О́zimizdiń Janna-Marı

Negizgi áńgimemizdiń basty keıipkeri Janna-Marı Veberdiń ata-babalary Germanııadan Reseıge I Petr patshalyq etken zamanda qonys aýdaryp, odan soń Qazaqstanǵa kelip turaqtaıdy. Janna-Marıdiń ákesi Aleksandr Veber nemis ultynan bolsa, anasy Ǵalııa Toqtamqyzy qazaq, osy Jympıtynyń týmasy eken. J.Veber Q.Myrzalıev atyndaǵy Jympıty orta mektebiniń túlegi. Otbasynda, mektepte qazaq tilinde maıyn tamyza sóıleı biletin ol kezinde marqum ákesi Aleksandr Anatolevıchtiń kóńilin edáýir ósirip, marqaıtyp tastaıtyndyǵy da ras-ty. J.Veber Eńbek jáne áleýmettik qatynastar akademııasynyń zań fakýltetin, M.О́temisov atyndaǵy BQMÝ-diń pedagogıka jáne psıhologııa bólimin bitirgen bildeı maman. Eńbek jolyn aýdandyq AHAJ bóliminde «Aq otaý» qazynalyq mekemesiniń dırektorlyǵynan bastaǵan nemis qyzy búginde Syrym aýdandyq sotynyń keńse meńgerýshisi qyzmetin atqarady. Ulty nemis bolsa da  ózin qazaq ókili retinde sanaıtyn Janna-Marı Aleksandrovna otbasynda qazaq, nemis ultynyń taǵamdaryn til úıiretindeı etip daıyndaýǵa  mán beredi. Sondaı-aq, ol qazaq tiliniń mártebesin kóterý, nasıhattaý baǵytynda ózindik biliktiligin, zerektiligin tanytyp, keıbir «men qazaqpyn» dep keýde soǵatyndardyń ózin tań-tamasha qaldyrady. Osy turǵyda aıta keterlik jaıttyń biri – qazaq tilinde erkin, maıyn tamyza sóıleıtin Janna-Marı «Til – tatýlyq tiregi» atty quqyq qorǵaý organdary jáne basqa da memlekettik organdar qyzmetkerleri arasynda ótkizilgen byltyrǵy respýblıkalyq baıqaýda júldeli  3-orynǵa ıe bolyp Bas Prokýror A.Daýylbaevtyń qolynan «Alǵys hat» alsa, «Memlekettik til – mereıim» atty oblystyq baıqaýda ekinshi dárejeli dıplommen marapattaldy. Memlekettik tildiń mereıin halyq arasynda keńinen nasıhattaý, ıaǵnı ózin ózi tanystyrý, maqal-mátelder aıtý, án, óleń-jyr saıys­tarynda aldyna qara salyp kórmegen J.Veber – oblystyq sot, ­aýdan ákimdigi tarapynan Qurmet gramotasy, Alǵys hattarǵa birneshe dúrkin qatarynan ıe bolǵan jan. – Qazaqstan men úshin ystyq. Elimizdegi túrli etnos ókilderi birlik, dostyq jaǵdaıynda ómir súrýde. О́zim Qazaqstan halqy Assambleıasynyń múshesi retinde túrli sharalarǵa qatysyp, birlik, beıbitshilik, qoǵamdyq kelisim sııaqty basty qundylyqtardy nasıhattaýǵa ózindik ún qosýdamyn, – deıdi J.Veber áńgime arasynda. Janna-Marıdiń uly Radjan óziniń jolyn qýǵan zańgerlik salada bolsa, marqum atasynyń esimin ıelengen uly Aleksandr aqyn Q.Myrzalıev atyndaǵy mekteptiń 4-synybynda oqıdy. Janna-Marı Aleksandrovna bıylǵy jyldyń Qazaqstan halqy Assambleıasy jyly bolyp jarııalanýyn qýattaı otyryp, eldegi kópultty halyq arasyndaǵy dostyqtyń nyǵaıa beretindigine bek senimdi. Músirbek AITAShEV. Batys Qazaqstan oblysy, Syrym aýdany.