Sýret: z-taraz.kz
Sý nysandarynyń kóktemgi egis jumystaryna daıyndyǵyn baǵalaý otyrystyń negizgi maqsaty boldy. Senatorlar salany bilikti mamandarmen qamtamasyz etý deńgeıi men tamshylatyp sýarýdy engizý jáne sý resýrstaryn tıimdi paıdalaný jónindegi jobalardy iske asyrý barysyn sarapshylarmen birge talqylady. Sondaı-aq byltyr ashylǵan Qazaq ulttyq sý sharýashylyǵy jáne ırrıgasııa ýnıversıtetiniń qyzmetimen tanysyp, salany damytýdyń ózekti máselelerin zerdeledi.
«Sýarý júıelerin jańǵyrtý jáne bilikti maman daıarlaý – aýyl sharýashylyǵyn damytý men óńirdiń ekonomıkalyq turaqtylyǵyna tikeleı qatysty strategııalyq mańyzdy mindetter. Sý sharýashylyǵyna kadr daıarlaýda Jambyl oblysy árqashan basty ról atqaryp keledi jáne búgin bizdiń aldymyzda jańa qaterler turǵany belgili. Zamanaýı sý únemdeý tehnologııasyn engizý, sý resýrstaryn tıimdi basqarý jáne kadr tapshylyǵy máselesin sheshý qajet. Ol agrarlyq sektordyń ónimdiligin arttyrýmen qatar elimizdiń uzaqmerzimdi sý qaýipsizdigin qamtamasyz etýge múmkindik beredi», dedi Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Álı Bektaev.
Kóshpeli otyrysqa qatysýshylar sý tapshylyǵynyń negizgi sebepterine toqtaldy. Aıtalyq, klımattyń ózgerýi, sý resýrstaryn tıimsiz paıdalaný jáne salada bilikti mamanǵa degen suranystyń arta túsýi. Osyǵan baılanysty sý únemdeý saıasatyn qalyptastyrý, sý sharýashylyǵy ınfraqurylymyn jańǵyrtý, transshekaralyq yntymaqtastyqty kúsheıtý jáne kadr daıarlaý sapasyn arttyrý jóninde naqty usynystar ázirlendi.
Depýtattar Jambyl oblysyndaǵy birqatar sý nysandaryn aralap, tamshylatyp sýarý júıesi jabdyǵyn shyǵaratyn zaýyttyń, «Taraz bylǵary aıaq kıim» JShS, qant zaýytynyń jumysymen, sondaı-aq jańartyla bastaǵan «Teris-Ashybulaq» sý qoımasynyń qazirgi jaǵdaıymen tanysty.
