Foto: pixabay.com
Taıaýda kásiptik bilim alǵan mektep oqýshylarynyń alǵashqy legi aspaz jáne kondıter mamandyqtaryn oqyp ıgerip, dıplomǵa ıe boldy. Oblys ortalyǵyndaǵy osy saladaǵy ujymdar jas tolqyndy aldaǵy ýaqytta jumysqa tartyp, ıgilikti istiń alǵashqy álippesin úıretpek. Memleket basshysy Qasym-Jomart Toqaevtyń jumysshy mamandyǵyna nazar aýdarýy tegin emes.
– Bul shynynda da óte ózekti másele, – deıdi ardager ustaz Raýza Báıkenova, – atam qazaq «balany jastan» dep tegin aıtpaǵan. Keıingi jyldary jastardyń eńbekke degen qulshynysy kemip ketti. Árıne, joǵary bilim alǵan, jańa tehnologııalardy ıgergen jaqsy. Degenmen tabıǵat syılaǵan qabilet árqıly. Árkim óziniń qolynan keler sharýany atqarýy kerek. Boıkúıez balanyń ósip jetilýine ata-ana da, mektep te kináli. Kóbine ata-analar baýyr eti balalaryn óbektep, jelge, kúnge tıgizbeı ósiredi. Mundaı balalar shege qaǵa almasa, qyzdar ıne ustaı almaıdy. Sondyqtan «eti seniki, súıegi meniki» demekshi, kishkentaıynan eńbekke baýlý kerek. Joǵaryda atalǵan baǵdarlama boıynsha kásip ıgerip jatqan balalar jerde qalmaıdy, tek árqaısysy óz salasynyń myqty mamany bolýy kerek. Sonda baǵy janady.
О́ńirde qazir «Talapker» qanatqaqty jobasy aıasynda elýden astam oqýshy kásibı bilim alyp otyr. Oblystyq bilim basqarmasy basshysynyń orynbasary Valerıı Gamazovtyń aıtýynsha, óńirde birneshe kolledj anyqtalǵan. Oqý oryndarynyń materıaldyq-tehnıkalyq bazasyn eskere otyryp, Kókshetaý qurylys-tehnıkalyq jáne Stepnogor joǵary kolledjderi tańdalǵan. 10-synyp oqýshylary arasynda bolashaqqa baǵdar berilip, mamandyq tańdaý tóńireginde jumys júrgizilgen. Oqýshylar eki jyl boıy jalpy bilim berý baǵdarlamasy boıynsha mekteptegi sabaǵyn kolledjdegi oqýymen ushtastyrady. Osylaısha, olar kúni erteń kásibı maman ıesi atanady.
Memleket basshysynyń Joldaýynda kásibı bilim berý júıesin reformalaý qajettiligi aıtylǵan bolatyn. Bul óte mańyzdy másele. Tapsyrmany tap-tuınaqtaı oryndaý úshin bizdiń óńirde mektep jasynan bastap jumysshy mamandyǵyn ıgerý qolǵa alynyp otyr.
Kókshetaý
