Otyrysta sóz alǵan Oqý-aǵartý mınıstri Ǵanı Beısembaev ótken jyldy qorytyndylap, bilim júıesiniń sapasyn odan ári arttyrýdyń basym baǵyttaryna toqtaldy. «Bilim berý tárbıemen tyǵyz baılanysty. Memleket basshysynyń tapsyrmasy boıynsha barlyq bilim berý uıymynda óskeleń urpaqtyń boıyna qundylyqtar júıesin qalyptastyrýǵa jáne nyǵaıtýǵa baǵyttalǵan alty negizgi jobany qamtıtyn «Birtutas tárbıe» baǵdarlamasy engizildi. Bul jumystyń tıimdiligi kóp jaǵdaıda synyp jetekshilerine baılanysty. Sondyqtan ony mol tájirıbesi bar bilikti ustazdardyń oryndaýy mańyzdy. Tárbıe baǵdarlamasynyń tujyrymdamalyq negizderin eskere otyryp, pedagogterdiń synyp jetekshiligine degen kózqarasyn túbegeıli qaıta qaraý kerek. Elimizde bilim sapasyn baǵalaýdyń ózindik ulttyq júıesi qalyptasty. Bilim alýshylardyń bilim jetistikterine monıtorıng jasaýdyń otandyq baǵalaý quraly RCEC saraptama jáne sertıfıkattaý ǵylymı zertteý ortalyǵynda halyqaralyq deńgeıde tanyldy, osylaısha Qazaqstan Ortalyq Azııadaǵy bilim berý sapasyn baǵalaý júıesi boıynsha akkredıtteýden ótken jalǵyz elge aınaldy», dedi ol.
Spıkerdiń sózine qaraǵanda, mınıstrlik pedagogtiń úzdiksiz kásibı damý úderisi retinde biliktilikti arttyrý paradıgmasyn qaıta qarady. Barlyq rásim «Ustaz» ulttyq platformasynda júzege asyrylady, júıe avtomattandyrylǵan. Bıyl alǵash ret platformada 88 myńnan asa moderator men sarapshyny attestattaýdan ótkizý josparlanyp otyr.
«Byltyr birden eki pedagog «Qazaqstannyń Eńbek eri» ataǵyna ıe boldy. Bul – pedagogterimizdiń eńbegine Prezıdent tarapynan berilgen joǵary baǵa men qurmet, artylǵan zor senim. Dese de alańdatarlyq ahýal da joq emes, «Pedagog mártebesi týraly» zańyn buzý faktileri anyqtaldy. Bilim berý salasyndaǵy sapany qamtamasyz etý jónindegi aýmaqtyq departamentter zań buzýshylyqtardyń 120 jaǵdaıyn tirkedi. Atap aıtqanda, Semeı qalasynda muǵalimderdi tıesili emes fýnksııalarǵa tartý sońy qaıǵyly jaǵdaıǵa ákelip soqtyrdy. О́ńirlerdiń basshylyǵyn zańdy qatań saqtaý úshin barlyq qajetti sharany qabyldaýǵa shaqyramyn», dedi Ǵ.Beısembaev.
Mınıstrdiń aıtýynsha, elimizde 7 myńnan asa memlekettik mektep jumys isteıdi. 2023 jyldan bastap jańa formattaǵy basqarýshylardy daıarlaý úshin «Bilim berýdegi ózgeristerdiń 1000 kóshbasshysy» jobasy iske asyrylyp jatyr. Qazirdiń ózinde respýblıkalyq kadr rezervine 583 kandıdat alynǵan. Balalardyń qaýipsizdigin qamtamasyz etý mınıstrliktiń basty mindeti bolyp qala beredi. 2024 jyly zańǵa kámeletke tolmaǵandarǵa qatysty zorlyq-zombylyq úshin jaýapkershilikti kúsheıtetin jáne otbasyn qoldaýǵa baǵyttalǵan túzetýler engizildi. Sondaı-aq Balalardyń quqyqtaryn qorǵaý komıtetiniń ókilettikteri keńeıtildi. Bıylǵy qańtar aıynda BUU-da Qazaqstannyń osy saladaǵy reformalary joǵary baǵaǵa ıe boldy.
«Biz ınklıýzıvti jáne arnaıy bilim berýdi damytýdy jalǵastyramyz. Bıyl psıhologııalyq-pedagogıkalyq qoldaýǵa 100% qoljetimdilikti qamtamasyz etýdi josparlap otyrmyz. «Bóbek» ulttyq ǵylymı praktıkalyq ortalyǵy men Ulttyq ınklıýzıvti bilim berý ortalyǵyn transformasııalaý bastaldy. Qazan aıynda Qazaqstan alǵash ret Inklıýzııa boıynsha dúnıejúzilik kongresti qabyldaıdy. Bilim berý sapasyndaǵy alshaqtyqty azaıtý úshin qalalyq jáne aýyldyq mektepter arasynda «Aýyl mektebi – sapa alańy» jobasy iske asyrylady. Bul materıaldyq-tehnıkalyq bazany jańǵyrtýǵa, joǵary jyldamdyqty ınternetti qamtamasyz etýge jáne oqytý sapasyn arttyrýǵa baǵyttalǵan. 2024 jyl bilim berý ınfraqurylymy úshin mańyzdy kezeń boldy. Táýelsizdik tarıhynda alǵash ret mektepterdiń rekordtyq sany salyndy. 2023 jyly 165 mektep qoldanysqa berildi. О́tken jyly 257 mektep boı kóterdi, onyń 105-i «Jaıly mektep» ulttyq jobasy aıasynda salyndy. Olardy tıimdi basqarý úshin mınıstrlik biryńǵaı júıe ázirledi», dedi mınıstr.
Ǵ.Beısembaevtyń baıandaýynsha, úderisterdi sıfrlandyrý jáne avtomattandyrý qazirgi bilim berý ortasynyń mańyzdy bóligi sanalady. Mınıstrlik «Smart oqý aǵartý» jobasyn iske qosty. Bul sıfrlyq bilim berýdiń biryńǵaı ekojúıesin quryp, oqytýdyń sapasyn arttyrady, oqytý úderisteriniń barlyq qatysýshysyna bilim berý resýrstary men qyzmetterine jeńil qol jetkizýge múmkindik beredi. «Starlink» termınaldaryn engizý esebinen sapaly ınternet tartylǵan mektepterdiń úlesi 2022 jylǵy 19%-dan 2024 jyly 95%-ǵa deıin, ıaǵnı 3 esege ulǵaıdy.
Sondaı-aq alqa otyrysynda ǵalymdar, pedagogter, ata-analar, saraptamalyq jáne bıznes-qoǵamdastyq ókilderi sóz sóıledi. Olardyń qatarynda pedagogıka ǵylymdarynyń doktory, professor Jaýymbaı Qarambaev, Ulttyq quryltaı tóraǵasynyń orynbasary Bıbigúl Jeksenbaı, IýNISEF-tiń Qazaqstandaǵy ókili doktor Rashed Mustafa Sarvar jáne t.b. bar.
Aıdana KEMELBEK
