О́SKEMEN. 4 aqpan. Shyǵys Qazaqstan oblysynyń kásipkerler palatasy men Qytaı Halyq Respýblıkasy ShUAR Altaı aımaǵynyń Halyqaralyq saýda palatasy ózara yntymaqtastyq jónindegi memorandýmǵa qol qoıdy. Bul jóninde egemen.kz tilshisi habarlady.
Shyǵys Qazaqstanǵa Qytaıdyń Altaı aımaǵynan jumys saparymen arnaıy delegasııa keldi. Eki jaqty kezdesý barysynda taraptar ózara yntymaqtastyq týraly memorandýmǵa qol qoıdy. Atalǵan kelisimniń maqsaty – ózara yntymaqtastyqty kúsheıte otyryp, isker seriktes tabý, sondaı-aq zańgerlik keńes qyzmetin kórsetý.
«Shekaralas aımaq retinde Shyǵys Qazaqstan úshin qytaılyq áriptestermen seriktestikti kúsheıtýdiń mańyzy zor. Biz ınvestısııanyń quıylýyna, jańa tehnologııalardyń engizilýine qyzyǵýshylyq tanytamyz. Eki el arasyndaǵy taýar aınalymy kóleminiń kórsetkishi joǵary. Sondyqtan seriktestikti kúsheıtýge kórshi el de kúsh salady dep oılaımyn», – dedi óńirdegi Kásipkerler palatasynyń tóraǵasy Igor Shaskıı.
Qytaıdan kelgen ókilder I.Shaskıımen kelisetindikterin jetkizdi. Osylaısha, qos tarap kórmelik is-sharalardy uıymdastyrý jáne aqparattandyrý boıynsha qoldaý, másele týyndatatyn saýaldar tóńireginde birlese jumys jasaý, sondaı-aq kórmelik-jármeńkelik salany damytý boıynsha kelisim jasasty.
Dýman Anash.
Derek: egemen.kz.
Sýret: Shyǵys Qazaqstan oblysynyń aqparattyq ortalyǵy.
