystardy, sondaı-aq iri ulttyq kompanııalardyń tapsyrystaryn qazaqstandyq óndirýshilerge basymdyqty úlestirý josparlanǵan», – dedi B. Saǵyntaev. «Álemdik ekonomıka naryǵyndaǵy jaǵdaı óńirimizdiń óndiristik kásiporyndarynyń jumysyna áser etýde. Jergilikti óndiris oshaqtarynyń ónimderiniń 65 paıyzy reseılik naryqqa eksportalatyndyqtan, naqty is-sharalar jospary qajet. Memorandýmdar nátıje beredi degen oıdamyn. О́ńirdegi kásiporyndar áleýmettik jaýapkershilikterin oryndap, ónimdilik kórsetkishteriniń tómendeýine jol bermeýi qajet», – dedi Pavlodar oblysynyń ákimi Qanat Bozymbaev. Farıda Byqaı. Derek: egemen.kz. Sýret: Valerıı Býgaev.