О́miri izgilikpen órilgen

Ustazdyqty ómirlik mu­ra­tyna aınaldyrǵan aıaýly jannyń otandyq bilim salasyn damytýǵa qosqan úlesi óte zor. Eskertkish-taqtanyń ashylýynda Qazaqstannyń Eńbek Eri Aıagúl Mırazova qaıratker keńestik júıeniń ústemdigine qa­ra­mastan, qazaq mektebi máse­le­sin ótkir kótergenin sóz etti.

«Onyń osyndaı ıgi isterine Qyzylordaǵa issaparmen bar­ǵan­da kóz jetkizdim. Shámshá Kópbaıqyzynyń «Qazaq mektebi – ult tiregi» atty eńbegin oqyp, kóp jaǵdaıǵa qanyqtym. Osynda óz isiniń mazmunyna tereń úńilip, qazaq mektebin damyta otyryp, eli men jerin súıetin azamattar tárbıeleý ekenin basa aıtqan», dep eske aldy ol.

Búginde laýazymdy qyzmet atqaryp júrgen áıel azamatshalar barshylyq. Biraq qoǵam qaıratkeri bolý ekiniń biriniń qolynan kelmeıdi. Jazýshylar odaǵynyń tóraǵasy, qalamger Mereke Qulkenov aıtýly tulǵanyń mektep basshylyǵynan bas­tap senator, mınıstr, rektor qyzmetinde júrip, ultqa jan aıamaı eńbek etkenin aıtty. Al aqyn, Memlekettik syılyqtyń laýrea­ty Nurlan Orazalın: «Almaty tórinde Alashtyń aıaýly qyzy, qazaqqa qadiri asqan tulǵa bıigine kóterilgen Shámshá Kópbaıqyzy Berkimbaeva jaıynda sóz etkende, jany jaısań, júregi jomart, eline esepsiz qyzmet etken qaıratkerligi eske oralady. Adamzat balasynyń rýhanı eńbegi, ultynyń aldynda atqarǵan uly mindeti adal bolsa, ony halqy eshqashan umytpaıdy. Jadynda saqtaıdy, júregine tumar etip túıip, urpaqtan-ur­paqqa qaldyryp otyrady. Us­taz­dyq minezine qanyqqan, qaırat­kerlik qalybyna kózi jetken ótken ǵasyrdyń 50 jylynda óskenin, óngenin kórgen ardaqty qyzyn eli jaqsy biledi», dedi aqyn.

Sondaı-aq is-shara barysynda belgili tulǵanyń kózin kórip, istegen isin ózine de, keıingi tolqynǵa da úlgi etip júrgen Almaty qalasy Mádenıet basqarmasynyń basshysy Ǵanı Maılybaev Shámshá Kópbaıqyzynyń qaıratkerligi men adamı bolmysyna toqtaldy. Qazaq ulttyq qyzdar pedagogıkalyq ýnı­versıtetiniń rektory Gúlmıra Qanaı Sh.Berkimbaeva atalǵan oqý ornyna basshylyq etken tusta tálim-tárbıe men ákimshilik-sharýa­shylyq jumystardyń jań­ǵyrýyna kóp atsalysqanyn jet­kizdi.

«Sol kezeńde aýyldan kelgen jastardy ýnıversıtetke kóp tartty. Zamanaýı úlgidegi 9 qabatty 450 oryndyq «Stýdentter úıi» salynyp, oqý ǵımarattary, jataqhanalar men ashanalarǵa kúrdeli jóndeý jumystary júr­gizildi. Jastardy bilimge, ıman­dylyqqa tárbıeleýge erekshe kóńil bóldi. Onyń pedagogıkalyq jáne basqarýshylyq qyzmeti óskeleń urpaqqa úlgi», dedi ýnıversıtet rektory G.Qanaı.

Qazirgi tańda Qazaq ult­tyq qyzdar pedagogıkalyq ýnı­ver­­sı­tetiniń stýdentter úıi Shámshá Berkimbaevanyń esimimen atalady.

ALMATY