Kópshilik kútken qýanyshty sát edi. Sebebi kitaphana ǵımaraty paıdalanýǵa berilgeli qyryq jyl ótse de, jóndeý kórmegen. Endi mine, ajarlanyp, tolǵan aıdaı tolyqsyp, jańarǵan. Igilikti istiń aıasynda Qazaqstannyń halyq jazýshysy Sáken Júnisovtiń týǵanyna 90 jyl tolýyna oraı «Serilerdiń sońǵysy» taqyrybynda ǵylymı-tájirıbelik konferensııa uıymdastyryldy. Jańarǵan ǵımarattyń qos qanatynda Sáken Júnisov pen jazýshy-dramatýrg, aqyn Tólegen Qajybaev atyndaǵy májilis zaly men mýzeı kabınetiniń lentasy qıyldy.
– Uly Maǵjannyń qos qanatynda oıly oqyrmannan oń baǵasyn alǵan eki aǵamyz tursa, jaraspaı ma? Bul bizdiń óńirde buryn-sońdy bolmaǵan jańalyq, – deıdi kitaphana dırektory, aqyn Qýanysh Ospan.
Tólegen Qajybaev atyndaǵy mýzeı-kabınet kózi qaraqty oqyrmannyń kózaıymyna aınalary sózsiz. Kabınetke aqynnan qalǵan jádigerleri, qyrýar qoljazbasy, tyrnaqaldy týyndysynan bastap, eń sońǵy romanyna deıin qoıylǵan eken. Jeke zattary, jyldar boıy jınaǵan kitaptary, ordenderi men medaldary, ózge de marapattary, kózge sonshalyqty ystyq kórinetin fotosýretter de bar.
«Zamanymyzdyń zańǵar jazýshysy Ábish Kekilbaev aıtqandaı, «Adamdy adam etken – kitap, adamzat etken – kitaphana» dedi quttyqtaý sózinde jazýshy-dramatýrg Jabal Erǵalıev. Sáken seri rýhy táýelsiz sýretker edi ǵoı. Eldiń sózin, muńy men zaryn aıtyp ketti. Halqyna qaltqysyz qyzmet etken qalamgerge qandaı qurmet kórsetsek te laıyqty.
Qurqyltaıdyń uıasyndaı jyp-jyly, jap-jaryq, qurylysshynyń qalaǵynan jańa shyqqandaı jarqyraǵan kitaphanada tanymdyq is-shara uıymdastyrylyp, ádebıetke yntyq elge telegeı teńiz rýhanı kúsh-qýat syılady.
Kókshetaý
