О́SKEMEN. 4 aqpan. Bıyl О́skemen qalasynyń Gagarın atyndaǵy býlvarynda qala turǵyndarynyń demalysyna arnalǵan alańqaı salynady. Shahar basshysy Temirbek Qasymjanov turǵyndarmen eseptik kezdesýinde osylaı dedi. Bul jóninde egemen.kz tilshisi habarlady.
Jıynda Oktıabr aýdanynda «jasyl aımaq» qurý týraly óskemendikterdiń usynysyna alańqaı qurylysynyń jumystary bastalyp ketkeni aıtyldy.
«Sizderdiń ótinishterińiz oryndy. Qalanyń barlyq aýdanynda «jasyl aımaq» bolýy kerek. Sonda qala turǵyndary bala-shaǵasyn kóterip, demalý úshin alysqa barmaıdy. Qazir osy baǵytta jumystar júrgizilip jatyr. Gagarın býlvarynda balalarǵa arnalǵan oıyn alańy bar demalys múıisi boı kóteredi», – dedi qala ákimi.
Aǵymdaǵy jyly paıdalanýǵa beriletin alańqaıdan ózge, Metallýrgter saıabaǵy qala ákimdiginiń menshigine alynǵany málim boldy. Barlyq tıisti qujattar resimdelip bolǵan soń, atalǵan saıabaq jańa kestege saı jumys istemek. Iаǵnı, Metallýrgter saıabaǵy qala turǵyndary men qonaqtary úshin jaz jáne qys maýsymdarynda da ashyq bolady.
Dýman Anash.
Derek: egemen.kz.
Sýret: О́skemen qalasy ákimdiginiń baspasóz qyzmeti.
