Otyrysqa Eýrazııalyq ekonomıkalyq odaqqa múshe memleketter delegasııalarynyń basshylary: Belarýs Respýblıkasynyń premer-mınıstri Roman Golovchenko, Qyrǵyz Respýblıkasy mınıstrler kabınetiniń tóraǵasy – Prezıdent ákimshiliginiń basshysy Adylbek Qasymalıev, Reseı Federasııasy úkimetiniń tóraǵasy Mıhaıl Mıshýstın, Armenııa Respýblıkasynyń vıse-premeri Mger Grıgorıan; EAEO baqylaýshy elderi delegasııalarynyń basshylary: Iran Islam Respýblıkasynyń birinshi vıse-prezıdenti Aref Mohammad-Reza; О́zbekstan Respýblıkasynyń premer-mınıstri Abdýlla Arıpov, Ázerbaıjan premer-mınıstri Álı Idaıat oǵly Asadov, EEK alqasynyń tóraǵasy Baqytjan Saǵyntaev qatysty.
Oljas Bektenov óz sózinde Odaq elderi arasyndaǵy saýdany damytý men ekonomıkalyq ıntegrasııanyń mańyzdylyǵyna erekshe nazar aýdardy.
«Qazaqstan Respýblıkasynyń Prezıdenti Qasym-Jomart Toqaev Eýrazııalyq ekonomıkalyq odaq ekonomıkalyq ıntegrasııa jáne ózara saýda-sattyqty damytý úderisi tabysty júzege asyryp jatqan asa mańyzdy alańdardyń biri retinde óziniń tıimdiligin dáleldegenin atap kórsetti. Sonymen qatar ulttyq deńgeıde, sondaı-aq EAEO sheńberinde syrtqy jaǵdaılarǵa tıimdi beıimdelý múmkindigi bizdiń ekonomıkalarymyzdyń básekege qabilettiligin qamtamasyz etýdiń negizgi faktoryna aınalady», dep atap ótti O.Bektenov.
Osy oraıda Qazaqstan tarapy Odaq sheńberinde birlesken jumystyń birqatar basym baǵytyn atap ótti. Búgingi tańda EAEO quqyqtyq júıesi ekonomıkalyq birlestikke múshe elderge belgili bir ónimderdi ákelýge ýaqytsha veterınarlyq jáne fıtosanıtarlyq sharalardy engizýge múmkindik beredi. Mundaı sharalardy qoldaný shekteý belgilegen memleket aýmaǵy arqyly tranzıtke tosqaýyl qoıady, sol arqyly mejeli elge kirýge tyıym salynady. Saýda qatynastarynda kedergisiz orta qurýdyń mańyzdy ekeni basa aıtyldy.
Qazaqstan Premer-mınıstri ornyqty ekonomıkalyq ósýdi qamtamasyz etý úshin qolaıly bıznes-orta qalyptastyrýdyń mańyzdylyǵyna toqtaldy. Búgingi tańda Odaq aýmaǵynda retteýshi jáne naqty áserlerdi baǵalaý tetigi jumys isteıdi. Kásipkerlik qyzmetti júrgizý jaǵdaıyn jaqsartý úshin Birlestik sheńberinde halyqaralyq sharttarǵa naqty áserdi baǵalaý tetigin qoldanýdy keńeıtý usynyldy.
Sondaı-aq týrıstik saladaǵy yntymaqtastyqtyń keleshegine nazar aýdaryldy. Tanymal baǵyttar men kórikti jerler týraly biryńǵaı aqparattyq resýrs qurý boıynsha jumysty kúsheıtý jóninde usynys engizildi.
Otyrys qorytyndysy boıynsha qatysýshylar EAEO-nyń ekonomıkalyq áleýetin nyǵaıtýǵa, iskerlik ahýaldy jaqsartýǵa jáne birlesken jobalardy iske asyrýǵa baǵyttalǵan birqatar qujattarǵa qol qoıdy.
