Senat tóraǵasynyń orynbasary Jaqyp Asanov halyqaralyq vorkshopty asha kelip, Senat spıkeri Máýlen Áshimbaevtyń kezdesýge qatysýshylarǵa arnalǵan quttyqtaýyn jarııa etti. Tóraǵa orynbasary jasandy ıntellektini damytý men onyń etıkalyq máselesiniń mańyzyna toqtaldy.
«Jasandy ıntellekt qazirdiń ózinde ómirimizdiń ajyramas bóligine aınaldy. Ol álemniń kelbetin ózgertti jáne medısınadan bilim berýge deıingi negizgi salalarǵa dendeı endi. Senatta da ony zań shyǵarý úderisine engizý boıynsha jumys qolǵa alyndy. JI qoǵamnyń qajetin taldaı alady, zańdardyń saldaryn boljaı alady, normatıvtik aktilerdi daıyndaýǵa kómektesedi. Biz qazirdiń ózinde álemdik tájirıbeni zerdeleýdemiz jáne sarapshylarmen ózara is-qımyldy bastadyq. Parlament ózgeristerge ashyq jáne zamanaýı tehnologııany engizýge daıyn», dedi J.Asanov.
Is-sharaǵa memlekettik organdardyń ókilderi, ǵylymı-zertteý ınstıtýttarynyń jetekshi sarapshylary, IT-sala mamandary, Parlament Senatynyń depýtattary Darhan Qydyráli, Ǵalıasqar Sarybaev, Naýryzbaı Baıqadamov, Alısher Satvaldıev qatysty.
Qatysýshylar vorkshoptyń toptyq sessııalary aıasynda jasandy ıntellektiniń damý kezeńderi men ınnovasııalaryn, tildik úlgiler men sıfrlyq lıngvıstıkany, jasandy ıntellekt ekojúıesin damytý máselelerin talqylady. Densaýlyq saqtaýda JI-di qoldanýǵa, atap aıtqanda, ozyq algorıtmderdi qoldana otyryp, medısınalyq sıntetıkalyq derekterdi generasııalaýǵa erekshe nazar aýdaryldy. Sonymen qatar keleshekte jasandy ıntellektini etıkalyq retteý jáne onyń qoǵamǵa áseri jaıynda aıtyldy.
2023 jyly Parlament Senatynyń tóraǵasy Máýlen Áshimbaevtyń qatysýymen Astanada ótken Álemdik jáne dástúrli dinder lıderleri sezi hatshylyǵynyń XXI otyrysy aıasynda Musylman aqsaqaldar keńesi Ortalyq Azııa Bıýrosynyń keńsesi ashylǵan edi. О́kildik sodan beri Ortalyq Azııanyń búkil óńirin qamtı otyryp, belsendi jumys istep keledi.
