100-ge kelgen mıllıarder Devıd Rokfeller 6-ret júregin aýystyrdy

ASTANA. 1 mamyr. Belgili mıllıarder, aldaǵy shildede 100 jasqa tolatyn Devıd Rokfeller ómirinde 6-ret júrek transplantasııasyn jasatty. Bul týraly Word News Dally Report basylymy habarlady. 6 saǵatqa sozylǵan otany Nıý-Iorktegi Rokfeller áýletine tıesili Pokantıko-hıll saraıynda mıllıarderlerdiń jeke hırýrgtarynan qurylǵan top jasady. Otadan keıingi qaıta qalpyna kelý kezeńi Tynyq muhıtynyń ortasyndaǵy Vanýatý aralynda ótedi. Operasııadan keıin 36 saǵat ýaqyt ótkende Devıd Rokfeller jýrnalısterge ózine birneshe suraq qoıýǵa ruqsat bergen. «Júregimdi aýystyrǵan saıyn, búkil deneme qan júgirip, ómirdiń bir tamshysyndaı bolǵan tylsym kúsh boıyma qýat bergenin sezinemin. Sol kezde ózimniń tiri jáne belsendi ekenimdi bilemin», – deıdi mıllıarder. Uzaq ómir súrýdiń qupııasy týraly suraqqa Rokfeller: «Maǵan bul suraq jıi qoıylady. Bárine berer jaýabym birdeı. Iаǵnı, uzaq jasaýdaǵy bar syrym – meniń ómirge degen mahabbatym, ony sheksiz súıý. Qarapaıym ómir súrý, jas balalarmen bala bolyp oınaý, qolyńda bar dúnıege qanaǵat etý, ýaqytyńdy syr bóliser dostaryńmen ótkizý. Mine, meniń ómirimniń negizgi formýlasy osyndaı», – dedi. Ol óz ómirinde óte kóp aqsha taýyp, baılyqqa kenelgenin, alaıda, dúnıesiniń kóp bóligin qaıyrymdylyqqa bergenin aıtty. «Baılyǵyńdy ózgelermen bólisý múmkindigine ıe bola tura, ony ózińde qaldyrý – maǵynasyz tirlik», – deıdi Devıd Rokfeller. Aıta keteıik, mıllıarder alǵash ret júregin 1976 jyly aýystyrǵan. Ol kezde kólik apatyna ushyraýy sebep bolǵan. Atalǵan apattan keıin 24 saǵat ýaqyt ótkende Rokfellerge júrek transplantasııasy jasaldy. Al bir aptadan keıin ol baıaý bolsa da júgire alatyn halge jetken. Sonymen qatar, 1998 jáne 2004 jyldary mıllıarder búıregin aýystyrǵanyn aıta keteıik. Búginde 100-ge kelgen Devıd Rokfeller ózin jaqsy sezinetinin jáne densaýlyǵyna eshqandaı shaǵymy joǵyn aıtty. Tipti ol mundaı densaýlyqpen 200 jasqa deıin ómir súretinine úmitti ekenin de ázilmen astarlap jetkizdi. Devıd Rokfeller 1915 jyldyń 12 shildesinde Nıý-Iork qalasynda týǵan. Ol - álemdegi eń alǵashqy mıllıarder Djon Rokfellerdiń nemeresi. Elaman Qońyr. Derek: Word News Dally Report. Sýret: bloomberg.com.