Keshe Qazaqstan Prezıdenti janyndaǵy Memlekettik basqarý akademııasynda Qazaqstan halqy Assambleıasy Tóraǵasynyń orynbasary Eraly Toǵjanovtyń, Parlament Májilisiniń depýtaty Qýanysh Sultanovtyń, Astana qalasyndaǵy «Obereg» ýkraındar qoǵamdyq birlestiginiń tóraıymy Tamara Shırmerdiń qatysýymen Assambleıa jylyna arnalǵan jıyn ótti. Shara barysynda Qýanysh Sultanov pen Tamara Shırmer «Qazaqstan halqy Assambleıasynyń 20 jyldyq tarıhy» taqyrybynda dáris oqydy.
Jıynda sóz alǵan Eraly Toǵjanov bıyl el tarıhynda mán-maǵynasy tereń oqıǵalar uıymdastyrylatynyn, buǵan halyq bolyp atsalysý qajettigin jetkizdi. Aınalamyzda bolyp jatqan kóp jaǵdaıdy bilesizder. Onyń ishinde halyqaralyq jaǵdaılardy. Demek, osyndaı kezeńde ishki saıasaty myqty eldiń ǵana syrtqy saıasaty da myqty bolady. Al ishki saıasatymyz myqty bolý úshin halqymyz bir bola bilýi kerek. Osy oraıda, ıaǵnı Assambleıa jyly aıasynda túrli kezdesýler ótkiziledi. Bulardyń barlyǵy jaıdan-jaı emes, dedi QHA Tóraǵasynyń orynbasary. Osylaı deı kele, ol Assambleıanyń tarıhyna da qysqasha toqtalyp ótti. Sondaı-aq, Ýkraınada dál qazirgideı shıelenisti jaǵdaılar oryn alady dep eshkimniń de oılamaǵanyn kóldeneń tartty. Mine, osyndaı jaǵdaılardy únemi nazarda ustap otyrýymyz kerek. Bizdegi turaqtylyq pen birliktiń, kelisimniń arqasynda memleket óziniń damýyna alǵyshart jasaı bildi. Oǵan 1995 jyly qurylǵan QHA-nyń qosqan úlesi zor. Biz jurtshylyqqa onyń mańyzyn árdaıym jetkizip, túsindirip otyrýymyz kerek, dedi bul oraıda Eraly Luqpanuly.
Qýanysh Sultanov: «Bıylǵy jyly birin-biri jalǵastyryp, birin-biri tolyqtyratyn aýqymdy sharalar ótedi. Olar bir jaǵynan, merekelik sharalar, ekinshi jaǵynan, qoǵamdyq, memlekettik, halyqtyń rýhanı, sanalyq ósip-órkendeý dáýiriniń kórsetkishteri. Sondyqtan, Elbasynyń tapsyrmasy boıynsha, barlyq salada osy oqıǵalarǵa daıyndyqtar júrip jatyr. Bul óz-ózimizdi tanýymyzǵa sep bolady. Bul memleketimizdiń qandaı joldarmen júrip kele jatqandyǵyn, ultymyzdyń qanshalyqty deńgeıde óskendigin, kimniń kim ekenin bilýge de sep bolady. Memleketti jasaıtyn qoǵamnyń árbir múshesi. Biz memleketimizdiń jańa zamandaǵy irgetasyn jasap, ultymyzdyń ósýine, el áleýetiniń qýattanýyna bárimiz múddeles bolýymyz kerek», dedi.
Osylaı deı kele, Q.Sultanov Assambleıanyń qurylý kezeńderi jóninde baıandap berdi. Kez kelgen sheshim, onyń ishinde Elbasy deńgeıindegi tarıhı sheshimder úlken pikir alysýlardan ótken. Ol kezinde jarııa bolmaǵan, qazir de solaı. Qazir memlekettiń taǵdyryna qatysty máseleler bolsa, ony Prezıdent sol máselege ókiletti azamattarmen, mamandarmen birneshe ret saraptaı otyryp, sheshim jasap jatady. Al eger sheginis jasap, 1991 jyldy eske alatyn bolsaq, ol kezeńdi búgingi kúnmen salystyrýǵa kelmeıdi. Ol kezdegi úderisterdiń ózi de basqasha edi. Alaıda sol kezdiń ózinde halyqtyń tynyshtyǵy men birligin qamtamasyz etý máselesi kóp aıtylatyn. Eger de birlik bolmasa, ishki turaqtylyq bolmasa, qandaı da bir reforma týraly sóz qozǵaýdyń ózi artyq. Bul jaıynda ár kún saıyn Memleket basshysy aıtyp keledi. Qazaqstan – kópetnosty el. Al osyndaı elde kez kelgen jaǵdaı kez kelgen sátte ýshyǵyp ketýi ábden múmkin. Demek, osydan-aq QHA-nyń róli qandaı bolatyny aıqyndala túsedi. Búginde bul ınstıtýttyń qoǵamdyq kelisimdi ózek etken ıdeıasy ǵana mańyzdy bolyp otyrǵan joq, onyń memlekettiń qurylymyna yqpal-áseri de jyl ótken saıyn artyp keledi, dedi Q. Sultanov.
Sondaı-aq, sharaǵa qatysýshylar etnosaralyq jáne qoǵamdyq kelisimniń qazaqstandyq modelin jan-jaqty nasıhattaý baǵytynda áli de jumystar júrgizý qajettigin aıtty.
Láıla EDILQYZY,
«Egemen Qazaqstan».
