Iаr Challyda bir áıel eki aılyq balasyn óltirip tastady

ASTANA. 2 mamyr. Tatarstannyń Iаr Chally (Naberejnye Chelny) qalasynda otbasynda kúıeýi tarapynan udaıy bolyp kelgen qorlaýǵa shydaı almaı, eki aılyq balasyn óltirip, óziniń tamyryn jarǵan. Bul týraly KazanFirst saıty habarlady. Qazir tergeýshiler áıeldi mundaı jaǵdaıǵa naqtyly neniń aparǵanyn anyqtap jatyr. Atalǵan fakt boıynsha «Kishentaı balany» óltirý degen bap boıynsha qylmystyq is qozǵaldy. Oqıǵa 30 sáýir kúni tańerteń bolǵan. Iаr Challynyń «Zamelekese» shaǵyn aýdanyndaǵy Fomenko dańǵyly boıyndaǵy páterlerdiń birinde turatyn 29 jastaǵy Zılıa Mýslımova (sýrette) degen kelinshek aldymen eki aılyq ulynyń qan tamyryn kesip, ózine de sondaı áreket jasaǵan. Ul bala sol boıda qaıtys bolyp ketedi. Al onyń anasy «jedel járdemmen» jergilikti aýrýhananyń jansaqtaý bólimine jatqyzylady. Quqyq qorǵaý organdary ókilderiniń baıandaýynsha, áıeldiń janyna kúzet qoıylǵan. Qaıǵyly oqıǵa bolǵan páter turǵyndar kórshileriniń aıtýlarynsha, jas otbasy músheleri ylǵı urys-keriste ómir súrgen. Kórshileri sondaı-aq buǵan kúıeýiniń ylǵı áıelin qorlap, shekten shyǵaratyny sebep bolǵanyn aıtyp otyr. Iаr Chally polısııasy qyzmetkerleriniń aıtýlarynsha, Zýlıa Mýslımova ulyn óltirip, ózine sýısıd jasar aldynda hat jazyp ketken. Onda kelinshek úıdegi urys-keristiń bárine enesiniń kináli ekenin atap kórsetken. Biraq polıseıler onda áıeldiń ulyn óltirý jóninde eshbir nıeti bolmaǵanyn aıtady. Agenttik mánbesi Zýlıanyń úıde bolyp jatqan jaǵdaıdy «VKontakte» jelisine jazyp turǵanyn baıandaıdy. Kelinshektiń bir qabat tómende turatyn kórshisi páterde jıi janjal bolyp turǵanyn jazǵan. «Kúıeý jigittiń anasy kelinin únemi qorlap turatyn. Ol balanyń óz ulynan emes ekenin málimdeıdi», dep jazypty ol. «Kún saıyn úıden janjal, áıeldiń jylaǵanyn estımin. Ol qudaıǵa ózin alyp ketýdi aıtyp, jalbarynatyn. Onyń balanyń ákesin anyqtaý úshin DNK-ǵa test tapsyrýdy suraǵany da estildi», - dep kórsetipti kýáger. Qaırat Qulymbet. Derek, sýret: KazanFirst.