Ár jyldyń óz ereksheligi, óz yrysy bolary anyq. 2024 jyl da álem úshin de, sol álemniń bir bólshegi Qazaqstan úshin de synaq pen múmkindikke toly boldy.
Ásirese kóktemgi sý tasqyny eldi de, erdi de daǵdartty. Sý tasqynynyń beti qatty bolǵanyn kóz kórdi. Kóktemgi sý tasqynynyń saldaryn joıý úshin qabyldanǵan sharalar memlekettiń tıimdi jumys isteı alatynyn kórsetip, zardap shekken ár otbasy kómek-qoldaýsyz qalmady. Úı salyndy, páter berildi, ınfraqurylym nysandary qalpyna keltirildi. Barsha turǵyn men kásipkerdiń shyǵyny ótelgenin bizdiń Aqmola oblysynyń jaǵdaıynan da tolyq ańǵarýǵa bolady. Tipti qarǵyn sýdyń ortasynda qalyp, barlyq baılanystan úzilgen Jarqaıyń aýdanyndaǵy Úshqarasý aýylyna azyq-túlik, dári-dármek, zeınetaqy men járdemaqylar da qaıyqpen jetkizilip turdy. Bul jaǵdaı aýyl halqyn shynaıy rızashylyqqa bóledi.
Prezıdent suhbatynda elimizde byltyr buryn-sońdy bolmaǵan astyq jınalǵanyn da aıtty. Bul – kóptiń nesibesi, eldiń yryzdyǵy. Bıyl Astanada aýyl sharýashylyǵy qyzmetkerleriniń birinshi forýmy ótkizildi. Prezıdent ózi bas bolyp aýyldyń damýyna, jergilikti jurtshylyqtyń qanattana túsýine zor yqpal etti. Osy forýmda Qasym-Jomart Toqaev: «Aqmola oblysyn úlgi retinde aıtýǵa bolady. Bul aımaq elordanyń azyq-túlik beldeýi degen atqa laıyq ekenin dáleldedi. Bıyl oblystyń aýyl sharýashylyǵyndaǵy jalpy ónimi eki ese ósken. Bul – óte jaqsy nátıje», dep atap kórsetti. Rasynda, aqmolalyq dıqandar ótken jylǵy aýa raıynyń asa kúrdeli jaǵdaıyna qaramastan, 6,6 mıllıon tonna astyq jınap, orasan tabysqa qol jetkizdi.
«Jalpy, byltyr álemdik deńgeıdegi osyndaı kóptegen is-sharaǵa qatystyńyz. Bul sizdiń syrtqy saıasatqa basa mán beretinińizdi meńzep, Prezıdent – kásibı dıplomat, sondyqtan halyqaralyq máselelerge kóbirek nazar aýdarady» degen áńgimeniń shyǵýyna túrtki boldy. Shynymen de solaı ma?» degen gazet tilshisiniń saýalyna oraı Qasym-Jomart Toqaev biz, eń aldymen, halyqaralyq arenadaǵy is-áreketterimizge jaýapkershilikpen qarap, qazirgi zamannyń asa kúrdeli máselelerine kelgende, syndarly ustanymda bolýymyz kerektigin jetkizdi. Qazirgideı dúrbeleńi, daý-janjaly, qarýly qaqtyǵystary tyıylmaı otyrǵan jaǵdaıda Qasym-Jomart Toqaevtyń Prezıdent retindegi qyzmetinde syrtqy saıasatqa basymdyq berip otyrýy asa mańyzdy, óte oryndy.
«Meniń basty maqsatym – memleketimizdiń ekonomıkalyq áleýetin, egemendigin jáne halyqaralyq arenadaǵy ornyn nyǵaıta túsý», degen osy biraýyz sózimen-aq Prezıdentimiz týǵan eli men halqynyń aldyndaǵy paryzyn paıymdap otyr emes pe? Olaı bolsa, Prezıdent syrtqy saıasatty nyǵaıtyp jatsa, biz, otandastar óz elimizdiń ishki saıasatyn nyǵaıtýymyz kerek. Bul – eldegi birlikti, yntymaqty nyǵaıtý, eńbek etý, bilimdi bolý, jasampaz ult bolý,bolashaqqa senimmen qaraý!
Prezıdentke tilshiniń qoıǵan suraqtary da, Memleket basshysynyń sol suraqtarǵa qaıtarǵan jaýaptary da kópshiliktiń kókeıinde júrgen alańdy máseleler edi. Qazaq elin dúrbeleńge salyp, álem jurtynyń nazaryn aýdarǵan 2022 jylǵy Qańtar oqıǵasy júrekterdi áli de syzdatyp, alańdatary bar. О́ıtkeni munda el taǵdyry, memleket táýelsizdiginiń taǵdyry jatqany anyq edi. Sol Qańtar oqıǵasynan alar bir sabaq bar, bul – táýelsizdikke opasyzdyq jasaýǵa bolmaıdy, táýelsizdik taǵdyrymen oınaýǵa jol joq.
«Qańtar oqıǵasynan úsh jyl ótkende azamattarymyzdyń kópshiligi elimizde buryn-sońdy bolmaǵan osy dúrbeleń kópe-kórineý áleýmettik ádiletsizdiktiń, saıası toqyraýdyń, sondaı-aq qaskóılerdiń shekten tys menmendiginiń jáne olardyń halyq pen memleket taǵdyryna nemquraıly qaraýynyń kesirinen oryn alǵanyna ábden kóz jetkizdi», degen Qasym-Jomart Toqaevtyń jýrnalıske bergen jaýabynda Qańtar oqıǵasynyń saldary men sebebi oryndy anyqtalǵan der edim.
О́mir ózgerip jatyr. Sol oń ózgeristerdi baıqamaý, sezbeý múmkin emes. Qoǵam ashyqtyqqa den qoıdy. Bılik pen halyqtyń arasynda senimdi baılanys ornyǵyp keledi. Osynyń barlyǵy da Prezıdentimiz Qasym-Jomart Toqaevtyń azamattardy saıası ómirge belsendi aralasýyna múmkindik jasaýynyń arqasynda bolyp otyr.
«2022 jylǵy maýsym aıynda ótken referendýmnyń nátıjesinde Konstıtýsııa baptarynyń úshten biri jańarǵanyn qaperge sala keteıin. Munyń ózi reformanyń qanshalyqty aýqymdy ekenin kórsetedi. Qazirgi tańda kóptegen reforma is júzinde júzege asyrylyp jatyr. Bizdiń baǵytymyz aıqyn, maqsatymyz belgili», degen Prezıdenttiń Qazaqstannyń turaqty túrde áleýmettik-ekonomıkalyq damýyn qamtamasyz etý, elimizdiń óńirdegi kóshbasshy mártebesin nyǵaıtý jónindegi strategııalyq mindeti – baǵa jetpes qundylyq, basty maqsat, ózekti múdde. Olaı bolsa, Prezıdent aıtyp otyrǵan ekonomıkany jáne egemendikti nyǵaıtýǵa árqaısymyz qyzmet etýge mindettimiz. El taǵdyryna, táýelsizdikke bárimiz jaýaptymyz!
Jabal ERǴALIEV,
Qazaqstannyń eńbek sińirgen qaıratkeri
KО́KShETAÝ
