Ondaı marapatqa ıe bolǵandar sany – beseý. Olar Otan aldyndaǵy «paryzdaryn» oıdaǵydaı atqarypty. Sondaı-aq «Eren eńbegi úshin» medalimen – 6, «Úzdik eńbegi úshin» medalimen – 5, «Qoǵamdyq tártipti qorǵaýdaǵy úzdik qyzmeti úshin» medalimen – 160 qyzmetker jáne 28 halyq jasaqshysy, Qazaq KSR Joǵarǵy keńesinin Qurmet gramotasymen — 30 qyzmetker jáne 15 jasaqshy, «IIM-degi úzdik qyzmeti úshin» belgishesimen – 217 qyzmetker, Qazaq KSR Joǵarǵy keńesiniń gramotasymen 113 qyzmetker jáne 30 halyq jasaqshysy, kezekten tys shenge (KSRO IIM buıryǵy) 24 qyzmetker ıe bolyp, KSRO IIM buıryǵymen aqshalaı syılyqpen – 53 qyzmetker, Qazaq SSR IIM buıryǵymen aqshalaı syılyqpen 561 qyzmetker marapattalǵan. Biraq osy myńdaǵan adamnyń birde-bireýi «osy marapatqa laıyq emespin» dep jar salǵan emes-ti. Bálkim, dál sol mezgilde totalıtarlyq júıege qarsy shyǵý aýyr bolǵan shyǵar. Biraq ýaqyt óte aıtýǵa bolatyn jaıt edi ǵoı bul...
Arylýǵa shaqyrǵan alǵashqy ún 1990 jyly qazanda estildi. Ony da basqa emes, qyrǵyz baýyrymyz Talaıbek Ylaev ózine berilgen Qazaq KSR Joǵarǵy Keńesiniń maqtaý qaǵazyna «Men myna buıymdy ózderińe qaıtaramyn. Sebebi ol meniń úıimde saqtaıtyndaı qundy emes. Men ózimdi fashıst, máńgúrt sezingim kelmeıdi» dep qaıtarypty. Arylýdy bastap bergen Talaıbek baýyrymyzǵa rahmet. Áıteýir osydan keıin seń qozǵalǵandaı boldy. Sóıtip 1 Qyzyl Juldyz ordeni keri qaıtaryldy. Sondaı-aq «Eren eńbegi úshin» medalinen – 1, «Qoǵamdyq tártipti qorǵaýdaǵy úzdik qyzmeti úshin» medalinen – 23, Qazaq SSR Joǵarǵy keńesiniń Qurmet gramotasynan – 2, Qazaq SSR Joǵarǵy keńesiniń gramotasynan 10-y tıisti jerine qaıtarylyp berildi. Alaıda, myńdaǵan adamnyń sanaýlysy bolsa da ózderiniń «erliginiń» shynaıy emestigin kesh te bolsa sezingen tárizdi. Al qalǵandary kúni búginge deıin ózderiniń ádilettilikti, qoǵamdyq tártipti saqtaǵandardyń sardarlary sanatynda sanaıtyn tárizdi...
Jeltoqsan kóterilisine qatysýshylardy soqqyǵa jyqqandar, qýǵyn-súrginge ushyratqandar, jazyqsyz sottaǵandar halyqtan keshirim surap, kúnásinen qashan arylady eken?
Ǵabızat Jádiger
