Atam qazaqta «ury basynyp urlaıdy» deıtuǵyn uǵym bar. Ábden dánikken sýyqqol suǵanaqtar mal súmesimen kún kórgen momyn halyqty basynyp-aq tur. Tún qatyp, ońaı olja kózdegen urylar 59 bas jylqyny tebinde júrgen jerinen aıdap alyp ketken. Urlyq kóp uzamaı ashyldy. Astana–Petropavl baǵytyndaǵy kúre joldyń boıynda polısııa qyzmetkerleri avtokólikti toqtatqan kezde júk salǵyshynan jańa soıylǵan jylqynyń býy burqyrap jatqan ishek-qarny men qanǵa bókken terisi tabylǵan. Kólik ıeleriniń eshbir qujattary joq. Ishek-qarny bolǵanymen eti kózge túspegen soń kúdik týǵan. Jedel izdestirý barysynda Stepnogor qalasynyń mańyndaǵy Qyryqqudyq aýylynyń jylqysy bolyp shyqty. Urylar Aıdarly aýylynyń mańyndaǵy qorada jylqynyń birnesheýin soıyp, sata bastaǵan. Qylmystyq is qozǵalyp, ońaı oljaǵa dánikkender jazasyn tartatyn boldy.
Ereımentaý aýdanynda da mal urlyǵy oryn alǵan. Jergilikti turǵyndar 13 bas jylqysy joǵalǵanyn quqyq qorǵaý organdaryna habarlapty. Jábirlenýshiniń aıtýyna qaraǵanda, «Gazel» avtokóligin mingen belgisiz bireýler Ereımenniń eteginde jaıylyp júrgen bir úıir jylqyny úptep ketken. Malsaq qaýymǵa keltirilgen shyǵyn – 8,5 mln teńge tóńireginde. Oqys oqıǵadan der kezinde habarlanǵan polısııa qyzmetkerleri jedel izdestirý jumystaryn utymdy uıymdastyrýdyń arqasynda kóp ýaqyt ótpeı, urylardy qolǵa túsirdi. Olar eki jylqyny soıyp satyp úlgeripti. Qalǵan 11 bas ıesine qaıtaryldy.
Zań qanshalyqty qataıǵanymen, mal urlyǵy tolastamaı tur. Áıtse de, quqyq qorǵaý organdary qyzmetkerleriniń jiti qımyldaýy arqyly qylmystyń izi sýymaı ashylyp jatyr. Bul oraıda malsaq qaýymdy saqtandyrý da ishinara jemisin berip jatyr. 2003 jyly 79 mal urlyǵy oryn alsa, 2024 jyly mundaı shetin oqıǵalar 37 ret bolǵan. Demek mal urlyǵy 54 paıyzǵa azaıdy degen sóz. Urlyq jasaǵan 25 adam qolǵa túsip, úsh qylmystyq toptyń joly kesilgen.
Áıtse de, mal ıeleri áli kúnge deıin albyrt. О́zderiniń mańdaı terimen ósirip otyrǵan tórt túligine ıe bola almaı otyr. Kúre jolǵa jaqyn ornalasqan aýyldardyń maly jol ústine shyǵyp ketip, jol-kólik oqıǵasyna sebep bolady. Mundaı jaılar da az emes. 2 564 mal ıesine tórt túlik mal baǵý erejesin buzǵany úshin ákimshilik shara qoldanylǵan. 229 adam mal ónimderin zańsyz tasymaldaǵany úshin jaýapqa tartylǵan.
Aqmola oblysy
