Foto: respublika.kz.media
Biz halyqaralyq zańdarǵa, halyqaralyq erejelerge súıenip syrtqy saıasatta sheshim qabyldaımyz. Bul zańdy syılaý, quqyqty taptamaýdy bildiredi. Mundaı qadamdy ózge memleketter óte qatty baǵalaıdy. Ásirese, Batys memleketteri, Japonııa tipti AQSh bizdi moıyndap otyr.
Elimiz eki úlken saıası aktorlar – Reseı men Qytaıdyń ortasynda ornalasqan. Eki elmen de tatý kórshilikti saqtaý mańyzdy. Biraq Qazaqstan óziniń ustanǵan saıasatyna oraı Reseıdi de, Qytaıdy da strategııalyq áriptesi retinde kórsetip otyr. Ekeýi de teń, osy maqsatty aldymyzǵa qoıyp qoıǵanbyz. Burynǵydaı ekonomıkalyq jaǵynan bolsyn, áleýmettik jaǵynan bolsyn, saıası jaǵynan bolsyn Reseıge alańdamaımyz. О́ıtkeni áriptespiz. О́zimizdiń quqymyz, ustanymymyz bar. Damyǵan elder muny kórip otyr. О́zimizdiń múddemizdi eń birinshi orynǵa shyǵardyq. Ári qaraı da kúsheıe tússe, Qazaqstannyń orny halyqaralyq arenada múldem ózgeredi.
Qazir adam quqyǵy máselesin de alǵa qoıyp otyrmyz. Demokratııa, saıası demokratııa ınstıtýttaryn damytyp, erejelerin bekitip alýǵa talpynyp kelemiz. Jemqorlyqtyń da tamyryna balta shaýyp, eldiń zańsyz áketilgen qarjysy qazynaǵa qaıtarylyp jatyr. Bul – bizdiń syrtqy saıasatymyzǵa, halyqaralyq arenadaǵy orynymyzdy shegelep alýǵa bastaıtyn izgi qadamdar.
Qazaqstan Orta Azııanyń bes memleketimen de kelisim ornatyp, kóshbasshylyq tanyta bildi. Odaqtas eldermen birge damýymyz jaqsy qadam, bes el bes jaqta ornalasqanymen birikkenimiz jón. Osyndaı kishkentaı qadamdarmen úlken jetistikterge jetip kelemiz. Bul – árıne, syrtqy saıasattyń nátıjesi.
Ishki saıasatymyzdy damytýǵa da bet burdyq, quqyqtyq zaıyrly memleket atyna saı bolý mańyzdy. Bul bir bıliktiń mindeti ǵana emes, halyqtyń ishki mádenıetine de baılanysty. Memleket degen – saıası kúsh. Sondyqtan adam quqyǵy qorǵalyp, bılik pen halyqtyń múddesi saı kelýi kerek. Elimiz osyǵan talpynyp, kóptegen is atqaryp jatyr. Mańyzdysy bılik te, halyq ta muny túsindi. Halyqtyń quqyǵy men memlekettiń quqyǵy birdeı bolyp, tepe-teńdik qurylsa, zańdarymyz da, quqyqtarymyz da syrtqy saıasatymyzdyń damýyna óte kóp úles qosatyny sózsiz.
Tolǵanaı ÚMBETÁLIEVA,
saıasattanýshy
