Premer-mınıstrdiń orynbasary Soltústik Qazaqstanǵa keldi

PETROPAVL. 4 aqpan. Premer-mınıstrdiń orynbasary Berdibek Saparbaevtyń jumys sapary búgin Soltústik Qazaqstan oblysynda jalǵasty. Bul týraly oblystyq ákimdiktiń baspasóz qyzmeti habarlady. B.Saparbaevtyń qatysýymen Petropavl qalasynda ótken alqaly bas qosýǵa mınıstrlikter men ulttyq kompanııalardyń ókilderi, jergilikti iri kásiporyndar, agroqurylymdar, vedomostvolar, salalyq kásipodaq uıymdarynyń jetekshileri qatysyp, álemde oryn alyp otyrǵan qarjy daǵdarysyna qarsy pármendi kúres júrgizý joldaryn talqyǵa saldy. Jıyndy aımaq basshysy Erik Sultanov kirispe sózben ashyp, oblystyń áleýmettik-ekonomıkalyq damý jaıynan habardar etti. Berdibek Mashbekuly Elbasy Úkimet pen atqarýshy bılik oryndary aldyna halyqtyń ómir sapasyn jaqsartý, áleýmettik mindettemelerdi múltiksiz oryndaý mindetterin qoıǵanyn, bul jolda barlyq uıymdastyrýshylyq, tabandy jumys sharalaryn barynsha jumyldyrý qajettigin, Joldaý tapsyrmalaryn oryndaýdyń mindettiligin atap kórsetti. Oblys ákiminiń orynbasary Murat Áýkenov, Petropavl aýyr mashına jasaý zaýytynyń bas dırektory Qýanysh Bıshimov, aýyl sharýashylyǵy kesheni kásipodaq komıtetiniń tóraǵasy Alfred Mavlıýtov qarjylyq qıyndyqtardy eńserý, aldyn alý sharalaryna qatysty oı-usynystaryn ortaǵa saldy. Jıyn sońynda oblystyq ákimdik, kásipodaq jáne iri kásiporyndar men ulttyq kompanııalar arasyndaǵy tyǵyz qarym-qatynasqa negizdelgen jańa jumys oryndaryn ashý, jumyssyzdyq deńgeıin kemitý, adamdardyń quqyqtyq kepildemelerin qamtamasyz etý, eńbek qatynastaryndaǵy turaqtylyqty saqtaý múddelerin kózdeıtin 14 memorandýmǵa qol qoıyldy. Olardyń quny 18 mıllıard teńgeni quraıdy. О́mir Esqalı.                   Derek: Soltústik Qazaqstan oblystyq ákimdiginiń baspasóz qyzmeti. Sýret: «QazAqparat».