PETROPAVL. 1 mamyr.Qazaqstan halqynyń birligi kúni Qyzyljar óńirinde de dostyq pen tatýlyqtyń, beıbitshilik pen myzǵymas turaqtylyqtyń merekesi retinde kóterińki kóńilmen, jarqyn júzben asqaq rýhta atalyp ótti. Bul týraly egemen tilshisi habarlady.
Adamdar bir-birine amandyq, saýlyq joldap, elimizdiń aıbary asqaqtaı berýin tiledi. Qazaqstan halqy Assambleıasynyń 20 jyldyq mereıtoıymen tuspa-tus kelgen mereke el damýynyń qaryshty qadamy, bedel-abyroıymyzdyń asqaqtaý, ár shańyraqq a shattyq qonǵan, ulttar men ulystardy uıystyrǵan meıram retinde baǵalanyp, ulttyq qundylyqtarymyzdyń qadir-qasıetteri ulyqtaldy.
Mereke saltanaty Táýelsizdik stellasy janynan bastaldy. Onda oblys ákimi Erik Sultanov turǵyndarǵa jyly lebizge toly quttyqtaýyn arnap, Elbasy atynan 36 soltústikqazaqstandyqqa «Qazaqstan halqy Assambleıasyna–20» merekelik medalin tabys etti.
Qalanyń barlyq yqsham aýdandarynda uıymdastyrylǵan merekelik baǵdarlamalardy qyzyqtaǵan jurtshylyq qatary qalyń boldy. Dostyq úıinde ótken «Halyqtardyń asyl qazynasy» atty baıqaýǵa 19 etnos klýb qyzyǵýshylyq kórsetip, óz nómirlerinde ortaq shańyraq astynda bir úıdiń balasyndaı, bir qoldyń salasyndaı tatý-tátti yntymaqta ómir súrip jatqan ulystardyń baıandy tirligin, berik birligin arqaý etti. «Qoǵamdyq kelisim» mekemesi uıymdastyrǵan «Máńgilik El: bir halyq, bir taǵdyr» konkýrsy kópshilik talǵamynan shyqty. Onda balalar ártúrli taqyryptar boıynsha sýret salýdan synǵa túsip, shyǵarmashylyq qarym-qabyletterin tanytty. Abaı men Pýshkın eskertkishi qasynda «Dostyqtyń saz álemi» mýzykalyq-bı kompozısııasy qanat qaqsa, «Assambleıa aýry» atty túrli etnostardyń ádemi arýlary qatysqan baıqaý da óz kórermenderin rıza etti. Demalys jáne mádenıet saıabaǵynda stýdent-jastar «Dostyq darhany» flesh-mob, qyzyqty konkýrstar uıymdastyrdy.
Merekeniń sánin qazaqstandyqtardyń tatýlyǵy men kelisimin pash etken keshki merekelik konsert keltirdi. Ol shyn mánindegi dostyq án-jyr, bı arqaýyna aınalyp, qyr betin qyzǵaldaqqa toltyryp jibergendeı áserge bóledi.
О́mir Esqalı.
Derek: egemen.kz
Sýret: Talǵat Tánibaev.
