Talant syrqatqa bas ımeıdi

«Nur Otan» partııasy oblystyq fılıaly­nyń «Kedergisiz keleshek» jobasy aıasynda uıymdastyrǵan múmkindigi shekteýli jandar­dyń qolóner kórmesi talanttyń syrqatqa bas ımeıtindigin dáleldegendeı boldy. Kórmege tek Qostanaı qalasyndaǵy ǵana emes, aýdandardaǵy, alys aýyldardaǵy múmkindigi shekteýli jandar belsene qatysty. Kórmedegi kózdiń jaýyn alatyn sýretter, toqyma buıymdary, aǵashtan, shynydan, qaǵazdan jasalǵan óner týyndylary, monshaqtan tergen sýretter men áshekeı buıymdar kózdiń jaýyn alady. Olardy syrqat, múmkindigi shekteýli jandardyń qolynan shyqqan dep kórermendi sendirý de ońaı emes edi. Mysaly, aǵaıyndy sýretshi Ańqaýovtar­dyń júnnen boıap salǵan sýretteri jańa tehnologııasymen erekshelenedi, kásibı sýretshiler tarapynan joǵary baǵaǵa ıe bolǵan. Sonymen qatar, «Úmit-Nadejda» qoǵamdyq qorynyń úıirmesinen kelgen zattar da kópshiliktiń kózaıymy boldy. Osy birlestiktegi sheber Alına Lamparter jasaǵan kádesyı, erinbeıtin, tózimdilikti qajet etetin eńbektiń nátıjesi edi. Alına ótken jyldyń aıaǵynda «Jan shýaq» respýblıkalyq qoǵamdyq syılyǵyn alǵan bolatyn. Sonymen qatar, taǵdyrdyń salǵan júgin arqalap, aýrýmen alysyp júrgen jandardyń qolynan shyqqan kúndelikti turmysta qoldanatyn kórpe, kórpeshe, aǵash buıymdar asqan rýhtyń myqtylyǵynan da habar bergendeı. Kórmede «Nur Otan» partııasy oblystyq fılıaly tóraǵasynyń birinshi orynbasary Álııa Saparova «Talant syrqattan kúshti» kórmesi Elbasy tapsyrmasymen partııa júrgizip otyrǵan kóp jumystyń jalǵasy ekenin, bul jumys aldaǵy ýaqytta da jalǵasa beretinin aıtty. – Qazir naryq sıntetıkadan jasalǵan taýarǵa toly. Al taza ekologııalyq materıaldan jasalǵan, onyń ústine adamnyń jan tebirenisi aıqyn kórinip turatyn qolóner buıymdary árkezde de joǵary baǵalanǵan. Múmkindigi shekteýli jandardyń qolóner buıymdary sonysymen de baǵaly, qurmetke ıe. Ony kórmege kelýshiler satyp alady. Bul kórme múmkindigi shekteýli jandardyń qarajat tabýyna jaqsy múmkindik, – dedi oblystyq máslıhat depýtaty Ekaterına Smyshlıaeva. Kórmege bul joly 50 adamnyń qolóner buıymdary qoıyldy. Oblys ákiminiń múgedekter isi jónindegi keńesshisi Aslan Dabylovtyń aıtýynsha, oblys óńirinde úıde otyryp qolónermen, taǵy basqa da kóńili súıgen ispen aınalysatyn múmkindigi shekteýli jandar óte kóp. Eńbek etken jannyń múmkindigi eshqashan shektelmeıdi. Názıra JÁRIMBETOVA, «Egemen Qazaqstan». QOSTANAI.